ހަސަން ނަޒީމްގެ ހެޓްރިކާއެކު ގްރީންއިން ދަ ގްރާންޑޭ ބަލިކޮށްފި

ފުރަތަމަ ބުރު ދަށްކޮށްދިޔަ ގްރީން ސްޓްރީޓްސްއިން ދެވަނަ ބުރުގެ ފެށުން ރަނގަޅުކޮށްފިއެވެ. ގްރީން ސްޓްރީޓްސްއިން ދެވަނަ ބުރުގެ ފެށުން ރަނގަޅުކުރީ ދެވަނަ ބުރުގައި ކުޅުނު ފުރަތަމަ މެޗުގައި ދަ ގްރާންޑޭ 4-0 ން ބަލިކޮށްގެންނެވެ.

ލީގު ތާވަލްގެ ފުލުގައި އޮތް ދަ ގްރާންޑޭ ބަލިކުރަން އެންމެ މުހިއްމު ދައުރެއް އަދާކުރި ހަސަން ނަޒީމް (ޗޯޓް) އެވެ. އޭނާ ވަނީ މެޗުގައި ހެޓްރިކެއް ހަދާފައެވެ. ޗޯޓް ތިން ލަނދު ޖެހީ 23 ވަނަ މިނިޓާއި, 80 ވަނަ މިނިޓާއި, 90 ވަނަ މިނިޓްގައެވެ. ނަޒީމް މެޗުގައި އޭނާގެ ފުރަތަމަ ލަނޑު ޖެހުމުގެ ކުރިން ގްރީންއަށް ފުރަތަމަ ލަނޑުޖަހާ ކުރި ހޯދައިދިނީ ހޯސޭ އަވީލާއެވެ. މިދެޓީމް ފުރަތަމަ ބުރުގައި ވާދަކުރި މެޗު ވީ އެއްވަރެވެ. އެއީ ފުރަތަމަ ބުރުގައި ދަ ގްރާންޑޭއަށް ޕޮއިންޓް ލިބުނު ހަމައެކަނި މެޗެވެ.

މިމޮޅާއެކުވެސް ގްރީން އޮތީ ތާވަލްގެ ހަތް ވަނާގައެވެ. އެއީ 7 ޕޮއިންޓާއެކުއެވެ. އެކަމަކު ހަވަނާގައި އޮތް ސަސް އާއި ދެމެދު މިހާރު އޮތީ ޕޮއިންޓެއްގެ ފަރަޤެކެވެ. ލީގުގެ ކުޅުން ދެން އޮންނާނީ މިމަހުގެ 14 ވަނަ ދުވަހުގެ ރެއެވެ. ވާދަކުރާނީ ސަސްއާއި ދަ ގްރާންޑޭއެވެ.