ޗެމްޕިއަންސް ލީގުގެ އަންހެން ޑިވިޝަންގައި ގިނަ އަދަދެއްގެ ސަޕޯޓަރުން މެޗު ބަލަން ވަދެ ރެކޯޑެއް ހަދައިފިއެވެ.

މުބާރާތުގައި ބާސެލޯނާ އާއި ވޮލްފްސްބާގް ބައްދަލުކުރި ސެމީ ފައިނަލް މެޗުގައި 91،648 ސަޕޯޓަރުން ވަނީ މެޗު ބަލަން ސްޓޭޑިއަމްއަށް ވަދެފައެވެ. ބާސެލޯނާ އާއި ރެއާލް މެޑްރިޑް ބައްދަލުކުރި ކުއާޓާ ފައިނަލް ބަލަން ދަނޑަށް ވަނީ 91،553 މީހުންނެވެ. އެހެންކަމުން މިއީ ވޯލްޑް ކަޕް އަންހެން ޑިވިޝަންގައި ސަޕޯޓަރުން ދަނޑަށް ވަން އަދަދަށްވުރެ އިތުރު އަދަދެކެވެ.

އަންހެން ޑިވިޝަންގެ ވޯލްޑް ކަޕް 1999 ގެ ފައިނަލުގައި ސަޕޯޓުކުރަަން ދަނޑަށް ވަނީ 90،185 މީހުންނެވެ. އެމެޗުގައި ބައްދަލުކުރީ އެމެރިކާ އާއި ޗައިނާއެވެ.

ބާސެލޯނާ ކުޅުނު ސެމީ ފައިނަލް މެޗު ބެލުމަށްޓަކައި ގިނަ އަދަދެއްގެ ސަޕޯޓަރުން ދަނޑަށް ވަތްއިރު، މެޗު ފެށުމުގެ ކުރިން ސްޓޭޑިއަމްގެ ބޭރުގައި ގިނަ ކުޅިވަރު ހަރަކާތްތަކެއް ކުރިއަށް ގެންދިޔައެވެ. މެޗުން ބާސެލޯނާ މޮޅުވީ 5-1 ގެ ނަތީޖާއަކުންނެވެ. މި މެޗު ބެލުމަށްޓަކައި 300 ސަޕޯޓަރުން ޖަރުމަނުން ބާސެލޯނާއަށް ދަތުރުކުރިއެވެ. ވޮލްފްސްބާގަކީ ޖަރުމަނުގެ ކްލަބެކެވެ.