ތިން ޕޮއިންޓްގެ ލީޑަކާއެކު ސިޓީން ލީގު ދިފާއުކުރުމުގެ ފުރުޞަތު ބޮޑުކޮށްފި

މިހަފްތާގައި ލިވަޕޫލަށް މޮޅުނުވެވުމުގެ ފައިދާ ނަގާ, މެންޗެސްޓަރ ސިޓީން ނިއުކާސަލް ޔުނއިޓެޑް ބަލިކޮށް އިނގިރޭސި ޕްރިމިއަރ ލީގު ތާވަލްގެ އެއްވަނާގައި ތިން ޕޮއިންޓްގެ ލީޑެއް ނަގައިފިއެވެ. މިމޮޅާއެކު ސިޓީއަށް ކުރިއަށް އޮތް ތިން މެޗުން ލީގު ޔަޤީން ކުރަން ބޭނުންވަނީ ހަތް ޕޮއިންޓެވެ. ކޮންމެ ޓީމަކަށްވެސް ބާކީ އޮތީ 3 މެޗެވެ.

ރެއާލް މެޑްރިޑް އަތުން ސެމީފައިނަލް ދެވަނަ ލެގުގެ ފަހުވަގުތު ބަލިވެ, ޗެމްޕިއަންސްލީގުގެ ފައިނަލުގެ ފުރުޞަތު ގެއްލުނު ސިޓީއަށް ސީޒަންގައި އޮތީ ހަމައެކަނި ލީގު ދިފާއުކުރުމުގެ ފުރުޞަތެވެ. ނިއުކާސަލް އަތުން މޮޅުވުމުގެ އެފުރުޞަތު ވަނީ ބޮޑުވެފައެވެ. މެޗު ސިޓީން ކާމިޔާބުކުރީ 5-0 ނެވެ. މެޗުގައި ސިޓީގެ ފުރަތަމަ ލަނޑާއި ފަހު ލަނޑު ޖެހީ އިނގިރޭސި ފޯވާޑް ސްޓާލިންގއެވެ. ސިޓީގެ ދެވަނަ ލަނޑު ޖެހީ ލަޕޯޓްއެވެ. ތިންވަނަ ލަނޑު ރޮޑްރީގޯ ޖެހީ ކެވިން ޑި ބުރައިނާ ނަގައިދިން ކޯނަރު ބޮލުން ފޮނުވާލައިގެންނެވެ. ހަތަރުވަނަ ލަނޑު މެޗުގެ ފަހު މިނިޓްގައި ފޮޑެން ޖެހީ ގްރީލިޝްއާއި, ޒިންޗެންކޯ ގުޅިގެން ތަނަވަސްކޮށްދިން ފުރުޞަތެއްގައެވެ. މެޗުގައި ފޮޑެން ލަނޑު ޖަހަން ފުރުޞަތު ތަނަވަސްކޮށްދިނީވެސް ގްރީލިޝްއެވެ.

މިމޮޅާއެކު ސިޓީ އެއްވަނާގައި އޮތީ 35 މެޗުން 86 ޕޮއިންޓާއެކުއެވެ. ދެވަނާގައި ލިވަޕޫލް އޮތީ 83 ޕޮއިންޓްގައެވެ. ތިންވަނާގައި އޮތް ޗެލްސީއާއި ހަތަރުވަނާގައި އޮތް އާސެނަލްއާ ދެމެދު އޮތީ ޕޮއިންޓެއްގެ ފަރަޤެކެވެ. އަދި އާސެނަލްއާއި ފަސްވަނާގައި އޮތް ޓޮޓެންހަމްއާ ދެމެދު އޮތީ ހަތަރު ޕޮއިންޓްގެ ފަރަޤެކެވެ.