އިނގިރޭސިވިލާތުގެ ޗެލްސީއަށް ކުޅެމުން އަންނަ ރޮމެލޫ ލުކާކޫ ހޯދުމުގެ މަސައްކަތް ބާސެލޯނާއިން ފަށައިފިއެވެ.
މީގެ ކުރިން ބާސެލޯނާއިން މަސައްކަތް ކުރަމުން އައީ ކުރިއަށް އޮތް ސަމަރ ޓްރާންސްފަރ މާކެޓުގައި، އާލިން ހާލަންޑް ނުވަތަ ރޮބަޓް ލެވަންޑޯސްކީ ހޯދުމަށެވެ. ނަމަވެސް ހާލަންޑް ހޯދުމުގެ ރޭހުގެ ކުރީގައި އުޅެނީ ވާދަވެރި ރެއާލް މެޑްރިޑާއި މެންޗެސްޓަރ ސިޓީއެވެ. އަނެއްކޮޅުން ބާސެލޯނާއިން ހޯދުމަށް މަސައްކަތް ކުރަމުން އައި ލެވަންޑޯސްކީވެސް އެޓީމަށް ލިބުމަކީ ދުރުކަމެކެވެ. ބެޔާންއިން މަސައްކަތްކުރަމުން އަންނަނީ ލެވަންޑޯސްކީއާއެކު އައު އެއްބަސްވުމެއް ހެދުމަށެވެ. އެއްބަސްވުމެއް ނުހެދިއްޖެނަމަ 2023 ވަނަ އަހަރު އޭނާގެ ކޮންޓްރެކްޓް ހަމަވަންދެން ޓީމުގައި ބެހެއްޓުމަށެވެ.
މިއާއެކު ބާސެލޯނާއިން ސްޓްރައިކަރެއް ހޯދުމަށް ކުރާ މަސައްކަތުގައި ވަނީ "ޕްލޭން ސީ"އެއް ގެންގުޅެން ޖެހިފައެވެ. މި ޕްލޭންއަކީ ލުކާކޫ ހޯދުމެވެ. ބާސެލޯނާގެ ސްޕޯޓިންގ ޑިޕާޓްމެންޓްގެ ފަރާތުން މެތިއު އަލެމަނީއާއި ޖޯޑީ ކްރައިފް މިހާރު ވަނީ ލުކާކޫގެ ރެޕްރެޒެންޓޭޓިވް ފެޑެރީކޯއާއި މަޝްވަރާކުރަން ފަށާފައެވެ.
މިހާރު ހާލަތު އޮތްގޮތުން ލުކާކޫ ޗެލްސީގައި މަޑުކުރާކަށް ބޭނުމެއް ނުވެއެވެ. ނަމަވެސް ބާސެލޯނާއިން ލުކާކޫ ހޯދުމަށް މިކުރާ މަސައްކަތް ފަސޭހައެއް ނުވާނެއެވެ. މީގެ އެއް އަހަރު ކުރިން ޗެލްސީއިން ލުކާކޫ ހޯދީ 115 މިލިއަން ޕައުންޑަށެވެ. މީގެ ތެރެއިން ބާކީ 92 މިލިއަން އަދި އޮތީ ނުދައްކައެވެ.
