ބްރެޒިލްގެ ސްޓްރައިކަރު ގެބްރިއަލް ޖީސޫސްގެ ހެޓްރިކްއާއިއެކު މެންޗެސްޓަރ ސިޓީ ޕްރިމިއަރ ލީގު ތާވަލުގެ އެއްވަނައިގައި ހަމަޖެހިލައިފިއެވެ.

ސިޓީގެ ދަނޑުގައި ހޮނިހިރު ދުވަހުގެރޭ ވަޓްފޯޑާއި ބައްދަލުކުރި މެޗުން ސިޓީ މޮޅުވީ 5-1 ންނެވެ. މި މެޗުގައި ޖީސޫސް ހަތަރު ލަނޑު ޖެހިއެވެ. ފުރަތަމަ ހާފުގެ ހަތަރުވަނަ މިނެޓުގައި ސިޓީއަށް ލީޑު ނަގައިދިނީވެސް އޭނާއެވެ. ފުރަތަމަ ހާފުގައި ދެލަނޑު ޖެހިއިރު، ދެވަނަ ހާފުގައިވެސް ޖީސޫސް ދެލަނޑު ޖެހިއެވެ. އޭގެ ތެރެއިން އެއްލަނޑު ޖީސޫސް ކާމިޔާބުކުރީ ޕެނަލްޓީއަކުންނެވެ.

މެޗުގައި ސިޓީގެ އަނެއް ލަނޑު ޖަހައިދިނީ ފުރަތަމަ ހާފުގެ 34 ވަނަ މިނެޓުގައި ރޮޑްރީއެވެ. ވަޓްފޯޑުގެ ހަމައެކަނި ލަނޑު ކާމިޔާބުކޮށްދިނީ ހަސާނޭ ކަމާރާއެވެ.

މި ނަތީޖާއާއެކު ތާވަލުގެ އެއްވަނާގައި ސިޓީ އޮތީ 33 މެޗު ކުޅެގެން ލިބުނު 80 ޕޮއިންޓާއެކުއެވެ. މުބާރާތުގެ ތަށްޓަށް ދެން ވާދަކުރަނީ ލިވަޕޫލްއެވެ. ސިޓީއަށްވުރެ އެއްމެޗު މަދުން ކުޅެގެން ލިވަޕޫލް އޮތީ 76 ޕޮއިންޓާއެކު ތާވަލުގެ ދެވަނައިގައެވެ. މެޗުގެ އަދަދު ހަމަކުރާއިރު ލިވަޕޫލް މޮޅުވި ނަމަވެސް ތާވަލުގެ ކުރީގައި އޮންނާނީ ސިޓީއެވެ.

ލީގުގައި އާދީއްތަ ދުވަހު ކުޅުނު އެހެން މެޗުތަކަށް ބަލާއިރު، އާސެނަލް އަތުން މެންޗެސްޓަރ ޔުނައިޓެޑް ބަލިވީ 3-1 ންނެވެ. މެޗުން މޮޅުވެ އާސެނަލްވަނީ ތާވަލުގެ ހަތަރު ވަނައަށް އަރާފައެވެ. ލެސްޓަރ ސިޓީއާއި އެސްޓަން ވިލާ ކުޅުނު މެޗު ނިމުނީ އެއްވެސް ޓީމަކަށް ލަނޑެއް ނުޖެހި އެއްވަރު ވެގެންނެވެ. ނޮރިޗް ސިޓީގެ މައްޗަށް ނިއުކާސަލް ކުރިހޯދީ 3-0 ގެ ނަތީޖާއަކުންނެވެ.