ފާރިސްވެސް ނިންމެވީ ވަކިކޮޅަކަށް ނޭރުއްވުމަށް

ކުރިއަށް އޮތް ރިޔާސީ އިންތިޚާބުގެ ދެވަނަ ބުރުގައި ވާދަކުރައްވާ ދެ ކެންޑިޑޭޓުންގެ ތެރެއިން އެއްވެސް ކެންޑިޑޭޓަކަށް ތާއީދު ނުކުރެއްވުމަށް، އިންތިޚާބުގެ ފުރަތަމަ ބުރުގައި އަމިއްލަގޮތުން ވާދަކުރެއްވި ފާރިސް މައުމޫނު ނިންމަވައިފިއެވެ.

ބުދަ ދުވަހު ނޫސްވެރިންނާ ބައްދަލު ކުރައްވައި ވާހަކަފުޅު ދައްކަވަމުން ފާރިސް ވިދާޅުވީ، ޤައުމަށް ގެންނަންޖެހޭ އިސްލާޙުތަކަކީ މުޅި ނިޒާމަށް ގެންނަންޖެހޭ އިސްލާޙުތަކެއް ކަމަށާއި، ފާރިސްގެ ފަރާތުން ނިންމަވާފައިވަނީ ދެވަނަ ބުރުގައި އެއްވެސް ޕާޓީއަކަށް ތާއީދު ނުކުރެއްވުމަށް ކަމަށެވެ.

ފާރިސް ވިދާޅުވީ، ސިޔާސީ ބޮޑު ޕާޓީއަކުން އަންނަ ކެނޑިޑޭޓަކަށް އެންމެ އެކަށީގެންވާ ގޮތެއްގައި ރައްޔިތުންގެ މަސްލަޙަތު އިސް ނުކުރެވިދާނެ ކަމަށެވެ.

އޭގެ އިތުރުން، މަޖިލީހުގައި އެބޭފުޅުންގެ ދައުރު އިތުރު ކުރުމަށް ކުރިއަށް އޮތް ތަނުގައި މަސައްކަތް ކުރުމަކީ އަމާޒެއްކަމަށް ފާރިސް ވިދާޅުވިއެވެ.

ޕާޓީތައް އުފެދި ހިނގަމުންދާ ގޮތުން، ޕާޓީތަކުން ރައްޔިތުންނާމެދު ހަމަހަމަ އުސޫލަކުން އަމަލުކުރަން ދަތިވާނެކަން ފާހަަގަ ކުރައްވައި ފާރިސް ވަނީ ދެ ކެންޑިޑޭޓުންނަށްވެސް ކާމިޔާބަށް އެދިވަޑައިގަންނަވާފައެވެ.

ކުރިއަށް އޮތް ރިޔާސީ އިންތިޚާބުގެ ދެވަނަ ބުރުގައި ވާދަކުރައްވާ ދެ ކެންޑިޑޭޓުންގެ ތެރެއިން އެއްވެސް ކެންޑިޑޭޓަކަށް ތާއީދު ނުކުރުމަށް ޖުމްހޫރީ ޕާޓީ (ޖޭޕީ) އިންވެސް ވަނީ ނިންމާފައެވެ.