ރާއްޖެ ޓީވީ އަށް ވަދެ ހަވަރަށް ދިނުމަށް ގޮވާލި މައްސަލަ ފުލުހަށް ހުށަހަޅައިފި

ވެރިކަން ކުރާ ޕާޓީ ޕީއެންސީގެ މީޑިއާ ގްރޫޕެއްގައި ރާއްޖެޓީވީ ހަވަރަށް ދިނުމަށް ގޮވާލި މައްސަލަ ބަލައިދިނުމަށް އެދި ރާއްޖެޓީވީ އިން ފުލުހަށް ހުށަހަޅައިފިއެވެ.

ކޮމިޝަނަރ އޮފް ޕޮލިސް އަލީ ސުޖާއުއަށް ފޮނުވި ސިޓީގައި ބުނެފައިވަނީ 2024 ޑިސެންބަރު 10 ވަނަ ދުވަހު އިދިކޮޅު ފަރާތްތަކުން އިންތިޒާމްކޮށްގެން މާލޭގައި ބޭއްވި ބޮޑު ޖަލްސާގެ ލައިވް ކަވަރޭޖް ރާއްޖެޓީވީން ގެނެސްދެމުންދާ ވަގުތު ރާއްޖެޓީވީގެ ސްޓޭޝަން ތެރެއަށް ވަދެގަތުމަށާއި، މުވައްޒަފުން ހަވަރަށް ދިނުމަށް ގޮވާލައި "ޕީއެންސީ – ސައިބަރ ޓްރޫޕްސް"ގެ ނަމުގައި ހިންގަމުންދާ ސޯޝަލް މީޑިއާ ގްރޫޕަކަށް ޑިސެންބަރު 10 ވަނަ ދުވަހުގެ އިރުއޮއްސި 7:36ގައި "ޒައްރަ" ކިޔާ އެކައުންޓަކުން ޕޯސްޓެއްކޮށް ރާއްޖެޓީވީ އާއި ރާއްޖެޓީވީގެ މުވައްޒަފުންނަށް ގެއްލުން ދިނުމަށް ގޮވާލާފައިވާތީ މިކަމުގެ ހަގީގަތް ބައްލަވައިދެއްވުމަށާއި، މިހާރުވެސް ރާއްޖެޓީވީއަށް މިފަދަ ތްރެޓެއް އޮތްތޯ ތަހުގީގުކޮށްދެއްވުމަށެވެ.

އަދި މި މައްސަލަ ރާއްޖެޓީވީގެ ފަރާތުން ފުލުހުންނަށް ހުށަހަޅަން ޖެހުނީ ރާއްޖެޓީވީއަށް މީގެ ކުރިންވެސް ސިޔާސީ މަގްސަދުގައި ބޮޑެތި ގެއްލުންތަކެއްދީ މުޅި ސްޓޭޝަންގައި އަލިފާން ރޯކޮށް އަންދާލުން ފަދަ ނުރައްކާތެރި ކަންކަން ކުރިމަތިވެފައި ވާތީ އާއި މިގޮތަށް ދެކެވޭ ވާހަކަތަކަކީ ވަރަށް ސީރިއަސް ވާހަކަތަކެއް ކަމަށް ރާއްޖެޓީވީއަށް ގަބޫލުކުރެވޭތީ ކަމަށް ސިޓީގައި ބުނެފައިވެއެވެ.

އެހެންކަމުން މިމައްސަލަ ސީރިއަސް މައްސަލައެއްގެ ގޮތުގައި ތަހުގީގު ކޮށްދެއްވުމަށާއި، އަދި މައްސަލައިގެ ތަހުގީގު ނިމި، ރާއްޖެޓީވީއަށް މިފަދަ ތްރެޓެއް ނެތްކަން ފުލުހުންގެ ތަހުގީގަށް ކަށަވަރު ވަންދެން ރާއްޖެޓީވީއަށް ފުލުހުންގެ ސެކިއުރިޓީ ހަމަޖައްސަވައި ދެއްވުމަށްވެސް އެދިފައިވެއެވެ.

ޖަލްސާގެ ލައިވް ކަވަރޭޖް ރާއްޖެޓީވީން ގެނެސްދެމުންދާ ވަގުތު ރާއްޖެޓީވީގެ ސްޓޭޝަން ތެރެއަށް ވަދެގަތުމަށާއި، މުވައްޒަފުން ހަވަރަށް ދިނުމަށް ގޮވާލައި "ޕީއެންސީ – ސައިބަރ ޓްރޫޕްސް"ގެ ނަމުގައި ހިންގަމުންދާ ސޯޝަލް މީޑިއާ ގްރޫޕުގައި ލިޔެފައިވަނީ ޓެކްސްޓްގެ އިމޭޖެއް ސޯޝަލް މީޑިއާ ގައި ވަނީ އާންމު ވެފައެވެ.

"ޕީއެންސީ - ސައިބަރ ޓްރޫޕްސް" ގެ ނަމުގައި ހަދައިގެން ހިންގި ގްރޫއްޕަކީ، އިދިކޮޅު އެމްޑީޕީން ބޭއްވި ބޮޑު ޖަލްސާއަށް ހުރަސް އެޅުމަށާއި، ޖަލްސާއާއި ދެކޮޅަށް ސޯޝަލް މީޑިއާގައި އެންޓި ކެމްޕޭން ހިންގުމަށް ރާވައިގެން އުފެއްދި ގްރޫއްޕެއް ކަމުގެ އަޑުތައްވެސް ވަނީ ފެތުރިފައެވެ.