ތިނަދޫން މީހުން ބޭލި ހާދިސާގެ މާލޭގައި ބާއްވަން އޮތް އަޑުއެހުންތައް ފަސްކޮށްފި
މިމައްސަލައިގެ ފުރަތަމަ އަޑުއެހުންތައް މިމަހުގެ 19 ވަނަ ދުވަހު ގދ. ތިނަދޫ ކެމްޕަހުގައި ވަނީ ކުރިޔަށްގެންގޮސްފައި
މައްސަލައިގެ ފުރަތަމަ އަޑުއެހުން ގދ ތިނަދޫ ކެމްޕަހުގައި ކުރިއަށް ގެންގޮސްފައިވޭ
ގދ. ތިނަދޫއިން މީހުން ބޭލި ހާދިސާ އާއި ގުޅިގެން މާލޭގައި ބޭއްވުމަށް ހަމަޖެހިފައިއޮތް ޕަބްލިކް ހިޔަރިންގ ފަސްކޮށްފައިވާކަމަށް އިންތިޤާލީ އިންސާފުގެ އޮމްބަޑްސްޕަރސަންގެ އޮފީހުން ބުނެފިއެވެ.
އެއޮފީހުން ބުނީ މިމަހުގެ 27 ވަނަ ދުވަހު މާލޭގައި ބޭއްވުމަށް ހަމަޖެހިފައިއޮތް ޕަބްލިކް ހިޔަރިންގގައި އެކަށީގެންވާ މިންވަރަށް ބަޔާންދޭނެ ފަރާތްތައް ނެތުމާއެކު، ޕަބްލިކް ހިއަރިންގގެ އަޑުއެހުންތައް ބޭއްވުން ފަސްކުރެވިފައިވާކަމަށެވެ. އަދި މާލޭގައި ބާއްވާ ޕަބްލިކް ހިއަރިންގ ބާއްވާނެ ތާރީޚްތަކާއި ގަޑި އަދި ބާއްވާނެ ތަން ފަހުގެ ތާރީޚެއްގައި އިއުލާންކުރާނެކަމަށްވެސް އޮމްބަޑްސްޕަރސަން އޮފީހުން ބުނެއެވެ.
މިއީ 1962 ވަނަ އަހަރު ގދ. ތިނަދޫއިން މީހުން ބޭލި ހާދިސާގައި ނިޒާމީ ސިފައެއްގައި ރާވައިގެން ދައުލަތުގެ އިދާރާއަކުން ނުވަތަ ދައުލަތުގެ އިދާރާއެއްގެ އިސް ހިންގުންތެރިއަކު ހިންގި ކަމަށް ބުނެ އިންތިޤާލީ އިންސާފުގެ އޮމްބަޑްސްޕަރސަންގެ އޮފީހަށް ހުށަހަޅާފައިވާ މައްސަލަތަކުގައި ހިނގާފައިވާ އިންސާނީ ޙައްޤުތަކާއި އަސާސީ މިނިވަންކަމާ ޚިލާފު ޢަމަލުތަކުގެ ސަބަބުން އަނިޔާ ލިބިފައިވާ ފަރާތްތަކުގެ ވާހަކަތައް އާންމުކޮށް ހިއްސާކުރުމުގެ ފުރުޞަތު ފަހިކޮށްދިނުމުގެ ގޮތުންނާއި، މައްސަލައިގެ ހަޤީޤަތް ހޯދުމަށްޓަކައި މިމައްސަލައާ ގުޅޭ އިތުރު މަޢުލޫމާތު ހޯދުމުގެ ގޮތުން ކުރިޔަށްގެންދާ އަޑުއެހުންތަކެކެވެ. މިމައްސަލައިގެ ފުރަތަމަ އަޑުއެހުންތައް މިމަހުގެ 19 ވަނަ ދުވަހު ގދ. ތިނަދޫ ކެމްޕަހުގައި ވަނީ ކުރިޔަށްގެންގޮސްފައެވެ.
އެދުވަހުގެ އަޑުއެހުމުގައި އެހާދިސާ ތަޖްރިބާ ކުރި މީހުން ބަޔާން ދީފައިވާއިރު، އެންމެންވެސް ވަނީ އެރަށުން މީހުން ބޭލީ ނުހަނު އަނިޔާވެރިކަމާއި ލާއިންސާނީ އަނިޔާތަކަށްފަހު ކަމަށް ބުނެފައެވެ.
އެ ފަރާތްތަކުން ބަޔާން ދެމުން ގެންދިޔައިރު އޮމްބަޑްސްޕަރސަން އޮފީހުގެ ބޭފުޅުން ވަނީ އިތުރަށް ސާފުކުރަން ބޭނުންވާ ކަންކަން އޮޅުންފިލުވާފައެވެ.
އިންތިގާލީ އިންސާފުގެ އޮމްބަޑްސްޕަރސަންގެ އޮފީހުން ބަލަމުންދާ މައްސަލަތަކަށް ބަލާއިރު، މައްސަލާގައި އަނިޔާ ލިބިފައިވާ މީހުން ކަމަށް ބަލަނީ, ސީދާގޮތުންނާއި ޖިސްމާނީ އަދި ނަފްސާނީ އަނިޔާ ލިބުނު މީހުންނާއި, ނުސީދާ ގޮތުން ނަފްސާނީ އަނިޔާ ލިބުނު މީހުންނާއި, އެއިރުގައި ރަށުގައި ދިރިއުޅުނު މީހުންގެ ތެރެއިން އެ ހާދިސާ ފެނި ތަޖުރިބާކުރެވުނު މީހުންނެވެ. މައްސަލަ ރައްދުވާ ފަރާތްތައްކަމަށް ބަލަނީ ހާދިސާގައި ދައުލަތުގެ ފަރާތުން ހަރަކާތްތެރިވި މީހުންނަށެވެ.
އޮމްބަޑްސްޕަރސަންގެ އޮފީހުން މި މައްސަލަ ބަލަމުންދާއިރު، މިހާރު މަޝްވަރާ ކުރެވިފައި އޮތީ, ތަހުގީގު ނިމޭތާ 2 މަސް ދުވަހުގެ ތެރޭގައި އެ އޮފީހުގެ ހޯދުންތައް ހިއްސާކުރާގޮތަށެވެ.
