ލުހާންސްކްއަކީ ރަޝިއާގެ ބަޔަކަށް ހެދުމަށް ރިފެރެންޑަމް އަކަށް ހިނގައިދާނެކަމުގެ އިޝާރާތެއް
ލުހާންސްކައި މިހާރު އޮންނަ އަމިއްލަ ސަރުކާރަކީ ރަޝިއާ ސަރުކާރުން ވާގިވެރިވާ ސަރުކާރެއް
ހަނގުރާމަ ހުއްޓުމަކަށް ގެނައުމަށް ރަޝިއާއިން ހުށަހަޅާފައިވާ ޝަރުތުތަކުގެ ތެރޭހައި ލުހާންސްކާއި ޑޮނެސްކްއަކީ މިނިވަން ދައުލަތެއްގެ ގޮތުގައި ބަލައިގަތުމަށް ރަޝިއާއިން ވަނީ ހުށަހަޅާފައި
ލުހާންސްކް އަކީ ރަޝިއާގެ ބަޔަކަށް ހެދުމަށް ރިފަރެންޑަމް އަކަށް ދިއުމުގެ ވިސްނުން ގެންގުޅޭ ކަމަށް ލުހާންސްކްގައި އަމިއްލަ ސަރުކާރު ގާއިމުކޮށްގެން އުޅޭ "ލުހާންސްކް ޕީޕަލްސް ރިޕަބްލިކް"ގެ ލީޑަރު ލިއޮނިޑް ޕެސެޝްނިކް ބުނެފިއެވެ.
އާދިއްތަ ދުވަހު ލިއޮނިޑް މިހެން ވިދާޅުވެފައިވާއިރު، ލުހާންސްކްގައި މިހާރު އޮންނަ އަމިއްލަ ސަރުކާރަކީ ރަޝިއާ ސަރުކާރުން ވާގިވެރިވާ ސަރުކާރެކެވެ. އަދި ރަޝިއާ- ޔޫކްރެއިން ހަނގުރާމަ ހުއްޓުމަކަށް ގެނައުމަށް ރަޝިއާއިން ހުށަހަޅާފައިވާ ޝަރުތުތަކުގެ ތެރޭހައި ލުހާންސްކް އާއި ޑޮނެސްކް އަކީ މިނިވަން ދައުލަތުގެ ގޮތުގައި ބަލައިގަތުމަށް ރަޝިއާއިން ވަނީ ހުށަހަޅާފައެވެ.
މި ދެސަރަހައްދަކީ މިނިވަން ދައުލަތްތަކެއްކަމަށް ރަޝިއާއިން ބަލައިގެންފައި ވަނީ މިދިޔަ މަހުފެށި ހަގުރާމައިގެ 3 ދުވަސް ކުރިންނެވެ.
ލިއޮނިޑް ވަނީ ކުރިއަށް އޮތްތާގައި ރިފަރެންޑަމްއެއް ބޭއްވުމަކީ ވުން އެކަށީގެންވާ ކަމެއް ކަމަށާއި، މިފުރުސަތު ރައްޔިތުންނަށް ދެވިއްޖެ ނަމަ، ރައްޔިތުންނަށް ލިބިގެންވާ ގާނޫނީ ބާރު ބޭނުންކޮށް ރައްޔިތުން ބޭނުންވާ ގޮތަށް މިކަން ނިމޭނެ ކަމަށް ވިދާޅުވެފައެވެ.
ރަޝިއާއިން ވަނީ މިދިޔަ މަހުގެ 24 ވަނަ ދުވަހު މިލިޓަރީ އޮޕަރޭޝަންގެ ނަމުގައި ޔޫކްރެއިނަށް ހަމަލާދޭން ފަށާފައެވެ. މި ހަމަލާ ބަދުލުކުރުންތަކަށް މިހާރު މަސް ދުވަހަށްވުރެ ގިނަވެފައިވާއިރު، އެމެރިކާއާއި ހުޅަނގުގެ ގައުމުތަކާއި އެގައުމުތަކަށް ވާގިވެރިވާ ގައުމުތަކުންނާއި، ޖަމްއިއްޔާ ޖަމާއަތްތަކާއި ކުންފުނިތަކުން ވަނީ ރަޝިއާއާ ދެކޮޅަށް ދަތިކުރުމުގެ ގިނަ ފިޔަވަޅުތަކެއް އަޅާފައެވެ.
