ކޮޓީނިއޯ ރަސްމީކޮށް އެސްޓަން ވިލާއަށް

ލޯނު އުސޫލުގެ ދަށުން އެސްޓަން ވިލާއަށް ކުޅެމުން އަންނަ ބާސެލޯނާގެ ފިލިޕޭ ކޮޓީނިއޯ ރަސްމީކޮށް އެޓީމަށް ބަދަލުވާން އެއްބަސްވެއްޖެކަމަށް އިތުބާރުހުރި ކުޅިވަރު ނޫސްވެރިޔާ ފަބްރީޒިއޯ ރޮމާނޯ ބުނެފިއެވެ.

ކޮޓީނިއޯ މިހާރު އެސްޓަން ވިލާއަށް ކުޅެމުން އަންނަނީ ލޯނު އުސޫލުގެ ދަށުންނެވެ. ބާސެލޯނާއިން ކޮޓީނިއޯ އެސްޓަން ވިލާއަށް ދޫކުރީ މިދިޔަ ޖެނުއަރީ ޓްރާންސްފާގައެވެ. ނަމަވެސް ކުރިއަށް އޮތް ސަމަރ ޓްރާންސްފާގައި ޓީމަށް މުހިންމު ކުޅުންތެރިން ގަތުމަށްޓަކައި ބާސެލޯނާއިން އަންނަނީ ގިނަ ކުޅުންތެރިންތަކެއް ވިއްކާލުމަށް މަސައްކަތް ކުރަމުންނެވެ. މީގެ ތެރޭގައި ކޮޓީނިއޯވެސް ހިމެނެއެވެ. ބާސެލޯނާއާއެކު ކޮޓީނިއޯ ހަދާފައިވާ އެއްބަސްވުމުގެ މުއްދަތު ހަމަވާނީ 2023 ވަނަ އަހަރުގެ ޖޫން މަހުއެވެ.

ބާސެލޯނާއިން ކޮޓީނިއޯ ވިއްކާލުމަށް މަސައްކަތް ކުރަމުން ދިޔައިރު، އެސްޓަން ވިލާއިން ވަނީ ރަސްމީކޮށް ކޮޓީނިއޯ އެޓީމަށް ގެންދަން ބޭނުންވާކަން ހާމަކޮށްފައެވެ.

ފަބްރީޒިއޯ ކުރި ޕޯސްޓެއްގައި ބުނީ ކޮޓީނިއޯ އެސްޓަން ވިލާއަށް ދިއުމަށް ހުރިހާ އެއްބަސްވުންތަކެއް މިހާރު ހަދާފައިވާ ކަމަށެވެ. އަދި މިކަން ވަރަށް އަވަހަށް ރަސްމީކޮށް އަންގާނެ ކަމަށްވެސް އޭނާ ބުންޏެވެ. މި ޑިލާއެކު ބާސެލޯނާއަށް 20 މިލިއަން ޕައުންޑް ލިބޭނެއެވެ.

މިއަހަރުގެ ޖެނުއަރީ މަހު ލޯނު އުސޫލުން އެސްޓަން ވިލާއަށް ކޮޓީނިއޯ ކުޅެން ފެށި ފަހުން މިހާތަނަށް 15 މެޗު ކުޅެފައިވެއެވެ. އެ މެޗުތަކުގައި ކޮޓީނިއޯ ވަނީ ހަތަރު ލަނޑުޖަހާ ތިން ލަނޑު ޖެހުމަށް އެެހީތެރިވެދީފައެވެ. ބާސެލޯނާއަށް ކޮޓީނިއޯ ކުޅުނު 16 މެޗުގައި އޭނާއަށް ޖެހުނީ އެންމެ ދެލަނޑެވެ.