ވަޅޯމަހުގެ އަގު އުފުލިއްޖެ

ވަޅޯމަސް ލިބުންދަތިވެ ވަޅޯމަހުގެ އަގު އުފުލެމުންދާ ކަމަށް ވަޅޯމަސް ވިއްކާ ފަރާތްތަކުން ބުނެފިއެވެ.

ލޯކަލް މާރުކޭޓުގައި ވަޅޯމަސް ވިއްކާ ފަރާތަކުން މަޢުލޫމާތު ދިންގޮތުގައި މިއަހަރުގެ ތެރޭގައި ވަޅޯމަހުގެ އަގަށް އެތައް ފަހަރެއްގެ މަތިން ބަދަލު ގެންނަންޖެހުނެވެ. މާރުކޭޓުގައި ވަޅޯމަސް ވިއްކާ ފަރާތަކުން މަޢުލޫމާތު ދިންގޮތުގައި، އެފަރާތުން މަސް ކައްކަނީ މާލެއިން މަސް ގަނެގެން އަމިއްލައަށެވެ. ނަމަވެސް، މިހާރު މަސްވެރިކަން ދަށްވެފައިވުމާއިއެކު މަސްވެރިން މަހަށް ނުފުރާ މިންވަރު އިތުރުވެފައިވުމުގެ ސަބަބުން މަސް ލިބުމުގައި ބޮޑެތި ދަތިތަކާ ކުރިމަތިލާންޖެހިފައިވާ ކަމަށް އޭނާ ފާހަގަކުރިއެވެ.

"މިދިޔަ މަހާ އަޅާބަލާއިރު މިހާރު މަހުގެ އަގު ވަރަށް ބޮޑުތަން މައްޗަށް ގޮސްފައިވޭ. މަސްވެރިކަން ދަށްވެފައިވާތީ، މަސް ލިބުން ވަރަށް ދަތިވެފައިވޭ. މިކަމުގެ ސަބަބުން އަޅުގަނޑުމެންނަށްވެސް ވަޅޯމަސް ވިއްކާ އަގު ބޮޑުކުރަން ޖެހިފައިވޭ،" މާރުކޭޓުގައި ވަޅޯ މަސް ވިއްކާ ފަރާތުން ބުންޏެވެ.

މަސްވެރިން މަހަށް ފުރުން މަދުވެފައިވާ ކަމުގެ ވާހަކަ މުޅި ރާއްޖެއިން އިވެމުންދާއިރު، މަސްވެރިކަމުގައި އުޅޭ މީހުން ބުނަނީ ސަރުކާރުން މަސްކިލޯއެއް މިހާރު ގަންނަނީ 16 ރުފިޔާއަށް ކަމަށްވާއިރު، އެއީ މަހުގެ ހަމަ އަގު ނޫން ކަމަށާއި، އެ އަގުގައި މަސްވިއްކައިގެން ޚަރަދު ފޫނުބެއްދޭނެ ކަމުގައެވެ.

"މި ފާއިތުވި 18 އަހަރުގެ ތެރޭގައި މަސްވެރިންނަށް މިހާ ނިކަމެތި ކަމެއް ނުލިބޭ،" މަސްވެރިކަމުގައި ހަރަކާތްތެރިވާ މީހަކު ބުންޏެވެ.

މި ސަރުކާރުން ވައުދުވެފައި ވަނީ ކިރާމަހަށް 48 ގަޑިއިރުގެ ތެރޭގައި މަސްވެރިންނަށް ފައިސާ ދިނުމަށެވެ. އެހެން ނަމަވެސް ފަހުން ސަރުކާރުން ބުނެފައި ވަނީ މަސްކިރުމުން 2 ހަފްތާގެ ތެރޭގައި ފައިސާ ދައްކާނެ ކަމަށެވެ. ނަމަވެސް އެކަން ވެސް އެގޮތަށް ނުކުރެވި މަސްވެރިންނާއި އޮޑިވެރިން މާޔޫސްވެފައިވާ ކަމަށް އެފަރާތްތަކުން އަންނަނީ ބުނަމުންނެވެ.