ގްރޫޕް ސްޓޭޖަށް ދިޔުމަށް ވެލެންސިޔާއިން ފުރަތަމަ ފިޔަވަޅު ގިރާކޮށްފި

އޭއެފްސީކަޕް ގްރޫޕް ސްޓޭޖުން ޖާގަ ހޯދުމަށް ކްލަބް ވެލެންސިޔާއިން ފުރަތަމަ ފިޔަވަޅު ގިރާކޮށްފިއެވެ. ވެލެންސިޔާއިން ފުރަތަމަ ފިޔަވަޅު ގިރާކުރީ ޕްރިލިމިނަރީ މަރުހަލާގެ ފުރަތަމަ ބުރުގައި ބޫޓާންގެ ޕަރޯ އެފްސީ ބަލިކޮށްގެންނެވެ.

ޕްރިލިމިނަރީ މަރުހަލާގެ ދެވަނަ ބުރުން ވެލެންސިޔާ ޖާގަ ހޯދީ ގަލޮޅު ރަސްމީ ފުޓްބޯޅަ ސްޓޭޑިއަމްގައި 2-1 ން ޕަރޯ އެފްސީ ބަލިކޮށްގެންނެވެ. މެޗުގެ ފުރިހަމަ ވަގުތު 1-1 ން ދެޓީމް އެއްވަރުވުމުން ނަތީޖާ ނެރުނީ 15 މިނިޓްގެ ދެހާފް ކުޅެގެންނެވެ. މެޗުގެ ފުރަތަމަ ހާފްގައި ވެލެންސިޔާއަށް ކުރި ހޯދައިދިނީ އަބުދުالله ޔާމީންއެވެ. ގޯލް އޭރިޔާ ބޭރުގައި ހުރި ޔާނުއަށް ބޯހާސް ޖައްސާލި ބޯޅަ ފޮނުވާލީ ގޯލްގެ އިރުމަތީ ފަރާތު މަތީ ކަނަށެވެ. އެބޯޅަ ގޯލަށް ވަންއިރު ޕަރޯ އެފްސީގެ ކީޕަރަށް ހުރެވުނީ ބަލަހައްޓައިގެންނެވެ. އެކަމަކު ޕަރޯ އެފްސީން ވަނީ މާގިނައިރެއް ނުވެ ނަތީޖާ ހަމަހަމަކޮށްފައެވެ. ކޯނަރަކުން ގޯލް ކުރިމައްޗަށް ހުރަސްވި ބޯޅަ ބޮލުން ޖަހާ ނަތީޖާ ހަމަހަމަކޮށްދިނީ މެކްސްވެލް އެލޮންއެވެ. ފުރަތަމަ ހާފްގައި އޭނާ ފޮނުވާލި ބޯޅައެއް ވެލެންސިޔާގެ ގޯލް ބެލެހެއްޓި ޠޮލާލް (ޓޮޕްލަކް) މަތަކުރިއެވެ. ދެވަނަ ހާފްގައިވެސް އޭނާ ރަނގަޅު ބޯޅައެއް ފޮނުވާލިއެވެ.

ފުރަތަމަ ހާފް ނިމެނިކޮށް, ވެލެންސިޔާގެ ބޯހާސްއަށް ލިބުނު ފުރުޞަތުވެސް ބޭނުން ނުކުރެވުނެވެ. އޭރިޔާ ތެރޭ ހުރެ ދެފަހަރު މަތިން އޭނާ މަސައްކަތްކުރީ ޕަރޯ އެފްސީ ކުޅުންތެރިން ނައްޓާފަ ބޯޅަ ފޮނުވާލާށެވެ. ދެވަނަ ހާފްގައި ޔާން ފޮނުވާލި ބޯޅައެއް ޕަރޯ އެފްސީ ކުޅުންތެރިއަކު އަތުގައި ޖެހުމުން ވެލެންސިޔާއިން ޕެނަލްޓީއަކަށް ވަރަށް ބޮޑަށް އެޕީލް ކުރިއެވެ. އެކަމަކު މެޗުގެ ރެފްރީ އެންގީ ކުޅުން ކުރިއަށް ގެންދާށެވެ. މެޗުގެ ފުރިހަމަ ވަގުތުހަމަވާން 5 މިނިޓަށް ވެފައިވަނިކޮށް ޕެރޯގެ ޔެޝީ ފޮނުވާލި ބޯޅަ ދިޔައީ ހުރަސް ދަނޑީގެ ކުޑަތަންކޮޅެއް މަތިންނެވެ.

ނަތީޖާ ނެރުމަށް ކުޅުނު 15 މިނިޓްގެ ދެހާފްގެ ތެރެއިން ފުރަތަމަ ހާފް ފަށައިގެން މިދުހަތު ފަހުމީ (ބިޗަޑް) ފޮނުވާލި ރަނގަޅު ބޯޅައެއް ޕަރޯގެ ކީޕަރު ދިފާއުކުރިއެވެ. ވެލެންސިޔާއިން މިހާފްގައި ލަނޑު ޖެހީ ޔާނު ތަނަވަސްކޮށްދިން ފުރުޞަތެއްގައި ބޯހާސްއެވެ. ކްލަބް ލެެވެލްގައި ޔާނުގެ ބައިނަލްއަޤްވާމީ ފުރަތަމަ މެޗުގައި އޭނާގެ ފަރާތުން ރަނގަޅު ކުޅުމެއް ފެނުނެވެ. ގޯލް ޖެހުމުގެ އިތުރުން އެހެން ކުޅުންތެރިންނަށް ފުރުޞަތުތައް ތަނަވަސްކޮށްދިނެވެ.

ކޮލިފައިންގ ދެވަނަ ބުރުގައި ވެލެންސިޔާ ވާދަކުރަން ޖެހޭނީ ބަންގްލަދޭޝްގެ ޑާކާ އަބަހާނީއާއެވެ. މިމަހުގެ 12 ވަނަ ދުވަހު އެމެޗު ކުޅޭނީ ބަންގްލަދޭޝްގައެވެ. އެމެޗުން މޮޅުވެގެން އަދި ގްރޫޕް ސްޓޭޖްގެ ޖާގަ ހޯދަން ޕްލޭއޮފް މެޗެއް ކުޅެން ޖެހޭނެއެވެ.