ބޮޑުކަންނެލީގެ މަސްވެރިކަން ކުރުމަށް ލޭނު އެޅުން ހުއްދަކުރުމުން ކަންބޮޑުވުން ފާޅުކުރުމަށް އިހުތިޖާޖަށް ނިކުންނަނީ
އެކަމަކީ ކަންނެލި މަސްވެރިކަމަށް އިންވެސްޓްކޮށްގެން ތިބި އޮޑިވެރިންނާއި، ކަންނެލި މަސްވެރިކަމުން ދިރިއުޅޭ އާއިލާތައް ބަނގުރޫޓުވާނެ ކަމެއް ކަމަށް އެޖަމިއްޔާއިން ވަނީ ބުނެފަ
މަސްދޯނި ބުރެއްގެ ތެރެއިން
ބޮޑުކަންނެލީގެ މަސްވެރިކަން ކުރުމަށް ލޭނު އެޅުން ހުއްދަ ކުރުމުން އެކަމާއި މެދު ކަންބޮޑުވުން ފާޅުކުރުމުގެ ގޮތުން ބޮޑުކަންނެލި މަސްވެރީން އިހުތިޖާޖު ކުރުމަށް، އޮޑިފަހަރުގެ މާލެ ސަރަހައްދުގައި އެއްވުމެއް ބާއްވަން މަސައްކަތް ކުރަމުންދާ ކަމަށް ބޮޑުކަންނެލި މަސްވެރިންގެ ޔޫނިއަނުން ބުނެފިއެވެ.
ބޮޑުކަންނެލި މަސްވެރިންގެ ޔޫނިއަނުން ނެރެފައިވާ ނޫސް ބަޔާނެއްގައި ބުނެފައި ވަނީ ވަނީ ބޮޑު ކަންނެލީގެ މަސްވެރިކަން ކުރުމަށް ލޭނުއެޅުން ހުއްދަކުރުމަކީ އެ ޖަމިއްޔާއިން އިންތިހާ އަށް ކަންބޮޑުވާ ކަމެއް ކަމަށެވެ.
އެ ޖަމިއްޔާއިްނ ބުނި ގޮތުގައި ލޭނު އެޅުން ހުއްދަ ކުރުމަކީ ލޭނު ބޯޓުތައް މެދުވެރިކޮށް ބޭރުކަނޑުން ގިނަ އަދަދެއްގެ ކަންނެލި ހޯދުމާއި، ކަނޑުމަތިން އެއްބޯޓުން އަނެއްބޯޓަށް މަސްގަނެ ވިއްކަން މަގުފަހިވެގެންދާނެ ކަމެކެވެ. އަދި އެކަމުގެ ސަބަބުން ކަންނެލި ލިބޭ މިންވަރު އިންތިހާއަށް އިތުރުވެގެންދާނެކަން އެ ބަޔާނުގައި ވަނީ ބުނެފައެވެ.
އެ ބަޔާނުގައި އިތުރަށް ބުނެފައި ވަނީ ކަންނެލި ލިބޭ މިންވަރު އިތުރުވުމުގެ ނަތީޖާއެއްގެ ގޮތުން ދިވެހި އަތުނަނު ކަންނެލި އޮޑިތަކުން ބާނާ ކަންނެލީގެ ޑިމާންޑް ދަށްވެގެންދާނެ ކަމަށެވެ. އަދި ކަންނެލީގެ އަގު އިންތިހާއަށް ދަށްވެގެންދާނެކަމަށް ވެސް ވަނީ ބުނެފައެވެ،
އެކަމުގެ ނަތީޖާއެއްގެ ގޮތުން ލިބޭ އާމްދަނީ އާއި ޚަރަދާ ނުބައްދަލުވެގެން ދިއުމުގެ ބިރު އޮތް ކަމަށް އެ ބަޔާނުގައި ބުނެފަިއވެއެވެ. އެކަމަކީ ކަންނެލި މަސްވެރިކަމަށް އިންވެސްޓްކޮށްގެން ތިބި އޮޑިވެރިންނާއި، ކަންނެލި މަސްވެރިކަމުން ދިރިއުޅޭ އާއިލާތައް ބަނގުރޫޓުވާނެ ކަމެއް ކަމަށް އެޖަމިއްޔާއިން ވަނީ ބުނެފައެވެ. އަދި މަސްވެރިކަމުން ދިވެހީން ފެޔަށްޖެހި، ޒަމާންވީ ދިވެހި ދެމެހެއްޓެނިވި މަސްވެރިކަން، ކޯޕަރޭޓް ކުންފުނިތަަކުގެ އަތްދަށަށް ބަދަލުވެގެން ހިގައިދާނެ ކަމަށް އެ ޖަމިއްޔާއިން ވަނީ ބުނެފައެވެ.
އިތުރަށް އެ ޖަމިއްޔާއިން ބުނީ ބޮޑުކަންނެލި މަސްވެރިކަމުގެ ސިނާއަތް ސަލާމަތްކުރުމަކީ ސަރުކާރުން ވަރަށް ބޮޑު ޒިންމާއެއް އެކަމުގައި ނަގަން ޖެހޭ ކަމެއް ކަމަށެވެ.
އެ ޖަމިއްޔާ އިން ބުނީ މަސްވެރި އާއިލާތަކުގެ ބަނޑުފުރާނަ މުއްތިކޮށް، ހަމަޖެހޭ ދިރިއުޅުމެއް ހޯދުމަށް ކުރާ މަސައްކަތުގައި އެންމެ ތަންފުކެއް ވެސް ފަހަތަށް ނުޖެހޭނެ ކަމަށެވެ. އަދި އެ މަސައްކަތުގައި ކުރާންޖެހުނު ކޮންމެ ކަމެއް ކުރުމުގައި ދެމިތިބޭނެ ކަމުގެ ޔަގީންކަން ދޭކަމަށެވެ.
އެ ޖަމިއްޔާ އިން ވަނީ ސަރުކާރުން މަސްވެރީންނާއި މަސް ގަންނަ ފަރާތްތަކާއެކު މަޝްވަރާކޮށް، މައްސަލަތަކަށް ހައްލު ގެނެސްދިނުމަށް ގޮވާލާފައެވެ.
ބޮޑު ކަންނެލި މަސްވެރީންގެ ޔޫނިއަނަކީ އެ ސިނާއަތާއި މަސްވެރިންގެ ހައްގުތައް ހޯދާދިނުމަށް ވަކާލާތުކުރާ ޔޫނިއަންއެކެވެ.
