އެންޖާސް މެޗުގައި މެސީއަށް ނުކުޅެވޭނެ

ފްރާންސް ލީގުގައި ބުދަ ދުވަހު ޕީއެސްޖީއާއި އެންޖާސް ބައްދަލުކުރާ މެޗުގައި ދުނިޔޭގެ އެންމެ މޮޅު އެއް ކުޅުންތެރިޔާ ލިއޮނެލް މެސީއަށް ނުކުޅެވޭނެއެވެ.

މެސީއަށް މި މެޗު ގެއްލެނީ ފަޔަށް ލިބިފައިވާ އަނިޔާއެއްގެ ސަބަބުންވެ. ޕީއެސްޖީން ނެރުނު ބަޔާނެއްގައި ބުނީ މެސީއަށް މިހާރު ފަރުވާދެމުން އަންނަ ކަމަށާއި 48 ގަޑިއިރު ފަހުން އޭނާގެ ހާލަތު އަލުން ބަލާނެ ކަމަށެވެ.

ޕީއެސްޖީން އަންނަނީ ވީހާވެސް އަވަހަކަށް ލީގުގެ ޗެމްޕިއަންކަން ކަށަވަރު ކުރުމަށް މަސައްކަތް ކުރަމުންނެވެ. ކޯޗު މައުރީސިއޯ ޕޮޗެޓީނޯ ބުނީ އެންޖާސް މެޗުގައި މޮޅުވުން ވަރަށް މުހިންމު ކަމަށެވެ. އަދި ޓްރޮފީ އަވަހަށް ޔަގީންކުރަން އަމާޒުހިފާފައި ހުރިކަމަށްވެސް ޕޮޗެޓީނޯ ބުންޏެވެ.

މޮޅުވުމުގެ ރޫހު މުޅި ޓީމުގައި އޮތްކަން ފާހަގަކޮށް ޕޮޗެޓީނޯ ބުނީ މޮޅުވުމަށްޓަކައި އެރޫހަކީ ވަރަށް މުހިންމު އެއްޗެއް ކަމަށެވެ. އަދި ޕީއެސްޖީން ކުޅޭނީ އިދިކޮޅު ޓީމުތަކަށް އިހްތިރާމް ކޮށްގެން ކަމަށްވެސް ޕޮޗެޓީނޯ ބުންޏެވެ. އޭނާ ބުނީ މޮޅުވުމަށްޓަކައި އެންމެ ރަނގަޅަށް މަސައްކަތް ކުރެވޭނީ އޭރުން ކަމަށެވެ.

މިފަހަރުގެ ލީގު ކާމިޔާބު ކުރުމާއި ގާތުގައި ޕީއެސްޖީ އޮތްއިރު، މިފަހަރުގެ މުބާރާތް ކާމިޔާބު ކޮށްފިނަމަ ވެގެންދާނީ ޕީއެސްޖީން މުބާރާތް ކާމިޔާބު ކުރި 10 ވަނަ ފަހަރަށެވެ.