ބްރައިޓަން ބަލިކޮށް, މެންޗެސްޓަރ ސިޓީން އަލުން ޕްރިމިއަރ ލީގު ތާވަލްގެ އެއްވަނައަށް ޖެހިލައިފިއެވެ. ލިވަޕޫލުން މިހަފްތާގައި މެންޗެސްޓަރ ޔުނައިޓެޑް ބަލިކޮށް ތާވަލްގެ އެއްވަނައަށް ޖެހިލާފައި ވަނިކޮށް, ސިޓީން އަލުން މަޤާމް ހޯދީ 3-0 ން ބްރައިޓަން ބަލިކޮށްގެންނެވެ.
މެޗުގައި ސިޓީއަށް ފުރަތަމަ ލަނޑު ޖެހުނީ ދެވަނަ ހާފް ފަށައިގެން އަށްވަނަ މިނިޓްގައެވެ. ފުރަތަމަ ލަނޑު ޖަހާ ކުރިހޯދައިދިނީ ރިޔާދު މާރޭޒްއެވެ. މާރޭޒް ތަނަވަސްކޮށްދިން ފުރުޞަތަކުން ދެވަނަ ލަނޑު ޖެހީ ފޮޑެންއެވެ. އަދި ތިންވަނަ ލަނޑު ޖެހީ ބާނާޑޯ ސިލްވާއެވެ. މިނަތީޖާއާއެކު ސިޓީއާއި ލިވަޕޫލާ ދެމެދު އަނެއްކާވެސް އޮތީ ޕޮއިންޓެއްގެ ފަރަޤެކެވެ. ސިޓީއަށް ކުރިއަށް އޮތީ ވަޓްފޯޑާ ވާދަކުރާ މެޗެވެ. އޭގެކުރިން ލިވަޕޫލް ނިކުންނާނީ އެވަޓަންއާ ދެކޮޅަށެވެ.
ލީގުގެ ޗެމްޕިއަން ކަމަށް ވާދަކުރަނީ ސިޓީއާއި ލިވަޕޫލެވެ. ޗެލްސީ ތިންވަނާގައި އޮތީ ގަދަ ހަތަރެއްގެ ޔަޤީންކުރުމުގެ އުއްމީދުގައެވެ. ގަދަ ހަތަރެއްގެ ފަހު ޖާގައަށް ޓޮޓެންހަމްއާއި, އާސެނަލްގެ އިތުރުން މެންޗެސްޓަރ ޔުނައިޓެޑް ވާދަކުރެއެވެ.
