ރިޔާސީ އިންތިޚާބުގައި ފާރިސް ވާދަ ކުރައްވަނީ އަމިއްލަގޮތުން
6 އޯގަސްޓު 2023 | އާދީއްތަ 13:31ފާރިސް މިހެން ވިދާޅުވީ ޓުވިޓަރގައި ހިއްސާކުރެއްވި ވީޑިއޯ މެސެޖެއްގައި
އެމްއާރުއެމްގެ ރައީސް އަހްމަދު ފާރިސް މައުމޫން
މިފަހަރުގެ ރިޔާސީ އިންތިޚާބުގައި ވާދަކުރައްވަނީ އަމިއްލަ ގޮތުން ކަމަށް އެމްއާރުއެމްގެ ރައީސް އަހްމަދު ފާރިސް މައުމޫން ވިދާޅުވެއްޖެއެވެ.
ފާރިސް މިހެން ވިދާޅުވީ ޓުވިޓަރގައި ހިއްސާކުރެއްވި ވީޑިއޯ މެސެޖެއްގައެވެ. އަމިއްލަ ގޮތުން އިންތިޚާބުގައި ވާދަކުރައްވާނެ ކަމަށް ވިދާޅުވިނަމަވެސް އެގޮތަށް ނިންމެވި ސަބަބު ފާރިސް ހާމައެއް ނުކުރައްވައެވެ.
ފާރިސް ވަނީ އަމިއްލަ ގޮތުން ރިޔާސީ އިންތިހާބުގައި ވާދަ ކުރެއްވުމަށް ޓަކައި ގާނޫނުގައި ބުނާ 1،500 މީހުންގެ ސޮއި ވެސް މިދިޔަ ހަފްތާގެ ތެރޭގައި ހަމަކޮށްފައެވެ.
ރިޔާސީ އިންތިޚާބުގައި އަމިއްލަ ގޮތުން ވާދަކުރައްވާނެކަން ފާރިސް ހާމަކުރައްވާފައި މިވަނީ އެމްއާރުއެމް އުވާލުމުގެ މައްސަލަ މިވަގުތު ކޯޓުގައި އޮތް ދަނޑިވަޅެއްގައެވެ.
އީސީން ވަނީ ޖޫން މަހުގެ ނިޔަލަށް ސިޔާސީ ޕާޓީތަކުގެ ދަފްތަރުގައި ތިބި މެންބަރުންގެ އަދަދު ހާމަކޮށްފައެވެ. މި ދަފްތަރުގައި ވާގޮތުން، ޖޫން މަހުގެ ނިޔަލަށް އެމްއާރްއެމްގައި ތިބީ 2،892 މެންބަރުންނެވެ. އެމްއާރްއެމްއަކީ މިވަގުތު އޮތް ސިޔާސީ ޕާޓީތަކުގެ ތެރެއިން 3،000 މެންބަރުން ހަމަނުވާ ހަމައެކަނި ޕާޓީއެވެ.
އެމްއާރުއެމް އަށް 3،000 މެންބަރުން ހަމަނުވުމުގެ މައްސަލައާ ކުރިމަތިވެފައިވާއިރު، އެ އަދަދު ހަމަނުވާކަން ބަޔާންކޮށް އީސީން ވަނީ އެމްއާރުއެމް އުވާލުމަށްވެސް ނިންމާފައެވެ. ނަމަވެސް އެމްއާރްއެމުން އެ މައްސަލަ ސިވިލް ކޯޓަށް ހުށަހެޅުމުން، އެ ޕާޓީ އުވާލުމުގެ އެއްވެސް ކަމެއް ނުކުރަން އީސީގެ މައްޗަށް އަމުރުކޮށްފައިވެއެވެ.
ނަމަވެސް އީސީން އާންމުކުރި މައުލޫމާތުގައި، އެމްއާރްއެމްގެ ގިނަ މެންބަރުން އުނިކޮށްފައިވާކަމަށްވެސް އެޕާޓީން ވަނީ ތުހުމަތުކޮށްފައެވެ.
އެމްއާރްއެމްއިން ނެރުނު ބަޔާނެއްގައި ބުނީ އެ ޕާޓީއާ ގުޅޭގޮތުން އީސީން އެކި ފަހަރުމަތިން ސައްހަ ނޫން މައުލޫމާތު އާންމުކުރަމުންދާތީ ކަންބޮޑުވާކަމަށެވެ. މިގޮތުން އީސީން އެންމެ ފަހުން އާންމުކުރި މައުލޫމާތުގައިވެސް އެ ޕާޓީގެ ގިނަ އަދަދެއްގެ މެންބަރުން އުނިކޮށްފައިވާކަމަށް އެމްއާރްއެމްއިން ބުނެފައިވެއެވެ.
