އިންތިޤާލީ އިންސާފުގެ އޮމްބަޑްސްޕަރސަންގެ އޮފީހަށް ހުށަހެޅި ނުނިމި ހުރި މައްސަލަތަކާއި ގުޅިގެން ޢަމަލުކުރާނެ ގޮތަކާއި މެދު މަޝްވަރާކުރަމުންދާ ކަމަށް ސަރުކާރުން ބުނެފިއެވެ.
އިންތިޤާލީ އިންސާފުގެ އޮމްބަޑްސްޕަރސަންގެ އޮފީސް އުފައްދާފައިވަނީ ޤާނޫނު ނަންބަރު 2020/28 (އިންތިޤާލީ އިންސާފުގެ ޤާނޫނު) ގެ ދަށުންނެވެ. އެ އޮފީސް އެކުލަވާލެއްވީ ރައީސުލްޖުމްހޫރިއްޔާގެ ޤާރާރަކުންނެވެ.
އެ އޮފީހުގެ މަސައްކަތަކީ އެ ޤާނޫނުން ވަކި މުއްދަތެއް ކަނޑައެޅިފައިވާ މަސައްކަތެއް ކަމަށް ވާއިރު އެ މުއްދަތު ވަނީ 17 ނޮވެމްބަރު 2023 ގައި ވަނީ ހަމަވެފައެވެ. އެހެންކަމުން އެޤާނޫނާއި އެޤާނޫނުގެ ދަށުން އުފެދިފައިވާ އޮފީސްވަނީ އެ ތަރީޚުގައި ވަނީ އުވިފައެވެ.
މީގެ އިތުރުން ޤާނޫނުގައިވާ ގޮތުގެމަތިން އެ އޮފީސް އުވުމާ ގުޅިގެން، އެއޮފީހުގެ ހުރިހާ ލިޔެކިޔުންތަކާއި ހަރުމުދާ މިނިސްޓްރީ އޮފް ފިނޭންސްއާ ޙަވާލުކޮށްފައިވާކަމަށް 17 ނޮވެމްބަރު 2023 ގައި އެއޮފީހުން ވަނީ އިޢުލާނުކޮށްފައެވެ.
އެހެންކަމުން އިންތިޤާލީ އިންސާފަށް އެދި ހުށަހެޅި މީހުންނަށް ދެން ވާނީ ކިހިނެތްތޯ އޮތީ ސުވާލު އުފެދިފައެވެ. އެކަމާއި ގުޅޭގޮތުން ރާއްޖެ އެމްވީން ސުވާލުކުރުމުން މިނިސްޓަރު އެޓް ދަ ޕްރެޒިޑެންޓްސް އޮފީސް ފޮ ސްޓްރެޓީޖިކް ކޮމިއުނިކޭޝަން އިބްރާހިމް ހަލީލް ވިދާޅުވީ އިންތިޤާލީ އިންސާފުގެ އޮމްބަޑްސްޕަރސަންގެ އޮފީހަކީ ޤާނޫނަކުން ވަކި މުއްދަތަކަށް އުފައްދާފައިވާ އޮފީހަކަށްވެފައި، މިސަރުކާރުގެ މަސައްކަތް ފެށުނުދުވަހު އެ އޮފީހުގެ ޤާނޫނީ މުއްދަތު ހަމަވެ އެ އޮފީސް ވަނީ އުވިފައި ކަމަށެވެ. އަދި ރައްޔިތުންގެ މަޖިލީސް މެދުވެރިކޮށް އެޤާނޫނަށް އިސްލާޙު ގެނައުމަކާނުލައި އެ މުއްދަތު އިތުރު ކުރުމުގެ އިޚްތިރާތު ރައީސުލްޖުމްހޫރިއްޔާއަށް އެޤާނޫނުން ލިބިދީފިނުވާކަން އޭނާ ހާމަަކުރެއްވިއެވެ. އެހެންކަމުން އެ އޮފީހުން ކުރަން ފަށާ ނުނިމި ހުރި މައްސަލަތަކާމެދު ކުރިއަށް ދާނެ ގޮތެއް ނިންމުމަށްޓަކައި ކަމާބެހޭ ފަރާތްތަކާ ދަނީ މަޝްވަރާކުރެވެމުން ކަމަށް ހަލީލް ވިދާޅުވިއެވެ.
