ބާސާގެ ހުށައެޅުން ގަވީ އާއި އަރައުހޯ ރިޖެކްޓްކޮށްފި

ބާސެލޯނާގައި މޮޅު ކުޅުމެއް ދައްކަމުން އަންނަ ޒުވާން ރޮނާލްޑް އަރައުހޯ އާއި ގަވީގެ ކޮންޓްރެކްޓް އައު ކުރުމަށް އެކްލަބުން ހުށަހެޅި ކޮންޓްރެކްޓް ދެކުޅުންތެރިންވެސް ރިޖެކްޓްކޮށްފިއެވެ.

މިހާރު މި ދެކުޅުންތެރިންގެ ކޮންޓްރެކްޓުގައި ހިމެނޭ ކަންތައްތަކަށްވުރެ ގިނަ ފައިދާތަކެއް ހިމަނައިގެން ހުށަހެޅި ކޮންޓްރެކްޓް ރިޖެކްޓްކޮށްފައިވާއިރު، ގިނަ ކްލަބްތަކަކުން އަންނަނީ މި ކުޅުންތެރިންނަށް ފާރަލަމުންނެވެ. އަރައުހޯއަށް ކަޅިއަޅަމުން އަންނަ ކްލަބުތަކުގެ ތެރެއިން އެންމެ ފާހަގަ ކުރެވެނީ މެންޗެސްޓަރ ޔުނައިޓެޑެވެ. ޗެލްސީއިންވެސް އަރައުހޯއަށް ޝައުގުވެރިކަން ފާޅުކުރި ނަމަވެސް އެޓީމުގެ މިހާރުގެ މާލީ ހާލަތަށް ބަލައި ޗެލްސީއަށް އެކަން ކާމިޔާބުކުރެވޭނެ ކަމަކަށް ނުބެލެވެއެވެ.

އުމުރުން 17 އަހަރުގެ ގަވީއަކީވެސް ބާސެލޯނާގައި ރަނގަޅު ކުޅުމެއް ދައްކަމުން އަންނަ ކުޅުންތެރިއެކެވެ. ރިޕޯޓުތައް ބުނާގޮތުން އެހެން ކްލަބަކަށް ދިއުމުގެ ބަދަލުގައި ދެފަރާތުން އެއްބަސްވުމަކަށް އައިސް ގަވީ ބާސެލޯނާގައި މަޑުކުރާނެއެވެ.

މި ދެކުޅުންތެރިންގެ ކޮންޓްރެކްޓް ހަމަވާނީ 2023 ވަނަ އަހަރުގެ ޖޫން މަހުގެ ނިޔަލަށެވެ.