ސްވިޑްންއިން ނޭޓޯއާ ގުޅުމާމެދު ގޮތެއް ނިންމަން ރެފެރެންޑަމަކަށް ނުދާނަން: ބޮޑުވަޒީރު
28 އެޕްރީލު 2022 | ބުރާސްފަތި 15:28ބޮޑުވަޒީރު ވިދާޅުވީ، މިކަމަކީ ގައުމުގެ ސަލާމަތާ ވަރަށް ބޮޑަށް ގުޅިފައިވާ މައްސަލައެއްކަމަށް
ސްވިޑްންގެ ބޮޑުވަޒީރު މަގްޑަލޭނާ އެންޑަރސަން
ސްވިޑްންއިން ނޭޓޯއާ ގުޅުމާމެދު ގޮތަށް ނިންމަން ރިފެރެންޑަމަކަށް ނުދާނެ ކަމަށާއި، އެއީ ރިފެރެންޑަމަކަށް ދާންޖެހޭކަމެއް ނޫންކަމަށް އެގައުމުގެ ބޮޑުވަޒީރު މަގްޑަލޭނާ އެންޑަރސަން ވިދާޅުވެއްޖެއެވެ.
ރޮއިޓަރސްގައި ރިޕޯޓުކޮށްފައިވާގޮތުން، ބޮޑުވަޒީރު އެންޑަރސަން ވަނީ މިކަމާ ގުޅިގެން ރިފެރެންޑަމަކަށް ދިއުމަކީ ރަނގަޅު ވިސްނުމެއް ނޫންކަމަށް ވިދާޅުވެފައެވެ. އަދި މިއީ ރިފެރެންޑަމަކަށް ދިއުމަށް އެކަށީގެންވާ މައްސަލައެއް ނޫންކަމަށްވެސް އެކަމަނާ ވަނީ ވިދާޅުވެފައެވެ.
ބޮޑުވަޒީރު ވިދާޅުވީ މިކަމަކީ ގައުމުގެ ސަލާމަތާ ވަރަށް ބޮޑަށް ގުޅިފައިވާ މައްސަލައެއް ކަމަށާއި، މިކަމުގައި ސިއްރުކުރަންޖެހޭ ވަރަށް ބައިވަރު މައުލޫމާތު ހިމެނޭކަމަށެވެ. އެހެންކަމުން މިމައުލޫމާތުތައް ހާމަކޮށް ރިފެރެންޑަމަކަށް ނުދެވޭނެކަމަށް އެކަމަނާ ވަނީ ވިދާޅުވެފައެވެ.
ރަޝިއާ-ޔޫކްރެއިން ހަނގުރާމައާއެކު ސްވިޑްންއާއި ފިންލޭންޑުން ވަނީ ނޭޓޯއާ ގުޅުމުގެ މަޝްވަރާތައް ފަށާފައެވެ. އަދި މި ދެގައުމުންވެސް ވަރަށް އަވަހަށް ނޭޓޯއާ ގުޅުމާ ގުޅޭގޮތުން ގޮތެއް ނިންމާނެކަމަށް ރިޕޯޓުތައް ބުނެއެވެ.
ސްވިޑްންގެ މަޖިލީހުން މިހާރު ދަނީ އެގައުމުން ނޭޓޯއާ ގުޅުމުގެ މަޝްވަރާތައް ކުރަމުންނެވެ. މިކަމަށް މަޖިލީހުގެ ބޮޑު ތާއީދެއް އެބައޮތް ކަމަށް ރިޕޯޓުތައް ބުނެއެވެ.
