ސައުތު އޭޝިއަން ކްރޮސް ކަންޓްރީ ޗެމްޕިއަންޝިޕްގައި ރާއްޖެއިން ހަތަރު ވަނަ ކާމިޔާބުކޮށްފިއެވެ.

އިންޑިއާގެ ނާގަލެންޑުގައި މި ހަފްތާ ބަންދު ކުރިއަށް ގެންދިއަ މި މުބާރާތުގައި ރާއްޖެއިން ބައިވެރިވި އަންހެން އަދި ފިރިހެން ޓީމުންވެސް ވަނީ ހަތަރު ވަނަ ކާމިޔާބުކޮށްފައެވެ. މުބާރާތުގެ އެއްވަނަ އިންޑިއާއިން ކާމިޔާބު ކުރިއިރު، ދެވަނަ ހޯދީ ސްރީލަންކާ އިންނެވެ. ތިންވަނައަށް ދިޔައީ ނޭޕާލްއެވެ. ޖުމްލަ ފަސް ގައުމަކުން ބައިވެރިވި މި މުބާރާތުގެ ފުލުގައި އޮތީ ބަނގްލަދޭޝްއެވެ.

ރާއްޖޭގެ ޓީމުގެ ފިރިހެން ދުވުންތެރިންގެ ތެރޭގައި ހިމެނެނީ ނަސީރު ސްޕޯޓްސް ކްލަބްގެ ހުސައިން ފަޒީލް ހާރޫން އާއި މެރަތަން ރަނާސްގެ ދެ ދުވުންތެރިން ކަމަށްވާ އިރުފާން މުހައްމަދު އާއި މުހައްމަދު ރަޝީދުއެވެ. އަންހެން ދުވުންތެރިންގެ ތެރޭގައި ހިމެނެނީ މެރަތަން ރަނާސްގެ ދެ ދުވުންތެރިން ކަމުގައިވާ އާއިޝަތު ރާނިޔާ އާއި އާއިޝަތު ރިޝްމީގެ އިތުރުން ކުޑަހުސައިން ސްޕޯޓްސް އެސޯސިއޭޝަންގެ މަރިޔަމް ޢަބްދުލް ކަރީމްއެވެ.

މި މުބާރާތުގައި ރާއްޖޭގެ ޓީމަށް ކޯޗުކަން ކޮށްދޭނީ އެންމެ ގިނަ މެރަތަން ދުވުމުގެ ރެކޯޑު އޮތް ރާއްޖޭގެ ދުވުންތެރިޔާ ނަސްރުﷲ އަހުމަދުއެވެ. ރާއްޖޭގެ މެރަތަން ރަނާސްގެ ކޯޗަކީވެސް ނަސްރުއެވެ.

10 ކިލޯމީޓަރުގެ ފިރިހެން ދުވުމުގައި ވާދަކޮށް ރާއްޖެއިން އެންމެ ރަނގަޅު ނަތީޖާއެއް ނެރުނީ ހުސައިން ފަޒީލެވެ. އޭނާ ރޭސް ނިންމީ 36 މިނިޓް 07 ސިކުންނެވެ. މުހައްމަދު ރަޝީދު (މޯޑު) 36 މިނެޓާއި 41 ސިކުންތުން ރޭސް ނިންމި އިރު، މުހައްމަދު އިރުފާންގެ ޓައިމިންގ އަކީ 37 މިނެޓާއި 28 ސިކުންތެވެ.

އަންހެން ދުވުމުގައި ރާއްޖެއިން އެންމެ ރަނގަޅު ނަތީޖާއެއް ނެރުނީ މަރިޔަމް ޢަބްދުލް ކަރީމް (މަރީ) އެވެ. އޭނާގެ ޓައިމިންގ އަކީ 46 މިނެޓާއި 38 ސިކުންތެކެވެ. 47 މިނެޓާއި 09 ސިކުންތުން ރާނިޔާ ރޭސް ނިންމި އިރު، ރިޝްމީގެ ޓައިމިންގ އަކީ 50 މިނެޓާއި 28 ސިކުންތެވެ.

އެންމެ ފުރަތަމަ 2018 ވަނަ އަހަރު ބޫޓާނުގައި ބޭއްވި ކްރޮސް ކަންޓްރީ ޗެމްޕިއަންޝިޕްގައި ރާއްޖެ ދިޔައީ އެންމެ ފުުލަށެވެ.