ބަޔާންގެ މައްސަލަ ބެލުމަށް ފްރެއިބާގް އިން ހުށަހަޅައިފި

ބުންޑަސްލީގާގައި ބަޔާން މިއުނިކާއި އެސްސީ ފްރެއިބާގް ބައްދަލުކުރި މެޗުގައި ބަޔާން އިން ކުޑަ ވަގުތުކޮޅަކަށް 12 ކުޅުންތެރިން ދަނޑަށް އަރުވައިގެން ކުޅުނު މައްސަލަ ބެލުމަށް ފްރެއިބާގް އިން ހުށަހަޅައިފިއެވެ.

ބަޔާންއިން 12 ކުޅުންތެރިން އެރުވީ މެޗުގެ 85 ވަނަ މިނެޓުގައެވެ. ބަޔާންއިން ދެ ބަދަލެއް އެވަގުތު ގެނައެވެ. ބަދަލު ކުޅުންތެރިންގެ ގޮތުގައި ކުޅެން އެރީ ނިކްލަސް ސުލޭ އާއި މާސެލް ސަބިޓްޒަރއެވެ. ނަމަވެސް ދަނޑުން ފައިބާފައިވަނީ ކޮރެންޓިން ޓޮލީސޯ އެކަންޏެވެ. ދެން ފައިބަން ހަމަޖެހިފައި އޮތީ ކޯމަންއެވެ. ނަމަވެސް ބަދަލު ރެފްރީއަށް އޮޅިގެން ނުބައި ނަންބަރެއް ދެއްކުމުން ކޯމަންއަށް ފައިބަން ނޭންގުނީ ކަމަށް ބަޔާންއިން ބުންޏެވެ.

މިކަން ރެފްރީއަށް އެނގުނީ ވީއޭއާރު މެދުވެރިކޮށް މެޗުގެ 87 ވަނަ މިނެޓުގައެވެ. އަދި މި މައްސަލަ އިތުރަށް ބެލުމަށް ގިނަ ވަގުތުތަކެއް ހޭދަކުރުމަށްފަހު މެޗުގެ ބާކީ ބައި ވަނީ ކުޅެފައެވެ.

ފްރެއިބާގްއިން ނެރުނު ބަޔާނެއްގައި ބުނެފައި ވަނީ މެޗުގެ ސައްހަކަމާމެދު ސުވާލު އުފެދޭތީ، އެމެޗުގެ މައްސަލަ ބެލުމަށް އެ ކްލަބުން ހުށަހަޅާފައިވާ ކަމަށެވެ. އަދި މި މައްސަލައިގައި އެޓީމުގެ އެއްވެސް ޒިންމާއެއް ނެތް ނަމަވެސް ލީގުގެ ގަވައިދުތައް ހެދިފައިވާ ގޮތުގެ ސަބަބުން، ކްލަބަށް މި ޖެހުނީ މައްސަލަ ބަލައިދިނުމަށް އެދި ހުށަހަޅަން ކަމަށްވެސް ބަޔާނުގައިވެއެވެ.

މި މައްސަލަ ބަލާނީ ޖަރުމަނުގެ ފުޓްބޯޅަ އެސޯސިއޭޝަނުންނެވެ.