ރާއްޖެޓީވީއިން ގެނެސްދޭ ރިއަލިޓީ ޝޯވް "ޕެޓްރޯލް އޮފިސީ ސެލެބްރިޓީ ރޭސް" މިވަނީ ރަމަޟާން މަހު އެންމެ ގިނަ މީހުން އިންތިޒާރުކުރާ އެއް ޝޯވްއަށް ވެފައެވެ. މި ޝޯވްގެ ފުރަތަމަ އެޕިސޯޑު ދައްކާފައިވާއިރު، 40 ހާހާއި ގާތް ކުރާ އަދަދަކަށް ހަމައެކަނި ފޭސްބުކް މެދުވެރިކޮށްވެސް މި ޝޯވް ބަލާފައިވެއެވެ.

މި އެޕިސޯޑު ދެއްކުމުގެ ކުރިން އެޕިސޯޑުގެ ޓްރެއިލަރެއް ސެލެބްރިޓީ ރޭސް ފޭސްބުކް ޕޭޖުން އާންމުކުރިއެވެ. އެގޮތުން 90 އިންސައްތަ ބައިވެރިން ވޯޓު ދިނީ އެއް ބައިވެރިއަކު އެލިމިނޭޓް ކުރަންކަމަށް ޕްރޮގްރާމްގެ ހޯސްޓް އިއުލާނުކުރާ މަންޒަރު އެ ޓްރެއިލަރުން ފެނިގެން ދިޔައެވެ.

މި ޝޯވްގެ ފުރަތަމަ އެޕިސޯޑު ބުރާސްފަތި ދުވަހުގެ ރޭ 11:00 ގައި ދައްކާފައިވާއިރު، ޝޯވްގެ ޗެލެންޖުތަކަށް ފަހު، ދެން ކުރިއަށް ދިޔައީ ޝޯވްގެ އެލިމިނޭޝަން ރައުންޑެވެ. އެގޮތުން 90 އިންސައްތަ ބައިވެރިން އެލިމިނޭޓް ކުރުމަށް ދިނީ އެކްޓްރެސް ފަރީލާގެ ނަމެވެ. އެހެންނަމަވެސް، އެޕިސޯޑު ނިމިގެން ދިޔައިރު ޝޯވްގެ ފަރާތުން ނިންމީ އެ ހަފްތާގައި އެއްވެސް ބައިވެރިއަކު އެލިމިނޭޓް ނުކުރުމަށެވެ.

މިއަހަރުގެ ޝޯވްގައި ރާއްޖޭގެ މަޝްހޫރު ފިލްމީ ތަރިންގެ އިތުރުން، މޮޑެލިންގ ދާއިރާއިން މަޝްހޫރު ފަރާތްތަކާއި، ޓީވީ ޝޯވް ހުށައަޅައިދޭ ފަރާތްތައްވެސް ބައިވެރިވެއެވެ. އެގޮތުން ރިޝްމީ، އައްޒަ، ފުބޫ، ރޯމަން، ދޮނާ، އިފްނާޒް އަދި ފަރީލާގެ އިތުރުން، މޮޑެލިންގ ދާއިރާގައި ޙަރަކާތްތެރިވާ ނޫރު އަދި ޓީވީ ޝޯވް ހުށައެޅުންތެރިންގެ ތެރެއިން ޝަބާ އަދި ސުހާ އާއި، ކޮރިއޯގްރަފީގެ ދާއިރާއިން މަޤްބޫލު ރިޗާރޑު މިފަހަރުގެ ސީޒަންގައި ފެނިގެންދެއެވެ.

މިހާރު ޕެޓްރޯލް އޮފިސީ ސެލެބްރިޓީ ރޭސްގެ ދެވަނަ އެޕިސޯޑުގެ ޓްރެއިލަރެއް އާންމު ކޮށްފައިވާއިރު، ޓްރެއިލަރުން ޝޯވްގެ ބައެއް ބައިވެރިން ވަރަށް ބޮޑަށް ހޮޑުލާ މަންޒަރު ފެނެއެވެ. ހަމައެއާއެކު، ކޮންމެސް ބައިވެރިއަކަށް ކަމެއް ދިމާވެގެން އޭނާ އަތްދަނޑިމައްޗަށް ނަގައިގަނެގެން ދެން ތިބި ބައިވެރިން ދާ މަންޒަރު ފެނެއެވެ.

ދެން ފެނިގެންދަނީ ދެވަނަ އެޕިސޯޑުގެ އެލިމިނޭޝަން ރައުންޑުގެ މަންޒަރެކެވެ. އެގޮތުން ޕްރޮގްރާމް ހޯސްޓު "އެއީ ހުސް ދޮގު" ކަމަށް ތަކުރާރުކޮށް ބުނާ މަންޒަރު ފެނެއެވެ. އޭގެ ޖަވާބުގައި ފަރީލާ "އެއީ ތެދެއް" ކަމުގައި ބުނި ނަމަވެސް، ހޯސްޓު ތަކުރާރުކޮށް ބުނަމުން ގެންދިޔައީ އެއީ ހުސް ދޮގު ކަމަށެވެ.

ކޮންމެއަކަސް، ފުރަތަމަ އެޕިސޯޑުގެ ޓްރެއިލަރު އާންމުކުރިއިރު، އެންމެންނަށްވެސް އުފެދުނު ސުވާލަކީ 90 އިންސައްތަ ބައިވެރިން ވޯޓު ދިނީ ކާކު އެލިމިނޭޓް ކުރަންތޯއެވެ. ފުރަތަމަ އެޕިސޯޑުން އޭގެ ޖަވާބު ލިބިގެންދިޔައިރު، މިހާރު އެންމެންނަށްވެސް އުފެދިފައިވާ ސުވާލަކީ ދޮގު ހެދީ ކާކުތޯއެވެ؟ ނުވަތަ ހެދީ ކޮން ދޮގެއްތޯއެވެ؟ އެންމެންވެސް މިހާރު އިންތިޒާރު ކުރަމުންދަނީ މިހަފްތާގެ ބުރާސްފަތި ދުވަހުގެ ރެއަށެވެ. ދެވަނަ އެޕިސޯޑު ދެއްކުމަށް ހަމަޖެހިފައިވަނީ ބުރާސްފަތި ދުވަހުގެ ރޭ 11:00 ގައެވެ.