ލީގުގައި ބާކީ ހަތަރު މެޗު ނުކުޅެ އޮއްވާ ޕީއެސްޖީން ފްރާންސް ލީގު ކާމިޔާބުކޮށްފިއެވެ.

ޕީއެސްޖީއަށް މުބާރާތް ޔަގީންވީ ހޮނިހިރު ދުވަހުގެރޭ ލެންސްއާއި ބައްދަލުކުރި މެޗު އެއްވަރު ކޮށްގެންނެވެ. ޕީއެސްޖީގެ އަމިއްލަ ދަނޑުގައި ލެންސް އާއި ބައްދަލުކުރި މެޗު ނިމުނީ ކޮންމެ ޓީމަކުންވެސް ލަނޑެއް ޖަހާ އެއްވަރު ކޮށްގެންނެވެ. މެޗުގައި ފުރަތަމަ ލަނޑުޖަހާ ލީޑު ނެގީ ޕީއެސްޖީންނެވެ. ދެވަނަ ހާފުގެ 68 ވަނަ މިނެޓުގައި ޕީއެސްޖީއަށް ލަނޑު ޖަހައިދިނީ ލިއޮނެލް މެސީއެވެ. ނަމަވެސް ލެންސްގެ ޖީން ވަނީ މެޗު ނިމެން ދެމިނެޓަށްވެފައި ވަނިކޮށް ލަނޑެއް ޖަހާ ނަތީޖާ ހަމަހަމަ ކޮށްފައެވެ. ލެންސްގެ ޑަންސޯއަށް ރަތް ކާޑޫ ދެއްކުމުން ދެވަނަ ހާފުގެ 57 ވަނަ މިނެޓުން ފެށިގެން އެޓީމު ކުޅުނީ 10 ކުޅުންތެރިންނާއެކުއެވެ.

މިއީ ޕީއެސްޖީން ފްރާންސް ލީގު ކާމިޔާބުކުރި 10 ވަނަ ފަހަރެވެ. މިއާއެކު ޕީއެސްޖީން ވަނީ ފްރާންސް ލީގު އެންމެ ގިނަ ފަހަރު ކާމިޔާބުކޮށް ރެކޯޑު ހަދާފައިވާ ސެއިން އެޓިއެންގެ ރެކޯޑާއި އަރާ ހަމަކޮށްފައެވެ. އެޓީމުންވެސް ވަނީ 10 ފަހަރަށް މުބާރާތް ކާމިޔާބުކޮށްފައެވެ. މިއީ ޕީއެސްޖީން ފާއިތުވި 10 އަހަރުގެ ތެރޭގައި ލީގު ކާމިޔާބުކުރި އަށްވަނަ ފަހަރެވެ. މުބާރާތް ކާމިޔާބުކުރިއިރު ޕީއެސްޖީ ވަނީ 34 މެޗު ކުޅެގެން 78 ޕޮއިންޓު ހޯދާފައެވެ.

މިއީ ޕީއެސްޖީގެ ކޯޗު މައުރީސިއޯ ޕޮޗެޓީނޯގެ ކޯޗިން ކެރިއަރުގައި ލީގެއް ކާމިޔާބުކުރި ފުރަތަމަ ފަހަރެވެ. އަނެއްކޮޅުން ބާސެލޯނާގައި ރަންޒަމާން ހޭދަކުރުމަށްފަހު ޕީއެސްޖީއަށް ބަދަލުވި މެސީ މިވަނީ ފުރަތަމަ ފަހަރަށް ލަލީގާ ނޫން އެހެން ލީގެއް ކާމިޔާބުކޮށްފައެވެ. ބާސެލޯނާއާއެކު 10 ސްޕެނިޝް ލީގު މެސީ ކާމިޔާބުކުރިއެވެ.