ވެލެންސިޔާ ކޮޅަށް މާޒިޔާއިން 13 ލަނޑު!

ޕްރެޒިޑެންޓްކަޕްގެ ޗެމްޕިއަން ވެލެންސިޔާ ކޮޅަށް ދިވެހި ޕްރިމިއަރ ލީގުގެ ދެވަނަ ބުރުގައި މާޒިޔާއިން 13 ލަނޑު ޖަހައިފިއެވެ. މެޗު މާޒިޔާއިން ކާމިޔާބުކުރީ 13-0 ނެވެ. މިއީ ލީގުގައި ރެކޯޑެކެވެ.

މިބޮޑު މޮޅާއެކު މާޒިޔާ ވަނީ އަލުން ލީގު ތާވަލްގެ އެއްވަނައަށް ޖެހިލާފައެވެ. އެއީ 24 ޕޮއިންޓާއެކުއެވެ. 9 މެޗު ކުޅުނުއިރު ދެވަނާގައި އޮތީ އީގަލްސްއެވެ. އެއީ 22 ޕޮއިންޓާއެކުއެވެ. ވެލެންސިޔާ ތިންވަނާގައި އޮތީ 13 ޕޮއިންޓާއެކުއެވެ.

މާޒިޔާއިން ވަނީ ވެލެންސިޔާ ކޮޅަށް ފުރަތަމަ ހާފްގައިވެސް 7 ގޯލް ޖަހާފައެވެ. ފުރަތަމަ ހާފްގައި މާޒިޔާގެ ގޯލްތައް ޖެހީ ކޯނޭއާއި, ހަމްޒާއާއި, އައިސަމްއެވެ. ފުރަތަމަ ހާފްގައި ހަމްޒާ މުޙައްމަދު (ހަމްޕު) ހެޓްރިކެއް ހެދިއެވެ. ފުރަތަމަ ހާފްގެ އިތުރު ވަގުތުގައި ޖެހި ލަނޑާއެކު ފުރަތަމަ ހާފްގައިވެސް އޭނާ ހަތަރު ލަނޑު ޖެހިއެވެ. އަދި ދެވަނަ ހާފްގައި ލަނޑެއް ޖަހާ ހަމްޕުގެ ޖުމްލައަކީ ފަހެކެވެ. މެޗުގައި ކޯނޭއާއި ނާއިޒް ހަސަން (ދާދު) ވެސް ހެޓްރިކް ހެދިއެވެ. ކޯނޭ ދެ ލަނޑު ޖެހީ ފުރަތަމަ ހާފްގައެވެ. ހެޓްރިކް ފުރިހަމަކުރީ ދެވަނަ ހާފް ފަށައިގެން ދެވަނަ މިނިޓްގައެވެ. ނާއިޒު ހެޓްރިކް ހެދީ ދެވަނަ ހާފްގައި ތިން ލަނޑު ޖަހައިގެންނެވެ. އޭނާ ހެޓްރިކް ފުރިހަމަކުރީ މެޗުގެ އިތުރު ވަގުތުގައެވެ. މެޗުގައި މޮޅަށް ކުޅުނު ޓަނާވެސް ދެގޯލް ޖެހިއެވެ. މެޗުގެ އިތުރު ވަގުތުގައި ވެލެންސިޔާއަށް ޕެނަލްޓީއެއް ލިބުނު ނަމަވެސް ބޯހާސް ފޮނުވާލި ބެނަލްޓީ ދިޔައީ ހުރަސް ދަނޑިމަތިން ބޭރަށެވެ.

ވެލެންސިޔާއިން ވަނީ ޕްރެޒިޑެންޓްކަޕްގައި ދެފަހަރު މާޒިޔާ ބަލިކޮށްފައެވެ. އަދި އޭއެފްސީކަޕް ގްރޫޕް ސްޓޭޖަށް ދިއުމަށް ގިރާކުރަންޖެހޭ ފުރަތަމަ ފިޔަވަޅު ބޫޓާންގެ ޕަރޯ އެފްސީ ބަލިކޮށް ގިރާކުރިއެވެ. އެކަމަކު ދެވަނަ ފިޔަވަޅަށް ބަނގްލަދޭޝްގެ ޑާކާ އަބަހާނީއާ ވާދަކުރަން އެޤައުމަށް ނުދެވުނީ ޓިކެޓްވެސް ނަގާފައެވެ. އެއީ އެހެން ޚަރަދުތައް ކުރަން ފައިސާ ނެތްކަމަށް ބުނެއެވެ.