މުގާބޭ މަގާމުން ވަކިވުމާމެދު ގޮތެއް ނިންމުމަށް އަސްކަރިއްޔާގެ ވެރިޔާ މުގާބޭއާ ބައްދަލުކުރަނީ
އިދިކޮޅު ފަރާތްތަކުން ވެސް ވަނީ އަސްކަރީ ވެރިކަމަކަށް ޖާގަ ނުދިނުމަށް ގޮވާލާފައި
ޒަނޫ ޕީއެފް ޕާޓީން މިހާރު ގެންދަނީ މުގާބޭ ވަކިކުރުމަށް މަޝްވަރާ ކުރަމުން
އިސްތިއުފާ ދެއްވުމަށް އަންނަމުންދާ ފިއްތުންތަކާއެކު ޒިމްބާބްވޭގެ ރައީސް ރޮބަރޓް މުގާބޭ އަސްކަރިއްޔާގެ ވެރިޔާއާ ބައްދަލު ކުރެއްވުމަށް ހަމަޖެހިއްޖެއެވެ.
ވާހަކަތަކުގެ މެދުވެރިއެއްގެ ދައުރު އަދާކުރައްވާނީ ނަސޯރާ ފާދިރީއެއް ކަމަށް ދައުލަތުގެ ޓީވީއިންވަނީ ބުނެފައެވެ.
މިދިޔަ ބުދަ ދުވަހު އަސްކަރިއްޔާގެ ކޮންޓްރޯލްގެ ދަށަށް ގައުމު ގެންދެވުނީއްސުރެ މުގާބޭ ހުންނެވީ ގޭބަންދުގައެވެ.
ވެރިކަންކުރާ ޒަނޫޕީއެފް ޕާޓީން ވެސް މިހާރު ގެންދަނީ މުގާބޭ ވެރިކަމުން ދުރުކުރާނީތޯ ބެލުމަށް ޕާޓީގެ ތެރޭގައި ފުޅާ ދާއިރާއެއްގައި މަޝްވަރާ ކުރަމުންނެވެ.
ވެރިކަންކުރާ ޒަނޫ ޕީއެފް ޕާޓީގެ 10 ގޮފީގެ ތެރެއިން މަދުވެގެން އަށް ގޮތްޕަކުން ހުކުރު ދުވަހު ވަނީ މުގާބޭ ރައީސްކަމުގެމަގާމުންނާއި ޕާޓީގެ ސެކްރެޓަރީގެ މަގާމުން އިސްތިއުފާ ދެއްވުމަށް ގޮވާލާފައެވެ.
އާއްމުކޮށް ނުފެންނަ ފަދަ ގޮތަކަށް ބްރޯޑްކާސްޓްކޮށްފައިވާ މި ބައްދަލުވުމުގައި އެތައް ސަރަހައްދެއްގެ ލީޑަރުން ދައުލަތުގެ ޓީވީގައިވަނީ މުގާބޭ އިސްތިއުފާދެއްވަން ޖެހިވަޑައިގަންނަވާނެކަމަށް ވިދާޅުވެފައެވެ.
މީގެއިތުރުން އެ ލީޑަރުން ވަނީ މުގާބޭގެ އަނބިކަނބަލުން ގްރޭސް މުގާބޭ ޕާޓީން އިސްތިއުފާދެއްވައި ޕާޓީގެ ސެންޓްރަލް ކޮމިޓީއަށް ދާދިފަހުން ނައިބް ރައީސްކަމުގެ މަގާމުން ވަކިކުރެއްވި އެމަސަން ނަންގަގްވާ ހަމަޖެއްސެވުމަށް ގޮވާލައްވާފައެވެ. ނަންގަގްވާ ކުރިން ހުންނެވީ އެ މަގާމުގައެވެ.
ޒިމްބާބުވޭގެ މިނިވަން ކަމަށް ހަނގުރާމަކުރި ކުރީގެ ސިފައިންގެ ތެރެއިން މިދިޔަ އަހަރާ ހަމައަށް މުގާބޭއަށް ވަފާތެރިކަންމަތީ ތިބި ސިފައިން ވެސް ގެންދަވަނީ މުގާބޭ އިސްތިއުފާ ދެއްވަން ޖެހިވަޑައިގަންނަވާނެކަމަށް ވިދާޅުވަމުންނެވެ.
