ޕީއެސްޖީ ބޭނުންވަނީ ރާމޯސް ދޫކޮށްލަން!
މިއަންނަ ސީޒަންގައި ޕީއެސްޖީގެ ޕްލޭންގައި ރާމޯސް ނުހިމެނޭ ކަމަށް އެކްލަބުން ވަނީ އޭނާއަށް އަންގާފައި
ޕީއެސްޖީގެ ފަރިތަކުރުންތަކުގެ ތެރެއިން ސްޕެއިނުގެ ޑިފެންޑަރު ސާޖިއޯ ރާމޯސް
މި ސީޒަންގައި ޕީއެސްޖީއަށް ބަދަލުވި ސާޖިއޯ ރާމޯސް ދޫކޮށްލަން ބޭނުންވާކަން ޕީއެސްޖީން އޭނާއަށް އަންގައިފިއެވެ.
ރިޕޯޓުތައް ބުނާގޮތުން މިއަންނަ ސީޒަންގައި ޕީއެސްޖީގެ ޕްލޭންގައި ރާމޯސް ނުހިމެނޭ ކަމަށް އެ ކްލަބުން ވަނީ އޭނާއަށް އަންގާފައެވެ. މިގޮތަށް ޕީއެސްޖީން ނިންމާފައިވަނީ އަނިޔާގެ ސަބަބުން ސީޒަންގެ ބޮޑު ބައެއް ރާމޯސްއަށް ނުކުޅެވުމުންނެވެ. ރާމޯސް ޕީއެސްޖީއަށް ގެންދިޔަ އެންމެ ބޮޑު ބޭނުމަކީ ޗެމްޕިއަންސް ލީގު ކާމިޔާބު ކުރުމެވެ. ނަމަވެސް އަނިޔާގެ ސަބަބުން މުބާރާތުގެ އެއްވެސް މެޗެއް އޭނާއަށް ނުކުޅެވުނެވެ.
ޕީއެސްޖީން ރާމޯސް ދޫކޮށްލަން ބޭނުންވި ނަމަވެސް އޭނާ ބޭނުންވަނީ ޓީމުގައި މަޑުކުރާށެވެ. އަދި މިއަންނަ ސީޒަންގައި އޭނާގެ ފަރާތުން ތަފާތު ކުޅުމެއް ދެއްކުމަށް އޭނާ އަންނަނީ މަސައްކަތް ކުރަމުންނެވެ.
ރާމޯސްއާއެކު ޕީއެސްޖީ ހަދާފައިވާ އެއްބަސްވުމުގެ މުއްދަތު ހަމަވާނީ 2023 ވަނަ އަހަރުއެވެެ. އަނެއްކޮޅުން މިހާރު އޭނާ ހުރި ހާލަތަށް ބަލާ އޭނަ ހޯދުމަށް ބޮޑު އަގެއްގައި ކްލަބަކުން މަސައްކަތް ކުރުމަކީ ދުރު ކަމެކެވެ.
