މިއީ ދިވެހި ފުޓްބޯޅައަށް ލިބުނު ކާމިޔާބެއް: ފެސްކޯ

އޭއެފްސީ ކަޕްގެ ޕްލިމިނަރީ ފުރަތަމަ މެޗުން ބޫޓާންގެ ޕަރޯ އެފްސީގެ މައްޗަށް ވެލެންސިއާއިން ކުރި ހޯދުމަކީ ދިވެހި ފުޓްބޯޅައަށް ލިބުނު ކާމިޔާބެއްގެ ގޮތުގައި ވެލެންސިއާގެ ހެޑް ކޯޗު އަހުމަދު މުޖުތަބާ (ފެސްކޯ) ފާހަގަކޮށްފިއެވެ.

ޕްރިލިމިނަރީގެ ފުރަތަމަ މެޗުގައި ޕަރޯ އެފްސީގެ މައްޗަށް ވެލެންސިއާއިން ކުރި ހޯދީ 2-1 ގެ ނަތީޖާއަކުންނެވެ. މެޗުގެ ފުރިހަމަ ވަގުތު ނިމުނުއިރު 1-1 ގެ ނަތީޖާއަކުން ދެޓީމު އެއްވަރުވުމުން ނަތީޖާ ނެރުނީ ޕެނަލްޓީ ޖަހައިގެންނެވެ. މި މެޗަށްފަހު އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން ފެސްކޯ ބުނީ މިއީ ހަމައެކަނި ވެލެންސިއާއަށް ލިބުނު ކުރިއެރުމެއް ނޫން ކަމަށެވެ. އޭގެ ބަދަލުގައި މިއީ މުޅި ދިވެހި ފުޓްބޯޅައަށް ލިބުނު ކާމިޔާބެއް ކަމަށެވެ.

ރޯދަ މަހުގެ ކުރީ ކޮޅުގައި މި މެޗަށް ނިކުތް އިރު ވެލެންސިއާ ކުޅުންތެރިންގެ ފަރާތުން ރޯދަ ވަރުބަލިކަން ފެނުނެެވެ. އަދި އަނިޔާގެ ސަބަބުން ޓީމުގެ ކެޕްޓަން އަލީ ފާސިރު (ސެންޓޭ) ފަދަ މުހިންމު ކުޅުންތެރިންނަށްވެސް މި މެޗުގައި ނުކުޅެވުނެވެ. ފެސްކޯ ބުނީ މި ހުރިހާ ކަމަކަށްވުރެ ބޮޑަށް އޭނާގެ ސަމާލުކަން އޮތީ ޕްރިލިމިނަރީގެ ދެވަނަ ބުރުގައި ބަންގްލަދޭޝްގެ ޑާކާ އަބަހާނީއާ ދެކޮޅަށް ކުޅެންޖޭ މެޗަށް ކަމަށެވެ.

ދިވެހި ޕްރިމިއާ ލީގުގެ ދެވަނަ ބުރުގެ ފުރަތަމަ މެޗުގައި ވެލެންސިއާއިން ޓީސީ ސްޕޯޓްްސް ކްލަބާއި ބައްދަލުކުރަން ޖެހޭނީ މިމަހުގެ ނުވަ ވަނަ ދުވަހުއެވެ. މި މެޗަށްފަހު ޕްރިލިމިނަރީގެ ދެވަނަ މެޗުގައި އަބަހާނީއާ ދެކޮޅަށް ކުޅެން ޖެހޭނީ މި މަހުގެ 12 ވަނަ ދުވަހުއެވެ. މި މެޗު ކުޅުމަށްޓަކާ ޓީމުން ދިގު ދަތުރެއް ކުރަން ޖެހޭނެއެވެ. ފެސްކޯ ބުނީ ކައިރި ކައިރީގައި މެޗުތަކެއް ކުޅެން ޖެހުމުން އޭގެ ނެދެވޭ އަސަރު ޓީމަށް ކުރާނެ ކަމަށެވެ. އެހެންކަމުން ޕްރިމިއަރ ލީގު މެޗު ތާވަލަށް ބަދަލުތަކެއް ގެނެސް ޓީމަށް ފަސޭހަ ގޮތްތަކެއް އިންތިޒާމު ކޮށްދިނުމަށް ފެސްކޯ އެދުނެވެ.

ރޭ ކުޅުނު މެޗާއި ގުޅޭ ގޮތުން ފެސްކޯ ބުނީ ޓީމުގެ ކުޅުމާއި މެދު ހިތްހަމަޖެހޭ ކަމަށެވެ. އަދި ގިނަ ވަގުތު މެޗުގެ ކޮންޓްރޯލް އޮތީ ވެލެންސިއާ އަތުގައިކަން ފާހަގަކޮށް ފެސްކޯ ބުނީ މެޗަށް ތައްޔާރުވިއިރު، ވެލެންސިއާ އިން ޕްލޭންކުރި ގޮތަށް ގިނަ ކަންކަން ދިޔަ ކަމަށެެވެ.

ފެސްކޯ ބުނީ މެޗުގައި ޓީމުގެ ކެޕްޓަން ބޭންޑު ގޯލްކީޕަރު ތޮލާލް ހަސަން (ޓޮޕްލަކް) އަށް ދިނީ ވަރަށް އިތުބާރު އޮތުމުން ކަމަށެވެ. ސެންޓޭއަށް އަނިޔާވި ހިސާބުން އެކި ކުޅުންތެރިންނަށް ކެޕްޓަންކަމުގެ ޒިންމާ ހަވާލު ކުރަމުން އަންނައިރު، ޓީމުގެ ކޮންމެ ކުޅުންތެރިއަކީވެސް ލީޑަރެއްގެ ގޮތުގައި ފެސްކޯ ފާހަގަ ކުރިއެވެ. ރޭގެ މެޗުގައި ޓޮޕްލަކް ވަނީ މޮޅު ކުޅުމެއް ދައްކާ ރަނގަޅު ސޭވްތަކެއް ކޮށްފައެވެ.