ފްރާންސްގެ ގަދަބާރު ޕީއެސްޖީން ކުޅުންތެރިންތަކެއް ދޫކޮށްލުމުގެ މަސައްކަތް ފަށައިފިއެވެ.

މި ސީޒަންގައި ޕީއެސްޖީން ފްރާންސް ލީގު ކާމިޔާބުކުރި ނަމަވެސް ޓީމުގެ އަމާޒަކަށްވެފައިވަނީ ޗެމްޕިއަންސް ލީގު ހޯދުމެވެ. އެކަމަކު މުބާރާތުގެ ކުއާޓާ ފައިނަލުގައި ރެއާލް މެޑްރިޑް އަތުން ބަލިވެ ޕީއެސްޖީއަށް މުބާރާތް ގެއްލުނީއެވެ. އެހެންކަމުން ޓީމުން އަމާޒު ހިފާފައި ހުރީ މުހިންމު ބަދަލުތައް ގެނެސް، އަންނަ ސީޒަންގައި ޗެމްޕިއަންސް ލީގު ކާމިޔާބު ކުރުމަށެވެ. އެގޮތުން އަންނަ ސީޒަންގައި ޓީމަށް މުހިންމު ނޫން ކުޅުންތެރިން ދޫކޮށްލުމުގެ މަސައްކަތް މިހާރު ޕީއެސްޖީން ވަނީ ފަށާފައެވެ. މީގެ ތެރޭގައި ހިމެނެނީ އެންހެލް ޑިމާރިއާ، ތިލޯ ކޭރަރ، ލެންޑްރޯ ޕަރޭޑީސް، ހޫލިއަން ޑްރެކްސެލާ އަދި ލޭވިން ކުރްޒާވާއެވެ.

ކުރިއަށް އޮތް ސަމަރ ޓްރާންސްފަރ މާކެޓުގައި ޕީއެސްޖީ ދޫކޮށްލާނެކަން އެންމެ ޔަގީންވާ ކުޅުންތެރިއަކީ ޑިމާރިއާއެވެ. ޑިމާރިއާއާއެކު ޕީއެސްޖީން ހަދާފައިވާ އެއްބަސްވުމުގެ މުއްދަތު މި ސީޒަންގެ ނިޔަލަށް ހަމަވާނެއެވެ. ފްރީ ޓްރާންސްފަރއެއްގައި އެހެން ކްލަބަކަށް ބަދަލުވުމުގެ ފުރުސަތު އޮތް ޑިމާރިއާ ބަދަލުވާނެކަމަށް ބެލެވެނީ ބާސެލޯނާ ނުވަތަ އެތުލެޓިކޯ މެޑްރިޑަށް ކަމަށް ރިޕޯޓުތައް ލަފާކުރެއެވެ.

މިއީ މީގެ ކުރިން ރެއާލް މެޑްރިޑަށް ކުޅުނު 34 އަހަރުގެ ޑިމާރިއާއަށް ބޮޑު ޓީމަކަށް ކުޅުމުގެ ފުރުސަތު ލިބޭނެ ފަހު ފަހަރުކަން އޭނާއަށްވެސް ގަބޫލު ކުރެވެއެވެ. ކުޑަ މުސާރައަކަށް ފްރީ ޓްރާންސްފަރއެއްގައި ޑިމާރިއާ ލިބެން އޮތުމަކީ ތަޖުރިބާކަަރު ކުޅުންތެރިއާ ހޯދުމަށް ބޮޑެތި ކްލަބުތަކުން އެންމެ ޝައުގުވެރިވާ ސަބަބެވެ.

ޑްރެކްސްލާގެ ހާލަތު ޑިމާރިއާ އާއި މުޅިން ތަފާތެވެ. އޭނާ ޕީއެސްޖީ އާއި ގުޅުނީ ވަރުގަދަ ސްޓާރެއްގެ ގޮތުގައެވެ. ނަމަވެސް މި ފަހަކަށް އައިސް އޭނާގެ ބޭނުން ޕީއެސްޖީން މާބޮޑަށް ހިފާފައެއް ނުވެއެވެ.

ޕީއެސްޖީން ޑްރެކްސެލާ ދޫކޮށްލުމަށް މަސައްކަތް ކުރަމުން އަންނައިރު، ޖަރުމަނުގެ ބައެއް ކްލަބުތަކުން އަންނަނީ އޭނާއަށް ޝައުގުވެރިކަން ފާޅު ކުރަމުންނެވެ. ނަމަވެސް ރިޕޯޓުތައް ބުނާ ގޮތުން އޭނާ އެންމެ ގުޅުން ގާތީ ސެވިއްޔާއާއެވެ.

މިއީ މިފަހަރުގެ ޓްރާންސްފަރ މާކެޓުގައި ޕީއެސްޖީން ދޫކޮށްލުމަށް މަސައްކަތްކުރާ އެންމެ ތަފާތު ހާލަތުގައި ހުރި ކުޅުންތެރިޔާއެވެ. މި ސީޒަންގެ އެންމެ މުހިންމު މެޗުތަކުގައިވެސް ކޯޗު މައުރީސިއޯ ޕޮޗެޓީނޯ ވަނީ އޭނާއަށް ބަރޯސާވެފައެވެ. މީގެ ތިން އަހަރު ކުރިން، އޭނާ ހޯދުމަށްޓަކައި ޕީއެސްޖީން 40 މިލިއަން ޕައުންޑު ޚަރަދު ކުރިއެވެ. ނަމަވެސް މިއަންނަ ސީޒަންގެ ޕީއެސްޖީ ޕްލޭނުގައި އޭނާ ނުހިމެނޭނެކަމަށް ރިޕޯޓުތައް ބުނެއެވެ.

ރިޕޯޓުތައް ބުނާ ގޮތުން ޕަރޭޑީސްއަކީ ޓީމުގެ މުހިންމު ތަރިން ކަމުގައިވާ ލިއޮނެލް މެސީ އާއި ނޭމާގެ ޕްރައިވެޓް ސާކަލްގެ ތެރޭގައި ހިމެނޭ ކުޅުންތެރިއެކެވެ. ނަމަވެސް މިއަންނަ ސީޒަންގައި އޭނާ ފެނުން އެންމެ ގާތީ އިޓާލިއަން ލީގުންކަމަށް ރިޕޯޓުތައް ލަފާކުރެއެވެ.

ޕީއެސްޖީން ކުރްޒާވާ ހޯދީ އޭނާ ގެނައުމަށްޓަކައި އެތަށް ފަހަރެއްގެ މަތީން މަސައްކަތްކޮށް ނާކާމިޔާބުވީ ފަހުންނެވެ. ޓީމުގެ ފަހަތަށް ކުޅެމުން އަންނަ ކުރްޒާވާ ވަނީ އަނިޔާގެ ސަބަބުން ބެންޗުގައި ގިނަ ދުވަހު މަޑުކުރަން ޖެހިފައެވެ. އެހެންކަމުން އޭނާ ވިއްކާލުމަކީ އެހާ ފަސޭހަ ކަމަކަށް ނުވާނެއެވެ.

ކުރްޒާވާއާއެކު ޕީއެސްޖީން ހަދާފައިވާ އެއްބަސްވުމުގެ މުއްދަތު ހަމަވާން ބާކީ ދެއަހަރު އެބައޮތެވެ. އެހެންކަމުން އޭނާ ދޫކޮށްލުމަށްޓަކައި ޓީމުން ބޮޑު ޚަރަދެއް އަދި މަސައްކަތެއްވެސް ކުރަން ޖެހޭނެއެވެ.