ގުރައިދޫ މަރުކަޒު: މިދިޔަ އަހަރު ރަނގަޅުކުރުމަށް ހުށަހެޅި 80 އިންސައްތަ މަސައްކަތް ކުރެވިފައިވޭ
މިހާރު ނުކުރެވި ހުރި މަސައްކަތަކީ ބަޖެޓްގެ ދަތިކަމާއި ގުޅިގެން ނުކުރެވި ހުރި މަސައްކަތް
ޖެންޑަރ މިނިސްޓްރީގެ ދަށުން ހިންގަމުންދާ ގުރައިދޫ މަރުކަޒު
ގުރައިދޫ މަރުކަޒާއި ގުޅޭގޮތުން ރަނގަޅު ކުރުމަށް ހުށަހަޅާފައިވާ ކަންކަމަށް ވަގުތުން ފިޔަވަޅު އަޅާ ކަމަށާއި، މިދިޔަ އަހަރުގެ ތެރޭގައި ރަނގަޅުކުރުމަށް ހުށަހެޅި 80 އިންސައްތަ މަސައްކަތް ކުރެވިފައިވާ ކަމުގައި ޖެންޑަރ މިނިސްޓްރީން ބުނެފިއެވެ.
ގުރައިދޫގައި ހުންނަ މަރުކަޒު ބެހެލެއްޓުމާއި ގުޅޭގޮތުން ރާއްޖެޓީވީގައި ވާހަކަފުޅުދައްކަވަމުން ޖެންޑަރ މިނިސްޓްރީގެ ޕާމަނަންޓް ސެކްރެޓަރީ ޒައުފިޝަން އަބްދުﷲ ކަމާލުއްދީން ވިދާޅުވީ މިނިވަން މުއައްސަސާތަކުން މަސައްކަތްތައް މޮނިޓަރު ކުރުމަކީ މަސައްކަތް އިތުރަށް ހަރުދަނާ ކުރަން ލިބޭ ފުރުސަތެއް ކަމަށެވެ. މީހުން ބަލަހައްޓަމުންދާ މަރުކަޒުތަކާއި ގުޅޭގޮތުން ތައްޔާރުކޮށް އާއްމުކުރާ ރިޕޯޓުތަކަށް ވަގުތުން ފިޔަވަޅު އަޅާކަން ފާހަގަކުރައްވާ ޒައުފިޝަން ވިދާޅުވީ 2021 ވަނަ އަހަރުގެ ތެރޭގައި އެޗްއާރްސީއެމުން ތައްޔާރުކުރި ރިޕޯޓުގައި ރަނގަޅުކުރަން ކުރި ކަންކަމުގެ ތެރެއިން 80 އިންސައްތަ މަސައްކަތް ނިންމާފައިވާ ކަމަށެވެ. މިހާރު ނުކުރެވި ހުރި މަސައްކަތަކީ ބަޖެޓްގެ ދަތިކަމާއި ގުޅިގެން ނުކުރެވި ހުރި މަސައްކަތް ކަމަށް އޭނާ ވިދާޅުވިއެވެ.
ޒައުފިޝަން ވިދާޅުވީ މިއަހަރުގެ ބަޖެޓް އެކުލަވާލަން ފޮނުވިއިރު އެފަދަ ކަންކަމަށް ރިޔާއަތްކޮށްފައިވާ ކަމަށާއި، 2021 ވަނަ އަހަރުގެ ތެރޭގައި ރަނގަޅުކުރަން އެންގި ކަންކަމަށްވުރެ މިއަހަރުގެ ތެރޭގައި ރަނގަޅުކުރަން އެންގި ކަންކަން މަދުވެފައިވާ ކަމަށެވެ.
2021 ވަނަ އަހަރުގެ ތެރޭގައި ރަނގަޅުކުރުމަށް އެންގި އެންގުންތަކާއި ގުޅޭގޮތުން ޖެންޑަރ މިނިސްޓްރީގެ ޑިރެކްޓަރ އޮފް ކުއަލިޓީ އެޝިއުރަންސް އެންޑް މެނޭޖްމަންޓް އޮފް ސްޓޭޓް ކެއަރ އިންސްޓިޓިއުޝަންސްގެ އައިޝަތު ނާޒް ވިދާޅުވީ މިދިޔަ އަހަރުގެ ތެރޭގައި އެޗްއާރްސީއެމުން އެކަނި ވެސް 30 ކަމެއް ރަނގަޅު ކުރުމަށް ހުށަހަޅާފައިވާ ކަމަށެވެ. ނަމަވެސް މިއަހަރުގެ މާޗް މަހު ކުރިއަށް ގެންދިޔަ އިންސްޕެކްޝަންގައި ރަނގަޅު ކުރުމަށް ހުށަހަޅާފައިވަނީ 6 ކަމެއް ކަމަށް ނާޒް ވިދާޅުވިއެވެ. މިއީ މަސައްކަތްތަށް ރަނގަޅުކުރުމުގެ ނަތީޖާގެ ގޮތުގައި ނާޒް ފާހަގަކުރެއްވިއެވެ.
މީގެ އިތުރުން ނާޒް ވިދާޅުވީ 2022 ގެ ބަޖެޓް އެކުލަވާއިރު ނުކުރެވި ހުރި މަސައްކަތްތައް ކުރުމަށް އެބައި ހިމަނާފައިވާ ކަމަށެވެ.
އެހެންކަމުން ކުރިއަށް އޮތްތަނުގައި އެމަސައްކަތްތައް ކުރެވިގެންދާނެ ކަމަށް އޭނާ ވިދާޅުވިއެވެ.
