ތަހުލީލު ރިޕޯޓުތަކުގެ ޗެއިން އޮފް ކަސްޓަޑީ ނެތުމުން، ޑްރަގް ޓްރެފިކް ކުރުމުގެ ދައުވާ އުފުލާފައިވާ ބަޔަކު ދޫވެއްޖެ

ތަހުގީގުގައި ގޯސްތަކެއް ހަދާފައިވާތީ، ޑްރަގް ޓްރެފިކް ކުރުމުގެ ދައުވާ އުފުލާފައިވާ ބަޔަކު ދޫވެއްޖެއެވެ.

މިއީ 12 ޑިސެމްބަރު 2017 ވަނަ ދުވަހު ފުލުހުން ހިންގި އޮޕަރޭޝަނަކާ ގުޅިގެން ތަހުގީގުކޮށް ދައުވާކޮށްފައިވާ މައްސަލައެކެވެ. އެގޮތުން މި މައްސަލައިގައި 6 މީހެއްގެ މައްޗަށް ޑައިމޯފިން ޓްރެފިކް ކުރުމުގެ ދައުވާ އުފުލައި، ޝަރީއަތް ކުރިއަށް ގެންދިޔައެވެ.

އޭގެ ތެރެއިން ސ. ހިތަދޫ ހިތިގަސްދޮށުގެ އަބްދުﷲ އަޒްހީން ދައުވާއަށް އިއުތިރާފުވެފައިވާތީ އޭނާގެ މައްޗަށް ކުށް ސާބިތުވާކަމަށް ކަނޑައެޅި ނަމަވެސް، ބާކީ ތިބި 5 މީހުން ދައުވާއަށް އިންކާރުކުރިއެވެ.

އެމީހުން ދައުވާއަށް އިންކާރުކޮށްފައިވާތީ އެމީހުންގެ މައްޗަށް ދައުލަތުން ވަނީ ހެކިވެސް ހުށައަޅާފައެވެ. އެހެންނަމަވެސް، މި މައްސަލައިގައި ބުރާސްފަތި ދުވަހު ކްރިމިނަލް ކޯޓުން އިއްވި ހުކުމުގައި ވަނީ އެމީހުންގެ މައްޗަށް ކުށް ސާބިތުނުވާކަމަށް ނިންމާފައެވެ.

ހުކުމުގައި ފާހަގަކޮށްފައިވާ ގޮތުން, މި މައްސަލައިގައި ފެނުނު, މަސްތުވާތަކެތި ކަމަށް ޝައްކު ކުރެވޭ ތަކެއްޗާ ގުޅިގެން 3 ތަހުލީލު ރިޕޯޓެއް ފުލުހުން ތައްޔާރުކޮށްފައިވެއެވެ. ނަމަވެސް މިއިން އެއްވެސް ރިޕޯޓަކާގުޅިގެން ދައުވާކުރާ ފަރާތުން ޗެއިން އޮފް ކަސްޓަޑީ ކާޑު ހުށަހަޅާފައިނުވާއިރު، 3 ރިޕޯޓާގުޅިގެން ހުށައަޅާފައިވަނީ ޗެއިން އޮފް ކަސްޓަޑީ ފޯމުތަކެވެ.

އެހެންނަމަވެސް، މިއީވެސް ފުރިހަމަ ޗެއިން އޮފް ކަސްޓަޑީއެއް ނޫންކަން ހުކުމުގައި ފާހަގަކޮށްފައިވެއެވެ.

ހުކުމުގައި ބުނެފައިވަނީ، ހެކީގެ ގޮތުގައި ހިފެހެއްޓޭ ކޮންމެ އެއްޗަކާ ހަވާލުވާ މީހާއާއި، އެމީހާގެ ވަނަވަރާއި، ހަވާލު ކުރެވޭ ތާރީޚާއި ވަނަވަރު އެނގެންޖެހޭނެ ކަމަށެވެ. ނަމަވެސް، މި މައްސަލައިގައި ހުށައެޅިފައިވާ ޗެއިން އޮފް ކަސްޓަޑީ ފޯމުގައި އެ ކަންކަން ފުރިހަމަ ނުވާކަމަށް ވަނީ ބަޔާންކޮށްފައެވެ.

އޭގެ އިތުރުން، މަސްތުވާތަކެތީގެ މައްސަލަތަކުގައި ހުށައެޅޭ ޗެއިން އޮފް ކަސްޓަޑީ ފޯމުތަކުގައި އެ އެއްޗެއް ފުލުހުންގެ ބެލުމުގެ ދަށަށް ގެނެވުނު ހިސާބުން ފެށިގެން ތަހުލީލުކޮށް ނިމެންދެން, އެ ހެއްކެއް ނަގުލުވެގެން ދިޔަ ގޮތް ފެންނަން އޮންނަންޖެހޭކަން ފާހަގަކޮށް, ހުކުމުގައި ބުނެފައިވަނީ، މި މައްސަލައިގައި ހުށައެޅިފައިވާ ތަހުލީލު ރިޕޯޓުތަކުގައި އެކަންކަން ފުރިހަމަ ނުވާކަމަށެވެ.

ކްރިމިނަލް ކޯޓުގެ ގާޒީ އިސްމާއިލް ޝަފީއު އިއްވެވި މި ހުކުމުގައި ވަނީ, އެ 5 މީހުންގެ މައްޗަށް އުފުލާފައިވާ ދައުވާ އެކަށީގެންވާ ޝައްކެއް ނެތް މިންވަރަށް ސާބިތުކޮށްދެވިފައިނުވާކަމަށް ހުކުމްކުރައްވާފައެވެ.