މެއި 23ގައި އިންޑޮނޭޝިއާއިން އަލުން ޕާމް އޮއިލްގެ އެކްސްޕޯޓް ފަށަނީ

މެއި 23 ވަނަ ދުވަހު އިންޑޮނޭޝިއާއިން އަލުން ޕާމް އޮއިލް އެކްސްޕޯޓްކުރަން ފަށަަން ނިންމައިފިއެވެ.

އިންޑޮނޭޝިއާއިން އިއުލާނުކޮށްފައިވާ ޕާމް އެކްސްޕޯޓް ބޭން އުވާލަން ނިންމާފައިވާކަމަށް އިއުލާނުކުރައްވާފައި ވަނީ އެގައުމުގެ ރައީސް ޖޯކޯ ވިޑޯޑޯއެވެ.

އެގޮތުން ބުރާސްފަތި ދުވަހު ރައްޔިތުންނާ މުޚާތަބުކުރައްވައި ވާހަކަދައްކަަވަމުން ރައީސް ވަނީ، އެގައުމުގެ އެތެރޭގައި ކައްކާ ތެލުގެ އަގު ދަށަށް ދާން ފަށާފައިވާތީ، ހޯމަ ދުވަހުން ފެށިގެން ޕާމް އޮއިލް އެކްސްޕޯޓް ކުރުމުގެ ހުއްދަ ދޭން ނިންމަވާފައިވާކަމަށް ވިދާޅުވެފައެވެ.

މީގެ ކުރިން އިންޑޮނޭޝިއާގެ ރައީސް ވަނީ އެގައުމަށް މަހެއްގެ މައްޗަށް 194،000 ޓަނުގެ ކައްކާ ތެޔޮ ބޭނުންވާ ކަމަށް ވިދާޅުވެފައެވެ. އެގައުމުން ޕާމް އޮއިލް އެކްސްޕޯޓް ކުރުން މަނާކުރުމުގެ ކުރިން، މާޗް މަހު އެގައުމުގައި ކައްކާ ތެލުގެ ސަޕްލައި ހުރީ 64،500 ޓަނުގައެވެ. ނަމަވެސް އޭޕްރިލް މަހު އެގައުމުން ޕާމް އޮއިލް އެކްސްޕޯޓް ކުރުން މަނާކުރުމަށްފަހު އެގައުމުގެ ސަޕްލައި މިހާރު ވަނީ 211،000 ޓަނަށް އިތުރުވެފައެވެ.

ރައީސް ވިދާޅުވީ ޕާމް އޮއިލް އެކްސްޕޯޓްކުރުން މަނާކުރުމުގެ ކުރިން ކައްކާ ތެޔޮ ލީޓަރެއްގެ އަގު އުޅުނީ 1.35 ޑޮލަރަށް ކަމަށާއި، އެއީ ގާތްގަނޑަކަށް 19،800 އިންޑޮނޭޝިއަން ރުޕީސްކަމަށެވެ. މިހާރު ތެލުގެ އަގު މިވަނީ ލީޓަރެއް 17،600އާ 17،200އާ ދެމެދު އިންޑޮނޭޝިއަން ރުޕީސްއަށް ދަށްވެފައެވެ.

އެހެންކަމުން ޕާމް އޮއިލްގެ އެކްޕޯޓް ބޭން އުވާލައި، މެއި 23 ވަނަ ދުވަހުން ފެށިގެން ތެޔޮ އެކްސްޕޯޓް ކުރެވޭނެ ގޮތަށް ހެދުމަށް ނިންމާފައިވާކަމަށް ރައީސް ވިދާޅުވިއެވެ. މިގޮތަށް އެސްޕޯޓް ބޭން އުވާލިނަމަވެސް ކުރިއަށް އޮތްތާގައި ސަޕްލައިއަށް އަންނަ ބަދަލުތައް ސަރުކާރުން ގާތުން ބަލަމުންދާނެ ކަމަށް ރައީސް ވިދާޅުވިއެވެ.

އިންޑޮނޭޝިއާއަކީ ދުނިޔޭގެ ބާޒާރަށް އެންމެ ގިނައިން ތެޔޮ އެކްސްޕޯޓްކުރާ ގައުމެވެ. އެގައުމުން ޕާމް އޮއިލް އެކްސްޕޯޓްކުރުން މަނާކޮށްފައި ވަނީ އޭޕްރިލް 28 ވަނަ ދުވަހުއެވެ.