ވީހާވެސް އަވަހަކަށް ހަނގުރާމަ ހުއްޓާލުން މުހިންމުކަމަށް އދ ގެ އެސްޖީ ވިދާޅުވެއްޖެ
ހަނގުރާމަ ހުއްޓާލުމަށްޓަކައި ކުރެވޭނެ ކަންތައްތައްތަކާ ގުޅޭގޮތުން މަޝްވަރާކުރެއްވި
އދ ގެ ސެކްރެޓަރީ ޖެނެރަލް އެންޓޯނިއޯ ގުޓަރެސް އަދި ރަޝިއާގެ ފޮރިން މިނިސްޓަރު ސެރްގެއި ލެވްރޯވް
ރަޝިއާ-ޔޫކްރެއިން ހަނގުރާމަ ވީހާވެސް އަވަހަކަށް ހުއްޓާލުމަށް އދ ގެ ސެކްރެޓަރީ ޖެނެރަލް އެންޓޯނިއޯ ގުޓަރެސް އެދިވަޑައިގެންފިއެވެ.
ގުޓަރެސް ވަނީ އަންގާރަ ދުވަހު ރަޝިއާއަށް ވަޑައިގެން އެގައުމުގެ ފޮރިން މިނިސްޓަރު ސެރްގެއި ލެވްރޯވްއާ ބައްދަލުކުރައްވާފައެވެ.
މިބައްދަލުކުރެއްވުމުގައި ދެބޭފުޅުން ވަނީ ހަނގުރާމައާގުޅޭ މަޝްވަރާތައް ކުރައްވާފައެވެ. އެގޮތުން ހަނގުރާމަ ހުއްޓާލުމަށްޓަކައި ކުރެވޭނެ ކަންތައްތައްތަކާ ގުޅޭގޮތުން މަޝްވަރާކުރައްވާފައިވެއެވެ. އަދި ހަނގުރާމަ ހުއްޓާލުމަށް ކުރެވެންހުރި ކަންތައްތައް ވީހާވެސް އަވަހަށް ކުރެއްވުމަށް ގުޓަރެސް ވަނީ އެދިވަޑައިގެންފައެވެ.
ރަޝިއާގެ ފޮރިން މިނިސްޓަރު ލެވްރޮވް ވަނީ، ސުލްހަ ގާއިމުކުރެވޭނެ ގޮތްތަކާމެދު މަޝްވަރާކުރުމަށް ރަޝިއާއިން ތައްޔާރަށް އޮތްކަމަށް ވިދާޅުވެފައެވެ.
ގުޓަރެސްގެ މިދަތުރުފުޅުގައި ރަޝިއާގެ ރައީސް ލެޑްމިއަރ ޕުޓިންއާވެސް ބައްދަލުކުރެއްވުމަށް ވަނީ ހަމަޖެހިފައެވެ. އެގޮތުން ޕުޓިންއާ ބައްދަލުކުރައްވައި، ހަނގުރާމަ ހުއްޓާލައި ސުލްހައިގެ މަޝްވަރާތައް ކުރިއަށްގެންދިއުމާ ގުޅޭގޮތުން ގުޓަރެސް ވާހަކަދައްކަވާނެ ކަމަށް އދ އިން ވަނީ ހާމަކޮށްއެވެ.
އދ ގެ ސެކްރެޓަރީ ޖެނެރަލް ރަޝިއާއަށް ކުރައްވާ ދަތުރުފުޅު ނިންމަވާލެއްވުމަށްފަހު ޔޫކްރެއިނަށް ވަޑައިތުމަށް ވަނީ ހަމަޖެހިފައެވެ. މިދަތުރުފުޅުގައި ޔޫކްރެއިންގެ ރައީސް ޒެލެންސްކީ، އަދި ފޮރިން މިނިސްޓަރު ޑިމިޓްރީ ކުލެބާއާ ގުޓަރެސް ބައްދަލުކުރައްވައި މަޝްވަރާކުރެއްވުމަށް ވަނީ ހަމަޖެހިފައެވެ.
