ރާއްޖެ ޓީވީ އަށް ހަރުކަށި ފިޔަވަޅު އަޅާނެ ކަމުގެ އިންޒާރު، މޯލްޑިވްސް ބްރޮޑްކާސްޓިމް ކޮމިޝަން (ބްރޮޑްކޮމް) އިން ދީފި އެވެ.

ބޮރޮޑްކޮމް އިން، ރާއްޖެ ޓީވީ އަށް ފިޔަވަޅު އަޅާނެ ކަމުގެ އިންޒާރު ދީފައި ވަނީ އެ ކޮމިޝަން އިން ބަލަމުން އަންނަ މައްސަލަތައް އިތުރަށް ސާފުކޮށްދިނުމަށް އެދި ރާއްޖެ ޓީވީ އިން ޖަވާބުދާރީ ވެފައި ވަނިކޮށެވެ. ނަމަވެސް، އެ މައްސަލަ ތަކުގެ އެއްވެސް ކަމެއް ސާފުކޮށްނުދީ، ރާއްޖެ ޓީވީއާ ދެކޮޅަށް ބަލަމުން އައި މައްސަލަތައް ނިންމައި، ފިޔަވަޅު އަޅާނެ ކަމުގެ އިންޒާރު ބްރޮޑްކޮމް އިން ވަނީ ދީފަ އެވެ.

ކުޑަ ކުއްޖެއްގެ ކަރާމާތް ގެއްލޭ ފަދަ ކޮންޓެންޓެއް ބްރޮޑްކާސްޓު ކުރި ކަމަށް ބުނާ މައްސަލައިގައި ރާއްޖެ ޓީވީ އިން ވަނީ ޖަވާބުދާރީވެފަ އެވެ. އެގޮތުން 2025 އޭޕްރީލް 8 ވަނަ ދުވަހު ރާއްޖެ ޓީވީ އިން ބްރޮޑްކޮމް އަށް ފޮނުވި ސިޓީގައި ވަނީ، އެ މައްސަލަ އިތުރަށް ސާފު ކޮށްދިނުމަށް އެދިފަ އެވެ.

ރާއްޖެ ޓީވީ އިން އެދިފައި ވަނީ ބްރޮޑްކާސްޓު ކުރެވިފައިވާ ކޮންޓެންޓުން ގެއްލެނީ ކޮން ފަރާތެއްގެ ކަރާމަތެއްތޯ ސާފު ކޮށްދިނުމަށް އެދޭ ކަމަށެވެ. އަދި އެ ކޮންޓެންޓުން ބަޔަކަށް ނިކަމެތި ކަމެއް ލިބެނީ ކޮން ގޮތަކުންކަން ސާފު ކޮށްދިނުމަށް ވެސް ވަނީ އެދިފަ އެވެ.

މީގެ އިތުރުން ބްރޮޑްކޮމްގެ ސިޓީގައި ބަޔާން ކުރެފައިވާ ބްރޮޑްކާސްޓު ކުރުމުގެ ކޯޑް އޮފް ޕްރެކްޓިސްގެ ހަތަރު ވަނަ ހަމައިގެ (5) އާއި، ބްރޮޑްކާސްޓުކުރުމުގައި ކުޑަ ކުދިން ހިމާޔަތް ކުރުމަށް އަމަލު ކުރަންވީ ގައިޑްލައިންގެ ތިން ވަނަ ހަމައިގެ (ށ) އާއި، ބްރޮޑްކާސްޓުކުރުމުގައި ކުޑަކުދިން ހިމާޔަތް ކުރުމުގައި އަމަލު ކުރަންވީ ގައިޑްލައިންގެ (ނ) ގެ ދަށުން ކުޑަ ކުއްޖެއްގެ ކަރާމާތާއި ހައްގުތަކަށް އުނިކަމެއް އަންނާނެ ފަދަ ކަމެއް އެ ކޮންޓެންޓުގައި އޮތް ނަމަ، އެކަން ސާފު ކޮށްދިނުމަށް ވެސް ވަނީ އެދިފަ އެވެ.

ސަބަބަކީ އެ ކޮންޓެންޓުގައި ވާހަކަ ދެއްކި ފަރާތުގެ ވާހަކައިގައި ފާހަގަ ކުރަނީ ވަކި މީހެއްކަން ނުވަތަ އެއީ އަށާރަ އަހަރުން ދަށުގެ ކުޑަ ކުއްޖެކަން މުޅިން ސާފު ނުވާތީ އާއި، ވާހަކަ ދެއްކި ފަރާތުން ކުޑަ ކުއްޖެއްގެ ވާހަކަ ދައްކަން ބޭނުން ނުވާ ކަމަށް ބުނެފައިވާތީ އާއި، އެ ވާހަކައިގައި އެއްވެސް ފަރާތެއްގެ ނަން ބޭނުން ކޮށްފައި ނުވާތީ އެ ކޮންޓެންޓުގައި ބްރޮޑްކޮމް އިން ފާހަގަ ކޮށްފައިވާ ފަދަ މައްސަލައެއް ހުރިކަން ދެނެގަތުމަށް އުނދަގޫވާތީ ކަމަށް ރާއްޖެ ޓީވީ އިން ބުނެފައިވެ އެވެ.

