ކާބުލްގެ މިސްކިތެއްގައި ދިން ބޮމުގެ ހަމަލާއެއްގައި 60ށް ވުރެ ގިނަ މީހުން މަރުވެއްޖެ
މި ހަމަލާ ކުންވެރިކޮށް އެކަން ކުރި މީހުން ހޯދާ އަދަބުދޭނެ ކަމަށް ތާލިބާން ޖަމާއަތުން ވަނީ ބުނެފައި
އަފްޣާނިސްތާންގެ ވެރިރަށް ކާބުލްގެ ސުންނީ މިސްކިތެއްގައި ދިން ބޮމުގެ ހަމަލާގައި 66 މީހުން މަރުވެފައިވާކަމަށް ރިޕޯޓުތައް ބުނޭ
އަފްޣާނިސްތާންގެ ވެރިރަށް ކާބުލްގެ މިސްކިތެއްގައި ދިން ބޮމުގެ ހަމަލާއެއްގައި 60ށް ވުރެ ގިނަ މީހުން މަރުވެއްޖެއެވެ.
ރޮއިޓަރސްގައި ރިޕޯޓުކޮށްފައިވާގޮތުން މި އަހަރުގެ ރަމަޟާން މަހުގެ އެންމެ ފަހު ހުކުރު ދުވަހުގެ ހުކުރު ނަމާދަށް ޚަލިފާ ޝާހިބް މިސްކިތަށް މީހުން ގޮސްތިބި ވަގުތު އެމިސްކިތަށް ދިން މި ހަމަލާ އަކީ ސުންނީ މުސްލިމުންނަށް އަމާޒުކޮށް ދިން ހަމަލާއެކެވެ. އެގޮތުން މިހަމަލާއަކީ ހުކުރު ނަމާދުކޮށް ނިންމުމަށްފަހު ޒިކުރު ކުރަން މިސްކިތުގައި މަޑުކޮށްގެން ތިބި މީހުންގެ ތެރެއިން މީހަކަށްވެ ޖާނުން ފިދާވެގެން މީހަކު ދިން ހަމަލާއެއް ކަމަށް ބެލެވޭކަމަށް އެމިސްކިތުގެ އެންމެ އިސްފަރާތާ ހަވާލާދީ އެނޫހުން ރިޕޯޓުކޮށްފައިވެއެވެ.
މިރަމަޟާން މަހު އަފްޣާނިސްތާންގެ އެކި ހިސާބުތަކުގައި ވަނީ މިފަދަ އެތައް ހަމަލާތަކެއްދީފައެވެ. މިހަމަލާތަކުގައި ގިނަ އަދަދެއްގެ ބަޔަކަށް އެކިވަރުގެ އަނިޔާތައް ލިބިފައިވާއިރު، އެތައް ބައެެއްގެ ފުރާނަ ވަނީ ގެއްލިފައެވެ.
ސިއްހާ އޮފިޝަލަކާ ހަވާލާދީ ރޮއިޓަރސްގައި ރިޕޯޓުކޮށްފައިވާގޮތުން މިހަމަލާތަކުގައި 66 މީހަކު ވަނީ މަރުވެފައެވެ. އަދި 78 މީހުންނަށް އެކިވަރުގެ އަނިޔާ ލިބިގެން ހޮސްޕިޓަލަށް ގެންގޮސްފައިވާކަމަށް ވެއެވެ.
ކާބޫލްގެ އިމަރޖެންސީ ހޮސްޕިޓަލާ ހަވާލާދީ ރިޕޯޓުކޮށްފައިވާގޮތުން އެހޮސްޕިޓަލަށް ގެންދިޔަ އިރުވެސް 2 މީހަކު ވަނީ މަރުވެފައެވެ. އަދި އެކިވަރުގެ އަނިޔާލިބުނު 21 މީހުންނަށް އެހޮސްޕިޓަލުން ފަރުވާދެމުންދާކަމަށް ރިޕޯޓުކޮށްފައިވެއެވެ.
