ރެއާލް މެޑްރިޑާއި ދެކޮޅަށް ސެމީގައި މެންޗެސްޓަރ ސިޓީ

ކުއާޓަރ ފައިނަލް ދެވަނަ ލެގުގައި ލަނޑެއް ނުޖެހި އެއްވަރުވިޔަސް ސެމީފައިނަލްގައި ރެއާލް މެޑްރިޑާއި ވާދަކުރާނެ ޓީމަކަށް މެންޗެސްޓަރ ސިޓީ ވެއްޖެއެވެ. ޗެމްޕިއަންސް ލީގު ކުއާޓަރ ފައިނަލް ދެވަނަ ލެގުގައި އެތްލެޓިކޯ މެދްރިޑްގެ ދަނޑުގައި ކުޅެ މެންޗެސްޓަރ ސިޓީން މެޗު ނިންމާލީ ލަނޑެއް ނުޖެހި އެއްވަރުވެގެންނެވެ. އެކަމަކު ފުރަތަމަ ލެގުގައި ސިޓީގެ ދަނޑުގައި 1-0 ން ކުރިހޯދާފައިވާތީ ސިޓީއަށް ވަނީ ސެމީގެ ޖާގަ ލިބިފައެވެ.

އެތްލެޓިކޯގެ ފަރާތުން ފިޒިކަލް ކުޅުމެއް ފެނުނު މެޗުގައި ލަނޑުޖަހަން ސިޓީން މަދު ފުރުޞަތުތަކެއް ތަނަވަސްކުރިއެވެ. މުޅި މެޗަށްބަލާއިރުވެސް އެންމެ ރަނގަޅު އެޓޭކަކީ ފުރަތަމަ ހާފްގައި ގުންޑޮގާން ފޮނުވާލި ބޯޅައެވެ. ތިރިތިރިން ފޮނުވާލި އެބޯޅަ އަމާޒުވީ ގޯލްގެ އަރިމަތީ ދަނޑިއަށެވެ. މެޗުގެ ފަހު މިނިޓްގެ ތެރޭގައި ދެޓީމްގެ ކުޅުންތެރިން ހޫނުވެ, ހަމަނުޖެހުން ހިނގާ މެޗު ކޮންޓްރޯލްކުރަން ރެފްރީއަށް އުނދަގޫތަކެއް ކުރިމަތިވިއެވެ. އެހަމަނުޖެހުންތައް ނިމުމަކަށް އައީ އެތްލެޓިކޯގެ ޑިފެންޑަރު ފެލިޕެއަށް ދެވަނަ ރީނދޫ ކާޑާއެކު ރަތްކާޑް ދައްކައިގެންނެވެ. ފުރަތަމަ ރީނދޫ ކާޑު އޭނާއަށް ދެއްކީ ފުރަތަމަ ހާފްގައި ފޮޑެންއަށް ކުރި ނުރައްކާތެރި ފައުލަކަށެވެ. ހަމަނުޖެހުންތަކާއި ގުޅިގެން އިތުރު ވަގުތުގެ ގޮތުގައި 9 މިނިޓް ދެއްކިއެވެ. އަދި 12 މިނިޓް ކުޅުނެވެ. 12 މިނިޓް އެތްލެޓިކޯއިން ކުޅުނީ 10 ކުޅުންތެރިންނާއެކުއެވެ.

މިދިޔަ ސީޒަންގައި ފައިނަލްގައި ޗެލްސީ އަތުން ބަލިވި މެންޗެސްޓަރ ސިޓީއަށް މިފަހަރު ސެމީގައި އޮތީ އުނދަގޫ އިމްތިހާނެކެވެ. އެއީ ޗެލްސީ ބަލިކޮށް ސެމީން ޖާގަ ހޯދި ރެއާލް މެޑްރިޑް ބަލިކުރުމެވެ. ސެމީފައިނަލް ފުރަތަމަ ލެގު ކުޅޭނީ މިމަހު 26 އަދި 27 ގައެވެ. ދެވަނަ ލެގު ކުޅޭނީ މެއި މަހުގެ 3 އަދި 4 ގައެވެ.