އެހެންކަމުން ބްރޮޑްކޮމް އަށް ޖަވާބުދާރީ ވަމުން ރާއްޖެ ޓީވީ އިން އެދިފައި ވަނީ، ވާހަކަ ދެއްކި ފަރާތުން ދައްކާފައި ވަނީ ކާކުގެ ވާހަކައެއް ކަމާއި، އެއީ އަށާރަ އަހަރުން ދަށުގެ ކުއްޖެއް ނަމަ ކޮން ކުއްޖެއްކަން ރާއްޖެ ޓީވީ އަށް ސާފު ކޮށްދިނުމަށެވެ. އަދި މީހެއްގެ ނުވަތަ ތަނެއްގެ މައްޗަށް މައްސަލައެއް ތުހުމަތުކޮށް، އެ މައްސަލަ ބެލުމުގެ ކުރިން އެ މައްސަލަ ރައްދުވާ ފަރާތައް މައްސަލަ ސާފު ކޮށްދިނުމަކީ ދިވެހި ރާއްޖޭގެ ޤާނޫނު އަސާސީ އާއި ޤާނޫނު އަސާސީގެ ދަށުން ހެދިފައިވާ ވަޟައީ ޤާނޫނުތަކުން ވެސް މައްސަލަ ބަލާ ފަރާތުގެ މައްޗަށް ކުރުން ލާޒިމު ކޮށްފައިވާ ކަމަކަށް ވެފައި، އެކަން ސާފުވުމަކީ މައްސަލަ ރައްދުވާ ފަރާތައް ކަށަވަރު ކޮށްދީފައިވާ ހައްގަކަށްވާތީ ރާއްޖެ ޓީވީ އަށް އެކަން ސާފު ކޮށްދިނުމަށް ވަނީ އެދިފަ އެވެ.

އެހެން ނަމަވެސް، އާދީއްތަ ދުވަހު ބްރޮޑްކޮމް އިން ރާއްޖެ ޓީވީ އަށް ފޮނުވާފައިވާ ސިޓީގައި ބުނެފައި ވަނީ، ރާއްޖެ ޓީވީ އިން ބްރޮޑްކާސްޓު ކުރުމުގެ އުސޫލާ ޚިޔާލުވެފައިވާ ކަމަށް ސާބިތުވާ ކަމަށް ކަނޑައަޅާފައިވާ ކަމަށެވެ.

މީގެ އިތުރުން ބްރޮޑްކާސްޓު ކުރުމުގެ ހަމަތަކާއި، ޚިޔާލުފާ ގޮތަށް ތަރުކާރުކޮށް ކޮންޓެންޓް ބްރޮޑްކާސްޓު ކުރަމުން ދާ ނަމަ، ނުވަތަ އެ ފަދަ ކަމެއް ދެން ތަރުކާރު ކޮށްފި ނަމަ އެ މައްސަލައިގެ ޒާތާއި، ހައްސާސް ކަމަށް ބެލުމަށް ފަހު، ޤާނޫނާއި ޤާވާއިދުގެ އިމުގެ ތެރެއިން ހަރުކަށި ފިޔަވަޅު އަޅާނެ ކަމުގެ އިންޒާރު ރާއްޖެ ޓީވީ އަށް ދިނުމަށް އެ މައްސަލަ ބެލި ކޮމިޝަންގެ ޖަލްސާގައި ބައިވެރިވި މެމްބަރުންގެ އިއްތިފާގުން ނިންމާފައިވާ ކަމަށް ސިޓީގައި ވަނީ ބުނެފަ އެވެ.

ދެ ވަނަ މައްސަލައިގައި ބްރޮޑްކޮމް އަށް ޖަވާބުދާރީވާން ދިން ފުރުސަތުގައި ރާއްޖެ ޓީވީ އިން 2025 މެއި 20 ވަނަ ދުވަހު ފޮނުވި ސިޓީގައި ބުނެފައި ވަނީ، އެ ކޮމިޝަން އިން ހަވާލާދީފައިވާ ބްރޮޑްކާސްޓު ކުރުމުގެ ކޯޑު އޮފް ޕްރެކްޓިސްގެ ހަމަތަކާއި، ސިޓީގައި ބަޔާން ކުރާ ކޮންޓެންޓް ޓްރާންސްކްރިޕްޓްއާ ޚިޔާފުވާ ގޮތް ކޮމިޝަންގެ ސިޓީގައި ބަޔާން ކޮށްފައި ނުވާތީ، މައްސަލަ ރާއްޖެ ޓީވީ އަށް ސާފު ނުވާ ކަމަށެވެ.

އެހެންކަމުން މުޅި އެ މައްސަލަ ސާފު ކޮށްދިނުމަށް ފަހު، އެކަމަށް ޖަވާބުދާރީ ވުމަށް އެކަށީގެންވާ ވަގުތު ދިނުމަށް ރާއްޖެ ޓީވީ އިން ވަނީ އެދިފަ އެވެ. ނަަމަވެސް، އެ މައްސަލަ ވެސް ބަަލައި ނިންމައި، ބްރޮޑްކޮމް އިން ރާއްޖެ ޓީވީ އަށް އިންޒާރު ދީފައި ވަނީ ޖަވާބުދާރީވުމަށް އެކަށީގެންވާ ވަގުތު ނުދީ އަދި މައްސަލަ ސާފުކޮށް ވެސް ނުދީ އެވެ.