އިންޑޮނޭޝިއާއިން ޕާމް އޮއިލް އެކްސްޕޯޓުކުރުން ހުއްޓާލުން؛ ދުނިޔޭގެ ބާޒާރުގައި ކައްކާ ތެލުގެ އަގު މައްޗަށް
30 އެޕްރީލު 2022 | ހޮނިހިރު 10:10އިންޑޮނޭޝިއާއިން މި ނިންމުން ނިންމާފައިވަނީ އެގައުމުގައި ތަކެތީގެ އަގު ދަށްކުރުމަށް
ޕާމް އޮއިލް އުފެއްދުން
އިންޑޮނޭޝިއާއިން ޕާމް އޮއިލް އެކްސްޕޯޓުކުރުން ހުއްޓާލަން ނިންމި ނިންމުމާއެކު ދުނިޔޭގެ ބާޒާރުގައި ވެޖިޓަބަލް އޮއިލްގެ އަގު ވަރަށް ބޮޑަށް އުފުލިއްޖެއެވެ.
މި ހަފްތާގެ ބުދަ ދުވަހު އިންޑޮނޭޝިއާއިން ނިންމި ނިންމުމާއެކު ޕާމް، ސޯއިބީން، ޔޫރަޕިއަން ރޭޕްސީޑް، ކެނޯލާ އޮއިލް ފަދަ، ކެއްކުމަށް ބޭނުންކުރާ އެކި ބާވަތުގެ ތެލުގެ އަގުތައް ވަނީ ވަރަށް ބޮޑަށް އުފުލިފައެވެ. މި އަގުތައް އިތުރަށް އުފުލިފައިމިވަނީ ރަޝިއާ-ޔޫކްރެއިން ހަނގުރާމައާ ގުޅިގެން މި ތަކެތީގެ އަގުތައް އުފުލިފައިވާ ދަނޑިވަޅެއްގައެވެ.
ފްރާންސްގެ ޕެރިސް ޑޯފީން ޔުނިވަރސިޓީގެ އިކޮނޮމިކްސް ޕްރޮފެސަރއެއް ކަމަށްވާ ފިލިޕް ވިދާޅުވީ، ދެކުނު އެމެރިކާއިން ސޮއިބީން ލިބުމުގައާއި، ކެނެޑާއިން ކެނޯލާ ލިބުމުގައި މިހާރުވެސް ދަތިތައް ކުރިމަތިވަމުންދާކަމަށެވެ. އެއަށްފަހު ޔޫކްރެއިނުން ސަންފްލާވަރ ލިބުމުގެ ދަތިކަން ކުރިމަތިވީކަމަށް އޭނާ ބުނެފައިވެއެވެ.
ޕާމް އޮއިލްއަކީ ކެއްކުމަށް ދުނިޔޭގެ އެންމެ ގިނަ ބަޔަކު ބޭނުންކުރާ އެކައްޗެވެ. އިންޑޮނޭޝިއާއިން އެކަނިވެސް ދުނިޔޭގެ 35 އިންސައްތަ ސަރަހައްދަށް ޕާމް އޮއިލް އެކްސްޕޯޓުކުރެއެވެ.
އިންޑޮނޭޝިއާއިން ޕާމް އޮއިލްގެ އެކްސްޕޯޓް ހުއްޓާލަން ނިންމާފައިވަނީ އެގައުމުގައި ތަކެތީގެ އަގު ދަށްކުރުމަށާއި، މިހާރު ދިމާވާ އެކި ދަތިތައް ހައްލުކުރުމަށެވެ. އެހެންނަމަވެސް އިންޑޮނޭޝިއާގެ މި ނިންމުމުގެ އެންމެ ނުރަނގަޅު އަސަރު ކުރަން ފަށާފައިވާކަމަށް ފިލިޕް ވިދާޅުވިއެވެ.
