މި ރަމަޟާން މަހު ސީރިއާގައި ކާނާއަށް ޖެހިފައިވާ އެތައް ބައެއް

ހަނގުރާމައެއްގެ ސަބަބުން އެންމެ ބޮޑަށް ހާލުގައި ޖެހުނު އެއް ބަޔަކީ ސީރިޔާގެ ރައްޔިތުންނެވެ. އަދި ހަނގުރާމައެއްގެ ސަބަބުން ބައެއްގެ އިންސާނީ ހައްގުތައްވެސް އެންމެ ބޮޑަށް ގެއްލިގެންގޮސްފައިވަނީ މި ހަނގުރާމައިގައެވެ. މި ހަނގުރާމަ އަދިވެސް ކުރިއަށްދާއިރު ހަނގުރާމައިގައި އެ ގައުމުގެ 13 މިލިއަން މީހުން ހާލުގައި ޖެހުނެވެ. އަދި ކައިރި ގައުމުތަކަށް ރެފިއުޖީންގެ ގޮތުގައި 5.6 މިލިއަން މީހުން ވަނީ ގޮސްފައެވެ. ބާކީ މީހުންނަށް ވީނުވީއެއް ނޭނގެއެވެ.

2011 ވަނަ އަހަރު ފެށި ހަނގުރާމައިގެ ކުރިން ސީރިއާއަކީ އެތައް ކަމަކުން މުއްސަނދި ގައުމެކެވެ. އެގައުމަށް ލިބިފައިވާ ގުދުރަތީ ޚާއްސަ ރީތިކަމާއި ސަގާފަތާއި އާދަކާދަތައް ފާހަގަކޮށްލެވެއެވެ. އެގައުމުގެ ރައްޔިތުންނަކީ ގަދަރުވެރި ދިރިއުޅުމެއް އުޅެމުންދިޔަ ބައެކެވެ. އެގައުމުގެ އިގްތިސާދުވެސް ވަރަށް ރަނގަޅެވެ. ސީރިއާގައި ކުރިއަށްދާ ހަނގުރާމައަށް 10 އަހަރަށް ވުރެގިނަދުވަސް ވެފައިވާއިރު، މިއަދު އެގައުމުން މިއިން އެއްވެސް ކަމެއް ފެންނާކަށް ނެތެވެ. މުޅި ގައުމު ފެންނަނީ ތަފާތުކޮށެވެ. އެގައުމުގައި އޮތް ސަގާފަތާއި އާދަކާދަތަކެއް މިއަދަކު ނެތެވެ. ރައްޔިތުންގެ އަތްމަތި ދަށްޗެވެ. ގައުމުގެ އިގްތިސާދީ ހާލަތުވެސް ވަރަށް ދައްޗެވެ.

މި ހަނގުރާމައަށް ނިމުމެއް ނައިސް، ގައުމުގެ ހާލަތު ވަރަށް ދަށްވެފައިވާ ދަނޑިވަޅެއްގައި މި ވަނީ ރަމަޟާން މަހަކާ ކުރިމަތިލާންޖެހިފައެވެ. ގިނަ ބަޔަކު ދަތި ހާލަތުގައި އުޅެމުންދާއިރު، އެމީހުންނަށް ރޯދަ ވީއްލުން ފޯރުކޮށްދިނުމަށް މަސައްކަތްކުރާ އެކި ފަރާތްތައް އުޅެއެވެ. މިގޮތަށް ސީރިއާގައި މަސައްކަތްކުރާ އެއް ބަޔަކީ ސައީދު އެސޯސިއޭޝަންގެ ނަމުގައި މަސައްކަތްކުރަމުންދާ ޖަމިއްޔާއެކެވެ. އެހެންނަމަވެސް އެމީހުންނަށްވެސް ވަނީ މި މަސައްކަތަށް ބޭނުންވާ ތަކެތި ހޯދުމަށް ދަތިވެފައެވެ. ތަކެތީގެ އަގުތައް އެގައުމުގައި އިންތިހާއަށް އުފުލިފައިވާތީއެވެ.

ރޮއިޓަރސްއާ ވަހަކަދައްކަމުން ސައީދު އެސޯސިއޭޝަންގެ ވެރިޔާ އިއްސާމް ހައްބާލް ބުނީ މިދިޔަ މަހު މި މަސައްކަތުގެ ތައްޔާރީތައް ފަށާފައިވާކަމަށެވެ. އިއްސާމް ބުނީ ސީރިއާގެ އިގްތިސާދީ ހާލަތާއި، ޔޫކްރެއިންގައި ކުރިއަށްދާ ހަނގުރާމައިގެ ސަބަބުން އެގައުމުގެ ގިނަ މީހުންނަށް ރޯދަ ވީއްލާ ގަޑިއަށް ކާނެ އެއްޗެހި ހޯދުމަށް ދަތިވެފައިވާކަމަށެވެ. އެހެންކަމުން އެ ޖަމިއްޔާއިން ގެންދަނީ ބޭނުންޖެހިފައިވާ މީހުންނަށް ރޯދަވީއްލުން ފޯރުކޮށްދެމުންނެވެ. އޭނާގެ މި މަސައްކަތަށް މިއަހަރުގެ ކުރީކޮޅު ދުނިޔޭގެ އެކި ކަންކޮޅުތަކުން އެހީ ފޯރުކޮށްދީފައިވާކަމަށް އޭނާ ބުނެފައިވެއެވެ.

އޭނާ ބުނީ ރޯދަ ވީއްލުމަށް ބޭނުންވާ ގިނަ ތަކެތި މިހާރު އެގައުމުން ލިބެން އެބަހުރި ކަމަށެވެ. އެހެންނަމަވެސް ތަކެތީގެ އަގު ބޮޑު ކަމުން ގިނަ މީހުންނަށް އެ އެއްޗެހި ގަނެ، ބޭނުންކުރުމުގެ ނަސީބު ލިބިފައިނުވާކަމަށް އިއްސާމް ބުނެފައިވެއެވެ. އެ ޖަމިއްޔާއިން މީގެ ކުރިން އެކި ބާވަތްތަކުގެ ކާނާ ފޯރުކޮށްދީފައިވާކަމަށް އިއްސާމް ބުނެފައިވެއެވެ. އެހެންނަމަވެސް ތަކެތީގެ އަގު ބޮޑުވުމުން އެކި ބާވަތްތައް ތައްޔާރުކުރަން ވެސް މިހާރު ދަތިކަމަށް އޭނާ ބުނެފައިވެއެވެ.

ސީރިއާގައި ކާނާގެ ދަތިކަން އިންތިހާއަށް ބޮޑުވެފައިވާއިރު އެހީއަށް ބޭނުންވެފައިވާ މީހުންގެ އަދަދު 14 މިލިއަނުން މައްޗަށް މިހާރު ވަނީ އަރާފައެވެ. އަދި ސީރިއާގައި ދިރިއުޅެމުންދާ 18 މިލިއަން މީހުންގެ ތެރެއިން ތިންބައިކުޅަ ދެބައި މީހުންނަކީ ކާނާގެ ދަތިކަމާ ކުރިމަތިލާންޖެހިފައިވާ މީހުން ކަމަށް ޔޫއެން އިން ވެސް އަންދާޒާކޮށްފައިވެއެވެ.