މޭރީއަށް އެއްވެސް ގޮތަކަށް ޖިސްމާނީ އަނިޔާއެއް ކޮށްފައި ނުވާނެ: މާވިން

އައިޖީއެމްއެޗްގައި މަސައްކަތް ކުރަމުން ދިޔަ ފިލިޕީންސްގެ އަންހެން ނަރުހެއް ކަމަށްވާ މޭރީ ގްރޭސްގެ މަރުގެ މައްސަލައިގައި އޭނާގެ ފިރިމީހާ މާވިން އެސްވައި ވާރގަސްގެ މައްޗަށް އުފުލާފައިވާ ދައުވާގެ އިބްތިދާއީ އަޑުއެހުމެއް އަންގާރަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

މި އަޑުއެހުމަކީ މާވިންގެ މައްޗަށް ކުރާ ދައުވާ އިއްވުމާއި ޖަވާބުދާރީވުމަށް ބޭއްވި އަޑުއެހުމެކެވެ. އެގޮތުން ދައުލަތުން މާވިންގެ މައްޗަށް ކުރާ ދައުވާއަކީ އެނގިހުރެ މީހަކު މެރުމުގެ ކުށުގެ ދައުވާއެވެ. ދައުލަތުން ދައުވާ އިއްވަމުން ބުނެފައިވާ ގޮތުގައި މި ކުށުގެ އަސާސީ އަދަބަކީ 10 އަހަރަށް ޖަލަށް ލުމެވެ. އެހެންނަމަވެސް، މާވިން އިއުތިރާފުވެއްޖެނަމަ، ކުށުގެ އަސާސީ އަދަބު 1 ދަރަޖަ ދަށްކޮށް، އަންނާނެ އަދަބަކީ 7 އަހަރާއި 6 މަސްކަމަަށް ދައުލަތުގެ ވަކީލު ވިދާޅުވިއެވެ.

މި މައްސަލައިގައި މާވިންގެ މައްޗަށް އެނގިހުރެ މީހަކު މެރުމުގެ ކުށުގެ ދައުވާ އުފުލާފައިވާއިރު، ސަބަބެއްގެ ގޮތުން ޕީޖީ އޮފީހުން ބުނީ، މާވިން 19 އޮކްޓޫބަރު 2021 ދުވަހުގެ 12:00 އާއި 12:49 އާ ދެމެދުގެ ވަގުތެއްގައި، އޭނާ ދިރިއުޅޭ މއ.އުދުހޭކޮކާގޭގެ ފުރަތަމަ ފަންގިފިލާގެ ތެރޭގައި އޭނާގެ އަންހެނުން، ފިލިޕީންސްގެ ރައްޔިތެއްކަމަށްވާ މޭރީ ގްރޭސް އޮނެޑް ޕިނެޑާގެ ބޮލާއި ކަރަށް ހަމަލާދީގެންނާއި، ނޭވާ ހާސްކޮށްގެން މަރާލާފައިވާ ކަމަށެވެ.

ދައުލަތުން ބުނާ ގޮތުގައި މޭރީއަކީ އިސްލާމީ ދައުލަތެއްގެ ބެލުމުގެ ދަށުގައި ހުރި މީހެއްކަމަށްވުމާއެކު، މި ދައުވާ ސާބިތުވެއްޖެނަމަ، މަރުގެ އަދަބުވެސް ދެވިދާނެއެވެ. މޭރީގެ އާއިލާއިން އެދޭނަމަ މާވިންގެ ކިބައިން ޤިސާސް ހިފިދާނެކަމަށް ދައުލަތުން ދެކެއެވެ.

މި ދައުވާތަކަށް ޖަވާބުދާރީވުމަށް ފުރުސަތު ދިނުމުން މާވިންގެ ވަކީލު ވަނީ މާވިން މޭރީގެ ބޮލަށާއި، ކަރަށް ޙަމަލާދީ އަދި އެއަށްފަހު ނޭވާ ހާސްކޮށްލައިގެން މަރާލާފައިވާކަމަށް ދައުލަތުން ކުރާ ދައުވާގައި ބުނާއިރު، އޭނާ މޭރީގެ ބޮލަށް ޙަމަލާ ދިނީ ކިހިނެއްތޯއާއި، ކޮން އެއްޗެއް ބޭނުންކޮށްގެންތޯ ސުވާލު ކޮށްފައެވެ.

އެކަމާ ގުޅިގެން ދައުލަތުގެ ވަކީލު ވިދާޅުވީ، މޭރީގެ ބޮލަށާއި ކަރަށް ޙަމަލާ ދީފައިވާކަން އޭނާގެ އޮޓޮޕްސީ ރިޕޯޓުން އެނގޭ ކަމަށެވެ. ހަމަ އެއާއެކު، އެ ދުވަހު އެތަނުގައި ހުރީ މާވިން އެކަނިކަމަށް އޭނާ ތަހުގީގުގައި ބުނެފައިވުމާއި، އޭނާގެ ސާރޗް ހިސްޓަރީގައި "ހައު ޓު ނޮކް ސަމްވަން އައުޓް" އޭ ލިޔެ ސަރޗް ކޮށްފައިވާކަން އެނގެން އޮތުމުން، އެ ކަންކަން ދައުލަތުން ވަނީ ގުޅުވާލާފައެވެ.

ދައުލަތުން ދައުވާ އިއްވުމުން ދިފާއުން ވަނީ ދައުވާއަށް މުތުލަޤުކޮށް އިންކާރު ކޮށްފައެވެ. ދިފާއުން ބުނާ ގޮތުގައި މާވިން އެއްވެސް އިރެއްގައި، ގަސްތުގައިވެސް އަދި ގަސްތެއް ނެތިވެސް މޭރީއަށް އެއްވެސް ބާވަތެއްގެ ޖިސްމާނީ އަނިޔާއެއް ކޮށްފައެއް ނުވާނެއެވެ.

މި މައްސަލައިގައި ދައުވާ އިއްވައި، ދައުވާއަށް ޖަވާބުދާރީވެފައިވުމާއެކު، ދެން އޮންނަ އަޑުއެހުމެއްގައި އޮންނާނީ ދެފަރާތުން ހެކި ހާމަ ކުރުމެވެ. މައްސަލަ ބައްލަވާ ގާޒީ ހުސައިން ފާއިޒު ރަޝާދު ވަނީ އަންނަ މެއި މަހުގެ 10 ވަނަ ދުވަހު އަޑުއެހުމެއް ބޭއްވުމަށް ނިންމަވާފައެވެ.

އޭގެ އިތުރުން، ދިފާއުން ކުރި ސުވާލަކާއި ގުޅިގެން ގާޒީ ފާއިޒު ވިދާޅުވީ، މި މައްސަލައިގައި ދައުވާ އުފުލާފައިވާ ޙަލީމަތު ލަމްހާއާއި މާވިންގެ ބައި ވަކިން ކުރިއަށް ގެންދަވަނީ މިއީ އިބްތިދާއީ މަރުޙަލާކަމަށްވެފައި، ޝަރީއަތް ވީހާވެސް އަވަސް ކުރުމުގެ ގޮތުންނެވެ. އެހެންނަމަވެސް، ޝަރީއަތުގެ މަރުޙަލާ ފެށުމުން އެ ދެމީހުންގެ ބައިވެސް އެކުއެކީގައި ކުރިއަށް ގެންދަވާނެކަން ގާޒީ ފާހަގަ ކުރެއްވިއެވެ.