ރަފީނިއާ ބާސެލޯނާ އާއެކު ފަސް އަހަރުގެ ކޮންޓްރެކްޓެއް ހަދާފާނެ!

ލީޑްސް ޔުނައިޓެޑްގެ ތަރި ރަފީނިއާ، މިއަންނަ ސީޒަންގައި ސްޕެއިންގެ ބާސެލޯނާއާއެކު ފަސް އަހަރުގެ ކޮންތްރެކްޓެއް ހަދާނެކަމަށް ރިޕޯޓުތައް އަންދާޒާކޮށްފިއެވެ.

ރިޕޯޓުތައް ބުނާގޮތުން ކުރިއަށް އޮތް ސަމަރ ޓްރާންސްފާގައި ބާސެލޯނާ އާއި ގުޅޭނެކަމުގެ ޔަގީންކަން އޭނާ ވަނީ ބާސެލޯނާއަށް ދީފައެވެ. އަދި ޕަރސަނަލް ޓަރމް ތަކަށް މިހާރު ދެފަރާތުން އެއްބްސްވެފައިވާ ކަމަށްވެސް ރިޕޯޓުތައް ބުނެއެވެ.

ނަމަވެސް ބާސެލޯނާއިން ރަފީނިއާ ހޯދުމަށް މިހާތަނަށް ރަސްމީކޮށް ލީޑްސް ޔުނައިޓެޑްއަށް ހުށަހަޅާފައެއް ނުވެއެވެ. ލީގުން ރެލިގޭޓްވުމާއި ގާތުގައި ޓީމު މިވަގުތު އޮތުމުން ލީޑްސް ޔުނައިޓެޑްގެ ހުރިހާ ސަމާލުކަމެއް މިހާރު އޮތީ ޓީމު ރެލިގޭޝަނުން ސަލާމަތް ކުރުމަށެވެ.

ރަފީނިއާ އާއެކު ލީޑްސްއިން ހަދާފައިވާ އެއްބަސްވުމުގެ މުއްދަތު ހަމަވާނީ 2024 ވަނަ އަހަރަށެވެ. މިހާތަނަށް ލީޑްސްގައި 28 މެޗު ކުޅެ ރަފީނިއާ ވަނީ 12 ލަނޑު ޖަހާފައެވެ. ޓީމު ރެލިގޭޝަނުން ސަލާމަތް ކުރުމަށް ކުރާ މަސައްކަތުގައިވެސް އޭނާގެ ދައުރު ބޮޑެވެ.

ރަފީނިއާ ގަތުމަށް ގާތްގަނޑަކަށް 40 މިލިއަން ޔޫރޯ ބާސާއިން ޚަރަދުކުރަން ޖެހޭއިރު، އޭނާއަކީ ބާސާގެ ކޯޗު ޒަވީ ހެނާންޑޭޒް މިހާރު ފާރަލަމުން އަންނަ އެންމެ މުހިންމު އެއް ކުޅުންތެރިޔާއެވެ. އެނާ ގަތުމަށް ޓީމުން ކުރަންޖެހޭ ޚަރަދުތައް ކުޑަ ކުރުމަށް ޓީމުގެ ޑިފެންޑަރު އޮސްކަރ މިންގުއޭޒާ ލީޑްސްއަށް ދިނުމަކީ އެކަށީގެންވާ ކަމެކެވެ.

ބާސެލޯނާގެ ޚަރަދުތައް ބޮޑުވެފައި ވާތީ މިފަހަރުގެ ޓްރާންސްފަރ މާކެޓުގައި ކުޅުންތެރިން ގަތުމަށްޓަކައި ޓީމުން އަންނަނީ ޚަރަދުތައް ކުޑަ ކުރެވޭނެ ގޮތްތައް ބަލަމުންނެވެ.