ވެކްސިން ދިނުމުގައި އިންޑޮނޭޝިއާއިން އިސްކަން ދޭނީ ޒުވާނުންނަށް

ކޮވިޑް-19 ގެ ވެކްސިން ދިނުމުގައި އިންޑޮނޭޝިއާއިން ޒުވާނުންނަށް އިސްކަންދޭން ނިންމައިފި އެވެ.

ދުނިޔޭގެ ގިނަ ގައުމުތަކާއި ހިލާފަށް އިންޑޮނޭޝިއާއިން ވެކްސިން ދިނުމުގައި އިސްކަންދޭނީ އުމުރުން 18 އަހަރާއި 59 އަހަރާއި ދެމެދު މީހުންނަށެވެ. އިންޑޮނޭޝިއާގެ ނޫސްތަކުން ރިޕޯޓްކޮށްފައިވަނީ އެގައުމުން ވެކްސިން ދިނުމުގައި އިސްކަން ދޭނީ އުމުރުން 18 އަހަރާއި 59 އަހަރާއި ދެމެދު މީހުންގެ ތެރެއިން ފްރޮންޓް ލައިން މަސައްކަތް ތެރިންނާއި، ހެލްތު ވޯކަރުން އަދި ސަލާމަތީ ބާރުތަކުގެ މަސައްކަތްތެރީންނަށެވެ.

އިންޑޮނޭޝިއާއަކީ ސައުތު އޭޝިއާގެ ގައުމުތަކުގެ ތެރެއިން ވެކްސިން އެންމެ ފުރަތަމަ ލިބޭނެ ކަމަށް ލަފާކުރެވޭ ގައުމެވެ.

ދުނިޔޭގެ ކުރިއަރާފައިވާ ގައުމުތަކަށް ބަލާލާއިރު އިނގިރޭސިވިލާތް، އެމެރިކާ އަދި ޖަރުމަނުވިލާތުން ވެކްސިން އާންމުނަށް ދޭން ފަށާފައިވާއިރު، ވެކްސިން ދިނުމުގައި މިގައުމުތަކުން އިސްކަން ދީފައިވަނީ އުމުރުން ދުވަސްވީ މީހުންނާއި، ފްރޮންޓްލައިން މަސައްކަތްތެރީންނަށެވެ. ސަބަބަކީ ކޮވިޑްގެ ނުރައްކާ ޒުވާނުންނަށްވުރެ، އުމުރުން ދުވަސްވީ މީހުނަށް ބޮޑުވީމައެވެ.

އިންޑޮނޭޝިއާގެ ސިއްހަތާއި ބެހޭ ވުޒާރާގެ އިސް އޮފިޝަލަކު ވިދާޅުވީ އެގައުމުން ޒުވާނުންނަށް ވެކްސިން ދިނުމަށް ނިންމީ ޒުވާނުންނަކީ ކުރިމަގު އޮތް ބަޔަކަށްވެފައި، އެގައުމުގެ އިގްތިސާދަށް ޒުވާނުންގެ ސަބަބުން ފައިދާވާނެތީ ކަމަށް ބަލާފައި ކަމަށެވެ.

އިންޑޮނޭޝިއާ ސަރުކާރުގެ އަމާޒަކީ 246 މިލިއަން ޑޯޒް ވެކްސިން އެގައުމަށް ހޯދުމެވެ. އެގޮތުން އެގައުމުން ވަނީ 155.5 މިލިއަން ޑޯޒް ވެކްސިން ސިނޮވެކް އިން ގަތުމަށް ނިންމާފައެވެ. އަދި 116 މިލިއަން ޑޯޒްގެ ވެކްސިން ފައިޒާ އަދި ކޮވެކްސް ފެސިލިޓީއިން ލިބޭނެ ކަމަށް އެގައުމުން ލަފާކުރެއެވެ.