ބުޅާތަކަށް ގޯނާ ނުކުރަން އެގްރިކަލްޗާ މިނިސްޓްރީން އަންގައިފި
މި ދުނިޔެއަކީ ޖަނަވާރަށް ރައްކާތެރި ރަނގަޅު ތަނަކަށް ހެދުމަށް ބައިނަލްއަގުވާމީ ފެންވަރުގައި ބާރު އަޅާކަމަށް ބުނެފައިވޭ
ބުޅާ މަރައިގެންނާއި އެތަކެއްޗަށް ގޯނާ ކުރިކަމުގެ މައްސަލަތަކެއް މީގެ ކުރިން ވެސް ފެންމަތިވި
ބުޅާތަކަށް ގޯނާކުރުން ހުއްޓާލަން އެގްރިކަލްޗާ މިނިސްޓްރީން އަންގައިފި އެވެ.
އެގްރިކަލްޗާ މިނިސްޓްރީން އަންގާރަ ދުވަހު ނެރުނު ބަޔާނެއްގައި ބުނީ މިހާރަކަށް އައިސް ރާާއްޖޭގެ ބައެއް ރަށްރަށުގައި ވީއްލިގެން މަގުމަތީގައި އުޅޭ ބުޅާތަކަށް ގޯނާކޮށް ހާނީއްކަ ކުރުމާއި މެރުމުގެ މައްސަލަތަކެއް ފާހަގަވެފައިވާ ކަމަށެވެ. އަދި މިއީ ޖަނަވާރުންގެ ދުޅަހެޔޮކަމުގެ މިންގަނޑާ ހިލާފު އަމަލަކަށްވާތީ އެކަން ނުކުރަން ވަރަށް ބޮޑަށް އިލްތިމާސްކުރާކަމަށެވެ.
މިނިސްޓްރީން އިތުރަށް ބުނީ ރާއްޖެއިން ބައިވެރިވެފައިވާ ދުނިޔޭގެ ޖަނަވާރުގެ ސިއްހަތާ ބެހޭ ޖަމިއްޔާގެ އެނިމަލް ހެލްތު ކޯޑުގައި ޖަނަވާރުގެ ދުޅަހެޔޮކަމަށް ހާއްސަ އަހައްމިއްޔަތުކަމެއް ދީފައިވާ ކަމަށާއި އޭގެ ތެރޭގައި ދަނޑުވެރިކަމަށާއި މުނިފޫހިފިލުވުމަށާއި އިލްމީ ދިރާާސާކުރުމަށާއި އެ ނޫންވެސް ބޭނުންތަކަށް ޖަނަވާރު ގެންގުޅުމުގައި އެސޮރުމެންގެ ދުޅަހެޔޮކަން ކަށަވަރުކުރުން ހިމެނޭ ކަމަށެވެ.
މިނިސްޓްރީން ބުނީ ޖަނަވާރަށް ރަހުމްކޮށް އަޅާލައި އެތަކެއްޗަށް އޯގާތެރިވުމަށް އިސްލާމްދީންވެސް ބާރު އަޅާ ކަމަށެވެ.
އެހެންކަމުން އެއްވެސް ޖަނަވާރަކަށް އަނިޔާވެރިނުވެ ޖަނަވާރުންނަށް އަޅާލައި އޯގާތެރިވުމަށް އެ މިނިސްޓަރީގެ ބަޔާނުގައި ވަނީ އިލްތިމާސްކޮށްފަ އެވެ.
ބުޅާ ފަދަ ޖަނަވާރުތަކަށް ގޯނާކުރުމާއި މެރުމަކީ ރާއްޖޭގައި ގާނޫނީ ގޮތުން ކުށެކެވެ.
ބުޅާ މަރައިގެންނާއި އެތަކެއްޗަށް ގޯނާ ކުރިކަމުގެ މައްސަލަތަކެއް މީގެ ކުރިން ވެސް ފެންމަތިވެ، ފުލުހުން ވަނީ އެ މައްސަލަތައް ބަލާފަ އެވެ.
