ކޮންމެ މެޗެއްގައިވެސް އެންމެ މުހިންމު ކަމަކީ އެމެޗަކުން މޮޅުވުން ކަމަށާއި، އެކަން ވަރަށް ސާފުކޮށް ފެންނަން އެބައޮތް ކަމަށް އެތުލެޓިކޯ މެޑްރިޑްގެ ކޯޗު ޑިއެގޯ ސިމިއޯނީ ބުނެފިއެވެ.
ޔުއެފާ ޗެމްޕިއަންސް ލީގު ކުއާޓާ ފައިނަލުގެ ދެވަނަ މެޗުގައި މެންޗެސްޓަރ ސިޓީ އާއި އެއްވަރުވުމުން މުބާރާތުން ކެޓި މެޗަށްފަހު ސިމިއޯނީ ބުނީ މުބާރާތުގައި ޓީމުން ދެއްކި ހިއްވަރާއި މެދު ފަޚުރުވެރިވާ ކަމަށެވެ. މުބާރާތުން ކެޓުމުން އެކަމާއި ދެރަވި ނަމަވެސް މޮޅުވާ ޓީމު އުފާ ފާޅުކުރާތަން ބެލުމަށް އޭނާ ލޯބިކުރާ ކަމަށް ސިމިއޯނީ ބުންޏެވެ. އެއީ ހަގީގަތުގައި މުހިންމު ކަމަކީ މެޗުން މޮޅުވުން ކަމަށް ވާތީއެވެ.
މެޗުގައި މޮޅުނުވެވި މުބާރާތުން ކެޓި ނަމަވެސް ސިމިއޯނީ ވަނީ މެޗު ނިންމާލުމަށްފަހު ސިޓީއަށް ތަރުހީބު ދީފައެވެ. އަދި އެތުލެޓިކޯގެ ދަނޑުގައި ކުޅުނު މި މެޗުގައި ސަޕޯޓަރުންގެ ފަރާތުން ލިބުނު ހިތްވަރަށް ސިމިއޯނީ ސާބަސް ދިނެވެ. އޭނާ ބުނީ ސަޕޯޓަރުންގެ އަޑާއެކު ޓީމަށް އިތުރު ހިތްވަރެއް ލިބުނު ކަމަށެވެ.
މެޗު ހޫނުވެ ފަހު ވަގުތުގައި ހިނގި ހަމަނުޖެހުމުގެ ސަބަބުން އިތުރު ވަގުތުގެ 10 މިނެޓު ކުޅުނެވެ. މި ވަގުތުގައި ލިބުނު ކޮންމެ ފުރުސަތެއްގައި މެޗު ލަސްކުރުމަށް ސިޓީގެ ކުޅުންތެރިން މަސައްކަތް ކުރިކަން ފާހަގަކޮށް ސިމިއޯނީ ބުނީ އެކަމުގައި އޭނާގެ އެއްވެސް މައްސަލައެއް ނެތް ކަމަށެވެ. އަދި ސިޓީއިން މެޗުގައި މޮޅު ފުޓްބޯޅައެއް ކުޅުނުކަން ފާހަގަކޮށް ސިމިއޯނީ ވަނީ ސިޓީއަށް މަރުހަބާ ކިޔާފައެވެ.
