ރަނިލްގެ އިތުބާރު ނެތްކަމުގެ މައްސަލަ: އެސްއެލްއެފްޕީގެ ހުރިހާ މެމްބަރުން އެއްގޮތެއްގައި ތިބުމަށް ރައީސް އެދިިވަޑައިގެންފި
4 އެޕްރީލު 2018 | ބުދަ 05:59އެސްއެލްއެފްޕީގެ ނިންމުން ބުދަ ދުވަހުގެ ހެނދުނު އިއުލާނު ކުރާނެ
ބޮޑުވަޒީރު ރަނިލްގެ އިތުބާރު ނެތް ކަމުގެ މައްސަލަ ތާވަލުކޮށްފައި ވަނީ ބުދަ ދުވަހަށް
ސްރީލަންކާގެ ބޮޑުވަޒީރު ރަނިލް ވިކްރަމަ ސިންހަގެ އިތުބާރުނެތްކަމުގެ ވޯޓްގެ މައްސަލައިގައި، ސްރީލަންކާ ފްރީޑަމް ޕާޓީ (އެސްއެލްފްޕީ)ގެ ހުރިހާ މަޖިލިސް މެމްބަރުން އެއްގޮތެއް ޚިޔާރުކުރެއްވުމަށް ރައީސް މައިތިރިޕާލާ ސިރިސެނާ އެދިވަޑައިގެންނެވި ކަމަށް އެ ގައުމުގެ ވޮކޭޝަނަލް ޓްރެއިނިނިގް މިނިސްޓަރ ޗަންދިމާ ވީރަކޮޑީ އަންގާރަ ދުވަހު ވިދާޅުވެއްޖެއެވެ.
ރައީސް މައިތިރިޕާލާ ސިރިސޭނާ ވަނީ އެސްއެލްފްޕީއަށް ނިސްބަތްވެ ވަޑައިގަންނަވާ ވަޒީރުންނާ އެކު ދަންވަރު ބައްދަލުވުމެއް ބާއްވަވައި މި މައްސަލައިގައި މަޝްވަރާ ކުރައްވާފައެވެ.
ޑެއިލީ މިރަރގައި ވީރަކޮޑީ ވިދާޅުވެފައި ވަނީ ފިޝަރީޒް މިނިސްޓަރ މަހިންދަ އަމަރަވީރަގެ ގެކޮޅުގައި ބާއްވާ ބައްދަލުވުމަކަށް ފަހު އެސްއެލްއެފްޕީގެ ނިންމުން ބުދަ ދުވަހުގެ ހެނދުނު އިއުލާނު ކުރައްވާނެ ކަމަށެވެ.
"ރައީސް މެމްބަރުންގެ ގާތުގައި ވިދާޅުވީ ވަކިވަކި މެމްބަރުންގެ ނިންމުމެއްގެ ބަދަލުގައި ޕާޓީއެއްގެ ގޮތުގައި ނިންމުން ނިންމުމަށް" އޭނާ ވިދާޅުވިއެވެ.
ބުދަ ދުވަހު ނެގުމަށް ނިންމާފައިވާ އިތުބާރު ނެތްކަމުގެ ވޯޓް ނެގުމުގެ ކުރިން ބޮޑުވަޒީރު ރަނިލް ވިކްރަމަ ސިންހަ އިސްތިއުފާ ދެއްވުމަށް ދެންނެވުމަށް އެސްއެލްއެފްޕީ ޕާޓީގެ ޕާލިމެންޓްރީ ގްރޫޕްގެ އިއްތިފާގުން ހޯމަ ދުވަހު ހަވީރު ވަނީ ނިންމާފައެވެ.
ސްޓޭޓް މިނިސްޓަރ ލަކްޝްމަން ޔަޕާ އަބޭވަރްދަނަ ވިދާޅުވެފައި ވަނީ ރަނިލް އިސްތިއުފާ ދެއްވުމަށް ދެކޮޅު ހައްދަވައިފި ނަަމަ އެސްއެލްއެފްޕީގެ ޕާލިމެންޓްރީ ގްރޫޕް އެކުގައި ރަނިލްއާ ދެކޮޅަށް ވޯޓްދޭނެ ކަމަށެވެ.
އޭނާ ވިދާޅުވީ ރައީސް އާއި ސަރުކާރު އިތުރު ދަތިކަމަކަށް ގެންދިއުމަށް ވުރެ ބޮޑުވަޒީރު ރަނިލްއަށް ރަގަޅުވާނީ އިސްތިއުފާ ދެއްވުން ކަމަށެވެ.
