އިސްރާއީލުން ފަލަސްތީނަށް ދެމުންދާ ލާއިންސާނީ އަނިޔާތައް ދިފާއުކުރުމުގައި އަރަބި ގައުމުތަކުން އެކަށީގެންވާ ފިޔަވަޅެއް ނާޅާތީ އާއި އަރަބި ޤައުމުތަކުން ފަލަސްތީނަށް އެހީ ނުވާތީ ކުރީގެ ރައީސް މައުމޫނު އަބްދުލްގައްޔޫމު ކަންބޮޑުވުން ފާޅުކުރައްވައިފިއެވެ.
ޓްވިޓަރގައި ކުރީގެ ރައީސް މައުމޫން ހިއްސާކުރެއްވި މެސެޖެއްގައި ވިދާޅުވީ ރެޔާއި ދުވާލު މެދުނުކެނޑި އިސްރާއީލުން ޣައްޒާއަށް ބޮން އަޅައި ތަފާތު ޙަމަލަތައް ދެމުން ގެންދާ ކަމަށެވެ. އަދި ކުށެއްނެތް އެތައް ސަތޭކަ ފަލަސްޠީނުގެ ރައްޔިތުން ކޮންމެ ދުވަހަކު ޝަހީދުވަމުންދާ ކަން ފާހަގަކުރެއްވިއެވެ. އެހެންވީމަ އެ ވިދާޅުވާ ބައިނަލް އަޤްވާމީ މުޖުތަމަޢު ކޮބައިތޯ އެމަނިކުފާނު ވަނީ ސުވާލު އުފައްދަވާފައެވެ.
އެ މަނިކުފާނު އިތުރަށް ވިދާޅުވީ ފަލަސްތީނަށް ދެމުންދާ ހަމަލާތަކަކީ ހުރިހާ މުސްލިމުންނަށް ލިބޭ ހިތްދަތިކަމެއް ކަމަށެވެ. އިސްރާއީލުގެ އަނިޔާވެރި ހަމަލާތަކުގެ އަސަރު އެތައް ސަތޭކަބަޔަކަށް ކުރަމުންދާއިރު އަރަބި ޤައުމުތަކުން ވަރުގަދަ އިޖާބައެއް އެކަަމަށް ދެމުން ނުދާކަމަށް ވެސް އެމަނިކުފާނު ފާހަގަކުރެއްވިއެވެ. އެންމެ ފަހުގެ ހަތިޔާރާއި ވަސީލަތްތައް ހުރި އަސްކަރިއްޔާތައް ހުރި ނަމަވެސް އަރަބި ޤައުމުތަކުން ފަލަސްތީނުގެ މިނިވަންކަމާއި އިސްތިޤްލާލަށް ޓަކައި މަސައްކަތް ނުކުރާ ކަމަށް އެމަނިކުފާނު ވިދާޅުވިއެވެ. އެހެންކަމުން ވަރުގަދަ އަސްކަރިއްޔާތަކުގެ ބޭނުމަކީ ކޮބާތޯ އެމަނިކުފާނު ވަނީ ސުވާލު އުފައްދަވާފައެވެ.
