އިލްމު ފޯރުކޮށްދިނުމަށް ރާއްޖެޓީވީން އެމްއެންޔޫއާއެކު އެއްބަސްވުމެއްގައި ސޮއިކޮށްފި
އެއްބަސްވުމުގެ މުއްދަތަކީ ދެއަހަރު ދުވަސް
އެއްބަސްވުމުގައި ސޮއިކުރުމުގެ ރަސްމިއްޔާތުގެ ތެރެއިން
ދިވެހިރާއްޖޭގެ ގައުމީ ޔުނިވަރސިޓީ (އެމްއެންޔޫ)އާ ރާއްޖެޓީވީ ޕްރައިވެޓް ލިމިޓެޑާ ދެމެދު އެއްބަސްވުމެއްގައި ސޮއިކޮށްފިއެވެ.
މިއީ ރާއްޖެޓީވީއާއި އެމްއެންޔޫ ގުޅިގެން, ދިރާސާތަކުގެ އަލީގައި މުޖުތަމައުއަށް ބޭނުންތެރި މައުލޫމާތުތަކެއް ފޯރުކޮށްދިނުމަށް ވެފައިވާ އެއްބަސްވުމެކެވެ.
މި އެއްބަސްވުމުގައި ރާއްޖެޓީވީގެ ފަރާތުން ސޮއިކުރެއްވީ ޑެޕިއުޓީ ޗީފް އޮޕަރޭޓިންގ އޮފިސަރ ނާޒްމީ ސައީދު އެވެ. އަދި އެމްއެންޔޫގެ ފަރާތުން ސޮއި ކުރެއްވީ ވައިސް ޗާންސެލަރ ޑރ. މުހައްމަދު ޝަރީފެވެ.
އެއްބަސްވުމުގެ ދަށުން ފޯރުކޮށްދޭ މައުލޫމާތުތަކުގެ އަސާސަކަށް ބަލާނީ ޔުނިވަރސިޓީން އިސްނަގައިގެން ނުވަތަ ޔުނިވަރސިޓީގެ މުވައްޒަފުން ބައިވެރިވާ ދިރާސާތަކެވެ. މީގެ ތެރޭގައި ޔުނިވަރސިޓީގެ ޖާރނަލްގައި ޝާއިއުކުރާ ދިރާސާތަކާއި އަދި ޔުނިވަރސިޓީން ގަވާއިދުން ހުށަހަޅާ އިލްމީ ފޯވަހި ޕްރޮގްރާމް ހިމެނޭނެއެވެ.
ދެ އަހަރު ދުވަހަށް ވެފައިވާ އެއްބަސްވުމާ ގުޅޭގޮތުން ރާއްޖެޓީވީގެ ހެޑް އޮފް ޕްރޮގްރާމްސް އެންޑް ކޯޑިނޭޝަން އާމިރު ސަލީމް ވިދާޅުވީ, އެއްބަސްވުމުގެ ދަށުން ޔުނިވަރސިޓީން ކުރާ ދިރާސާ އާޓިކަލްތައް ޝާއިއުކުރާނީ ރާއްޖެޓީވީގެ ދަށުން ހިންގާ ރާއްޖެ.އެމްވީ ވެބްސައިޓުގައި ކަމަށެވެ. އެގޮތުން ރާއްޖެއެމްވީގައި ޔުނިވަރސިޓީގެ ދިރާސާ އާޓިކަލް ހަފްތާއަކު އެއްފަހަރު ޝާއިއުކުރެވޭނެ ކަމަށް އާމިރު ވިދާޅުވިއެވެ.
މީގެ އިތުރުން އާމިރު ވިދާޅުވީ ޔުނިވަރސިޓީން ދިރާސާގެ އަލީގައި ހުށަހަޅައިދޭ ޕްރޮގްރާމް ރެކޯޑްކޮށް ޓީވީ ޕްރޮގްރާމެއްގެ ގޮތުގައި މަހަކު 2 ފަހަރު ގެނެސްދެވޭނެ ކަމަށާއި، އިލްމީ ފޯވަހި ރެކޯޑްކޮށް ޓީވީ ޕްރޮގްރާމެއްގެ ގޮތުގައި މަހަކު އެއް ފަހަރު ރާއްޖެޓީވީން ގެނެސްދޭނެ ކަމަށެވެ.
އެމްއެންޔޫގެ ފަރާތުން ފޯރުކޮށްދޭ މައުލޫމާތުގެ މައްޗަށް ބިނާކޮށް ތައްޔާރުކުރާ ޕްރޮގްރާމްތަކުގެ ޕްރޮޑަކްޝަންއާ ގުޅުންހުރި އެންމެހާ ކަމެއް ކުރާނީ ރާއްޖެޓީވީގެ ފަރާތުންނެވެ.
މި އެއްބަސްވުމާ ގުޅޭގޮތުން އެމްއެންޔޫއިން ބުނީ, ތައުލީމީ ޕްރޮގްރާމްތަކެއް ރާއްޖެޓީވީއާ ގުޅިގެން ކުރިއަށް ގެންދިއުމަށް ލިބުނު ފުރުސަތަކީ ތައުލީމަށް ލިބޭ ކުރިއެރުމެއް ކަަމަށެވެ. މި ޕްރޮގްރާމްތަކުގެ ސަބަބުން ކިޔަވާ ދަރިވަރުންގެ އިތުރުން މުޖުތަމައުއަށް ރަނގަޅު އަސަރު ފޯރާނެ ކަމަށެވެ. އަދި މިއީ އިލްމު ގިނަ ބަޔަކަށް ފޯރުކޮށްދިނުމަށް ވެވުނު ވަރަށް މުހިންމު އެއްބަސްވުމެއްގެ ގޮތުގައި އެމްއެންޔޫއިން ފާހަގަކޮށްފައިވެއެވެ.