މީގެ އިތުރުން ކާބުލްގެ އެހެން ހޮސްޕިޓަލެއްގައި 49 މީހަކަށް ފަރުވާދެމުންދާ ކަމަށާއި އެ ހޮސްޕިޓަލަށް ގެންދިޔަ އިރު ފަސް މީހަކު މަރުވެފައިވާ ކަމަށް ރޮއިޓަރސް އިން ރިޕޯޓުކޮށްފައިވެއެވެ. މި ހޮސްޕިޓަލަށް ގެންދިޔަ މީހުންގެ ތެރެއިން 10 މީހުންގެ ހާލު ވަރަށް ސީރިއަސް ކަމަށާއި 20 މީހަކު ފިހިގެން ގެންދާމީހުން ބައިތިއްބާ ޔުނިޓްގައި އެޑްމިޓްކޮށްފައިވާ ކަމަށްވެއެވެ.
އދ އަދި އެމެރިކާއިން ވަނީ މިހަމަލާ ކުށްވެރިކޮށްފައެވެ. އދ އިން އަފްޣާނިސްތާނަށް ކަނޑައަޅާފައި ހުންނަ މިޝަނުން ވަނީ މިއީ މިފަހަކުން އަފްޣާނިސްތާންގައި ދެމުން އައި ބޮމުގެ ހަމަލާތަކާ ގުޅުންހުރި ހަމަލާއެއް ކަމަށާއި މިއީ އެގައުމުގެ މައިނޯރިޓީ ގުރޫޕްތަކަށް އަމާޒުކޮށް ދެމުންދާ ހަމަލާތަކެއް ކަމަށް ބުނެފައެވެ. އަދި ހުކުރު ދުވަގެ ހަމަލާ ދިން އިރު، އެ މިސްކިތުގައި އދ ގެ އޮފިޝަލުންތަކަކާ އެމީހުންގެ އާއިލާގެ މެމްބަރުންވެސް ތިބި ކަން ވަނީ ފާހަގަކޮށްފައެވެ.
އަފްޣާނިސްތާންގެ ސަރުކާރާ މިހާރު ހަވާލުވެފައިވާ ތާލިބާން ޖަމާއަތުގެ ތަރުޖަމާނަކު ވަނީ ހުކުރު ދުވަހުގެ މި ހަމަލާ ކުންވެރިކޮށް އެކަން ކުރި މީހުން ހޯދާ އަދަބުދޭނެ ކަމަށް ބުނެ ބަޔާނެއް ނެރެފައެވެ.
ހުކުރު ދުވަހުގެ މިހަމަލާ ދިން މީހުން އަދި ކަށަވަރުކުރެވިފައި ނުވާއިރު، މިމަހުގެ ތެރޭގައި އަފްޣާނިސްތާންގެ އެކި ހިސާބުތަކުގައި ދިން ބައެއް ހަމަލާތަކުގެ ޒިންމާ އިސްލާމިކް ސްޓޭޓުން ވަނީ ނަގާފައެވެ.
އަފްޣާނިސްތާންގެ އިމަރޖެންސީ ހޮސްޕިޓަލުން ވަނީ މި އޭޕްރިލް މަހު އެކަނިވެސް ކާބުލްގައި ދިން މިފަދަ ހަމަލާތަކުގެ ސަބަބުން 100ށް ވުރެ ގިނަ މީހުންނަށް ފަރުވާދިން ކަމަށް ބުނެފައެވެ.
ބުރާސްފަތި ދުވަހު ޝިއީ މުސްލިމުން ގޮވައިގެން ދަތުރުކުރަމުން ދިޔަ ދެ ވޭން އަކަށް ދިން ހަމަލާއެއްގައި ނުވަ މީހުން މަރުވެފައިވާއިރު، މިދިޔަ ހަފުތާގެ ހުކުރު ދުވަހު ކުންދޫޒް ސިޓީގެ ސުންނީ މިސްކިތަކަށް އަމާޒުކޮށް ދިން ހަމަލާގައި 33 މީހުން މަރުވެފައިވެއެވެ.
އަފްޣާނިސްތާންގައި މިހާރު ދެމުންދާ ބޮމުގެ ހަމަލާތަކުގެ ތެރެއިން ގިނަ ހަމަލާތައް ޝިއީ މުސްލިމުންނަށް އަމާޒުވި ނަމަވެސް ސުންނީ މުސްލިމުންނަށްވެސް ހަމަލާތައް ދަނީ އަމާޒުވަމުންނެވެ.
