އެމްއެންޔޫގެ ކާބޯތަކެތީގެ މައުރަޒު ފަށައިފި
މިއީ އެމްއެންޔޫއިން މިފަދަ މައުރަޒެއް ބާއްވާ ފުރަތަމަ ފަހަރު
އެމްއެންޔޫގެ ކާބޯތަކެތީގެ މައުރަޒު
މޯލްޑިވްސް ނޭޝަނަލް ޔުނިވަރސިޓީ (އެމްއެންޔޫ) ގެ ކާބޯތަކެތީގެ މައުރަޒު "ފަހި ސުފުރާ" ފަށައިފިއެވެ.
މި މައުރަޒު ހުޅުއްވައިދެއްވީ މިނިސްޓަރ އޮފް ހަޔަރ އެޑިއުކޭޝަން ޑރ. އިބްރާހިމް ހަސަން އެވެ. މައުރަޒު ހުޅުއްވައިދެއްވުމަށްފަހު މިނިސްޓަރ ވަނީ އެކި ސްޓޯލްތައް ބައްލަވާލައްވާފައެވެ.
އެމްއެންޔޫ ގެ ކާބޯތަކެތީގެ މައުރަޒު އޮންނާނީ މާރޗް 24ން 26 އަށް ޤައުމީ ޔުނިވަރސިޓީގެ އީދާރީ މަރުކަޒުގައެވެ. އަދި އެގްޒިބިޝަން ކުރިއަށްދާނީ މެންދުރު ފަހު 14:00ން ރޭގަނޑު 22:00އަށެވެ.
ރާއްޖެއެމްވީއަށް މައުލޫމާތު ދެއްވަމުން އެމްއެންޔޫގެ ރިސާޗް އެންޑް އެންޓަރޕްރައިޒްގެ ޑެޕިއުޓީ ވައިސް ޗާންސެލަރ އައިޝަތު ޝެނެލާޒް އާދަމް ވިދާޅުވީ ސްޓޯލްތައް ދޫކޮށްފައިވަނީ ހިލޭ ކަމަށެވެ. އަދި ކުދި ވިޔަފާރީތައް ކުރިއަރުވަން ބޭނުންވާ މީހުންނަށް މިއީ ރަނގަޅު ފުރުސަތެއް ކަމަށް އޭނާ ފާހަގަކުރެއްވިއެވެ.
މިއީ އެމްއެންޔޫއިން މި މައުރަޒު ބާއްވާ ފުރަތަމަ ފަހަރު ކަމަށްވާއިރު މި މައުރަޒު މެދުވެރިކޮށް އެމީހުންގެ ހުނަރު ދައްކާލުމުގެ ފުރުސަތު ލިބިގެންދާނެއެވެ. މި މައުރަޒުގައި ވިއްކަން ހުރި ބައެއް ތަކެއްޗަށް ބަލާއިރު ދިވެހިވަންތަ ކެއުންތަކާއި އެކި ކަހަލަ ކުކީސްގެ އިތުރުން ހަވާދުގެ ބާވަތްތައް ވެސް އެބަހުއްޓެވެ.
މައިރަޒުގައި ބައިވެރިވި ބައެއް ފަރާތްތަކުން ބުނީ މި މައުރަޒުގެ ސަބަބުން އެމީހުން އުފައްދާ ކާބޯތަކެތި އިޝްތިހާރު ކުރުމަށް އިތުރު ފުރުސަތެއް ހުޅުވިގެން ދިޔަ ކަމަށެވެ.
މިފަދަ ކާބޯތަކެތީގެ މައުރަޒުއެއް އެމްއެންޔޫއިން މިއަހަރު ބާއްވާފައިވާއިރު މިދިޔަ އަހަރު ވަނީ ފޮތް މައުރަޒެއް ވެސް ބާއްވާފައެވެ. އަދި ކުރިއަތް އޮތްތާނގައި ތަފާތު އެކި މައުރަޒުތައް ބޭއްވުމަށް ނިންމާފައިވާ ކަމަށް ވެސް އެ ޔުނިވަރސިޓީ އިން މައުލޫމާތު ދީފައިވެއެވެ.
