ދިއްދޫ އައިސް ޕްލާންޓް ބަޔަކާއި ހަވާލު ނުވެ އޮތީ އެކަށީގެންވާ ބިޑެއް ނުލިބޭތީ - މިނިސްޓަރު
މަސައްކަތުގެ މުއްދަތު 6 މަހުން 8 މަހަށް ބަދަލުކޮށްފައިވާނެ
މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޑޮކްޓަރ ޙުސައިން ރަޝީދު ޙަސަން އާއި ސުވާލުކުރެއްވުން
ހއ.ދިއްދޫ އައިސް ޕްލާންޓްގެ މަސައްކަތް ބަޔަކާއި ހަވާލުނުވެ އޮތީ، އެކަށީގެންވާ ފަރާތަކުން ބިޑް ހުށައަޅާފައި ނުވާތީކަމުގައި ފިޝަރީޒް މިނިސްޓަރު ޑރ.ހުސައިން ރަޝީދު ހަސަން ވިދާޅުވެއްޖެއެވެ.
މިނިސްޓަރު މިހެން ވިދާޅުވީ، 2021 ސެޕްޓެމްބަރު 8 ވަނަ ދުވަހު، ސަޢޫދީ ފަންޑުގެ އެހީގައި ހއ. ދިއްދޫގައި 25 ޓަނުގެ އައިސް ޕްލާންޓެއް ޤާއިމްކުރުމުގެ މަސައްކަތް، މިނިސްޓްރީ އޮފް ފިނޭންސްގެ ފަރާތުން އިޢުލާންކުރެއްވުމަށްފަހު، އެ ޕްރޮޖެކްޓްގެ އެއްވެސް މައުލޫމާތެއް ފަހުން ލިބިފައި ނުވާތީ އެކަން ސާފުކުރެއްވުމަށް ދިއްދޫ ދާއިރާގެ މެމްބަރު އަބްދުުﷲ ވަހީދު ކުރެއްވި ސުވާލަށް މަޖިލީހުގެ ތަޅުމުގައި ޖަވާބު ދެއްވަމުންނެވެ.
ފިޝަރީޒް މިނިސްޓަރު ވިދާޅުވީ، އެމަސައްކަތަށް ބިޑަށް ހުޅުވާލުމުން ބިޑް ހުށައަޅާފައިވަނީ އެންމެ ފަރާތަކުން ކަމަށެވެ. އަދި މި ބިޑަކީ އިންޓަރނޭޝަނަލް ބިޑަކަށްވާތީ، ބިޑް ހުށައަޅާ ފަރާތުން ފިނޭންސް މިނިސްޓްރީގައި ރަޖިސްޓްރީ ކުރަން ޖެހޭ ކަމަށެވެ. އެހެންނަމަވެސް ބިޑް ހުށައެޅި ފަރާތުން ކުރިން ފިނޭންންސް މިނިސްޓްރީގައި ރަޖިސްޓްރީކޮށްފައި ނުވާތީ، އެ ބިޑް ކެންސަލްވެފައިވާ ކަމަށެވެ.
މިނިސްޓަރު ވިދާޅުވީ އެތަން ހެދުމަށް 6 މަސް ދުވަސް ކަނޑައަޅާފައިވާތީ، ބޭރުން ތަކެތި ގެނައުމަށް ހުރި ދަތިކަމުގެ ސަބަބުން އެ މުއްދަތުގެ ތެރޭގައި އެ ތަން ނުނިމިދާނެތީ، އެކަށީގެންވާ ބިޑް ލިބުމުގެ ދަތިކަން ހުރި ކަމަށެވެ.
އަދި މި މަސައްކަތުގެ ފައިނޭންޝަލް އެލިޖިބިލިޓީ ހުރި ގޮތުން ދިވެހި ކުންފުނިތަކަށް ބިޑް ހުށައެޅުމުގެ ފުރުސަތު ކުޑަ ކަމުގައިވެސް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ، އެ ހުރިހާ ކަމަކަށް ބަލައި، މަސައްކަތުގެ މުއްދަތު 6 މަހުން 8 މަހަށް ބަދަލުކޮށްފައިވާނެ ކަމަށެވެ. އަދި ބީލަން ކަރުދާހަށް ބަދަލު ގެނެސް ދެވަނަ ފަހަރަށް ބިޑަށް ހުޅުވާލުމަށް 4 އެޕްރީލް 2022ގައި ފިނޭންސަށް ފޮނުވާފައިވާ ކަމަށެވެ. ބީލަން ކަރުދާހަށް ގެނެސްފައިވާ ބަދަލުތަކަށް ސައުދީ ފަންޑުގެ ރުހުން ލިބުމުން ދެވަނަ ފަހަރަށް ބީލަމަށް ހުޅުވާލެވޭނެ ކަަމަށްވެސް މިނިސްޓަރު ވިދާޅުވިއެވެ.
އެމަސައްކަތް ނިންމާނެ ތާރީޚެއް އެނގިގެންދާނީ، ދެވަނަ ފަހަރަށް ބީލަން ހުޅުވާލެވި، މަސައްކަތް ހަވާލުކުރުމުން ކަމަށް މިނިސްޓަރު ވިދާޅުވިއެވެ. މިއީ ސައުދީ ފަންޑުން ގާއިމް ކުރުމަށް ނިންމާފައިވާ އެހެނިހެން އައިސް ޕްލާންޓްތަކުގެވެސް ކަން ހިނގަމުން އަންނަ ގޮތް ކަމަށްވެސް މިނިސްޓަރު ސާފުކޮށްދެއްވިއެވެ.
އިތުރު ބައެއް އައިސް ޕްލާންޓްތަކުގެ ތަފްސީލް ދެއްވަމުން މިނިސްޓަރު ވިދާޅުވީ، ގުރައިދޫ އައިސް ޕްލާންޓް ނުހިނގާ ހުރީ ޓެކްނިކަލް މައްސަލައެއްގެ ސަބަބުން ކަމަށާއި، އެމައްސަލަ ރަނގަޅު ކުރުމަށް ފެނަކަ އާއި ހަވާލުކުރުމަށް މަސައްކަތް ކުރައްވަމުން ގެންދަވާ ކަމަށެވެ.
މީގެއިތުރުން ގެމަނަފުށީގައި 50 ޓަނުގެ އައިސް ޕްލާންޓްގެ މަސައްކަތަކީ، އިންޑިއަން އެގްޒިމް ބޭންކްގެ މަސައްކަތެއް ކަމަށާއި، އެމަސައްކަތް ހިމެނެނީ ފެލިވަރުގެ ކެޕޭސިޓީ އިތުރު ކުރުމުގެ މަޝްރޫއުގެ ތެރޭގައި ކަމަށެވެ. އަދި ފެލިވަރު ކޭނިން ކެޕޭސިޓީ އަދި ކޯލްޑް ސްޓޯރޭޖް ހެދުމަށް ފުރަތަމަ ޕްރި ކޮލިފައި ކުރާނެ ފަރާތެއް ލިބިފައިނުވާކަމަށެވެ. އެހެންކަމުން ދެވަނަ ފަހަރަށް ހުޅުވާލުމުން ޕްރި ކޮލިފިކޭޝަނަށް އެއް ފަރާތަކުން ހުށައަޅާފައިވާކަމަށާއި، މިހާރު ކުރިއަށްދަނީ އިވެލުއޭޝަން މަރުހަލާ ކަމުގައި ފިޝަރީޒް މިނިސްޓަރު ވިދާޅުވިއެވެ.
