ސާޖީ ރޮބާޓޯ އާއި ބާސެލޯނާ އައު އެއްބަސްވުމަކަށް!
އައު އެއްބަސްވުން ހަދާފައިވަނީ މިހާރު ރޮބާޓޯއަށް ލިބެމުން އަންނަ މުސާރައިގެ 50 އިންސައްތަ ކުޑަ މުސާރައަކަށް
ބާސެލޯނާއަށް ކުޅެމުން އަންނަ ސާޖީ ރޮބާޓޯ
ސާޖީ ރޮބާޓޯއާއެކު ބާސެލޯނާއިން އައު އެއްބަސްވުމެއް ހަދައިފިކަމަށް ރިޕޯޓުތައް ބުނެފިއެވެ.
ރިޕޯޓުތައް ބުނާ ގޮތުން ދެފަރާތުގެ މެދުގައި އައު އެއްބަސްވުމެއް އެކުލަވާލުމަށްފަހު މިހާރު ކުރިއަށްދަނީ ކޮންޓްރެކްޓްގެ އެންމެ ކުދި ޑީޓެއިލްތައް ހިމެނުމުގެ މަސައްކަތެވެ. އަދި ވަރަށް އަވަހަށް ރަސްމީކޮށް މިކަން އިއުލާނުކޮށް އެއްބަސްވުމުގައި ސޮއި ކުރާނެ ކަމަށްވެސް ރިޕޯޓުތައް ބުނެއެވެ.
ރޮބާޓޯއާއެކު ބާސެލޯނާއިން މިހާރު ހަދާފައިވާ އެއްބަސްވުމުގެ މުއްދަތު ކުރިއަށް އޮތް ސަމަރ ޓްރާންސްފަރ މާކެޓަށް ހަމަވާނެއެވެ. އެހެންކަމުން ބާސެލޯނާއިން އަންނަނީ އޭނާގެ ކޮންޓްރެކްޓް އައުކުރުމުގެ މަސައްކަތް ކުރަމުންނެވެ. ބާސެލޯނާއާއެކު އަލަށް އެކުލަވާލާފައިވާ އެއްބަސްވުމުގެ މުއްދަތު ހަމަވާނީ މިއަންނަ އަހަރުގެ ޖޫން މަހުގެ ނިޔަލަށެވެ. މާލީ ހާލަތު ތަން ނުދިނުމުގެ ސަބަބުން ބާސެލޯނާއަށް މިފަހަރުގެ ޓްރާންސްފަރ މާކެޓުގައި ބޮޑު ޚަރަދެއް ކުރެވޭކަށް ނެތެވެ.
ބާސެލޯނާއާއެކު އައު އެއްބަސްވުން ހަދާފައިވަނީ މިހާރު ރޮބާޓޯއަށް ލިބެމުން އަންނަ މުސާރައިގެ 50 އިންސައްތަ ކުޑަ މުސާރައަކަށެވެ. މިހާރު އޭނާއަށް މުސާރައިގެ ގޮތުގައި އަހަރެއްގެ މައްޗަށް 8.8 މިލިއަން ޕައުންޑު ލިބެއެވެ. ވާދަވެރި އެތުލެޓިކޯ މެޑްރިޑުންވެސް ރޮބާޓޯ ހޯދުމަށް އަންނަނީ މަސައްްކަތް ކުރަމުންނެވެ. ނަމަވެސް އެހުށައެޅުންތައް ދޫކޮށްލުމަށްފަހު ރޮބާޓޯ މިވަނީ ބާސެލޯނާއާއެކު އައު އެއްބަސްވުމެއް އެކުލަވާލާފައެވެ.
