މުހިއްމު މޮޅަކާއެކު ޓީސީ ތިންވަނައަށް!

ދިރާގު ދިވެހި ޕްރިމިއަރ ލީގުގައި ސުޕަރ ޔުނައިޓެޑް ސްޕޯރޓްސް (ސަސް) އަތުން ހޯދި މުހިއްމު މޮޅާއެކު, ޓީސީން ތާވަލްގެ ތިންވަނައަށް ޖެހިލައިފިއެވެ. މެޗަށް ނުކުތްއިރު ޕޮއިންޓްގެ ގޮތުން އެއްވަރުވެފައި އޮތް ދެޓީމްގެ މެޗު ޓީސީން ކާމިޔާބުކުރީ 2-1ންނެވެ.

މެޗަށް ނުކުތްއިރު މިދެޓީމްގެ އިތުރުން ޔުނައިޓެޑް ވިކްޓްރީވެސް އޮތީ 14 ޕޮއިންޓްގައެވެ. އެކަމަކު މިމޮޅާއެކު ޓީސީ ވަނީ 17 ޕޮއިންޓާއެކު 3 ޕޮއިންޓްގެ ލީޑެއް ނަގާފައެވެ. ތާވަލްގައި ޓީސީ މިހާރު އޮތީ މާޒިޔާއާއި އީގަލްސްގެ ފަހަތުން ތިންވަނާގައެވެ.

މެޗުގައި ޓީސީގެ ފުރަތަމަ ލަނޑު 22 ވަނަ މިނިޓްގައި ޖެހީ އައިހަމްއެވެ. ނަމަވެސް ފުރަތަމަ ހާފް ނިމެން ތިން މިނިޓަށް ވެފައިވަނިކޮށް ޔަސްފާދު ހަބީބު ލަނޑު ޖަހައި ސަސްއަށް ނަތީޖާ ހަމަހަމަކޮށްދިނެވެ. ޓީސީން ދެވަނަ ފަހަރަށް ކުރި ހޯދީ 64 ވަނަ މިނިޓްގައި މުސްލިހު ކާމިޔާބުކުރި ލަނޑުންނެވެ.

ލީގުގައި އަންގާރަ ދުވަހުގެރޭ ވާދަކުރާނީ މާޒިޔާއާއި ކްލަބް ގްރީން ސްޓްރީޓްސްއެވެ. ބުދަ ދުވަހު ހަވީރު ވާދަކުރާނީ ވެލެންސިޔާއާއި ދަ ގްރާންޑޭއެވެ.