ސޯޝަލް މީޑިއާގައި މިފަހުން ދައުރުވި ވީޑިއޯއަކަށް ގިނަ ބައެއް ސަމާލުކަން ލިބިގެން ގޮސްފައިވާއިރު، އެ ވީޑިއޯއިން ފެނިގެންދަނީ ހއ ހޯރަފުށީ ސާޖަންޓް މުސްއަދު އަސްލަމް ވައްކަމުގެ ތުހުމަތުވާ މީހެއް އަތުލައިގަންނަ މަންޒަރެވެ.

ރާއްޖެއެމްވީއަށް މައުލޫމާތު ލިބިފައިވާ ގޮތުގައި މުސްއަދަށް ފުރަތަމަ އޭނާ ފެނުނީ މާލޭތެރެ ޕެޓްރޯލް ކުރުމުގެ މަސައްކަތް ކުރަމުން ދަނިކޮށް، ޗާންދަނީ މަގު ސޮނީ ސްޕޯޓްސް ހުރި ސަރަޙައްދުންނެވެ. އޭރު އެމީހާ އައީ ބިސްކޯދު ކޭހެއް ހިފައިގެންނެވެ.

އެހެންނަމަވެސް، އެމީހާގެ އަމަލުތައް ހުރި ގޮތުން ޝައްކު ކުރެވިގެން ސާޖަންޓް މުސްއަދު އޭނާއާ ސުވާލުކުރުމުން، އޭނާއަށް އެ ބިސްކޯދު ކޭސް ހޯދި ގޮތް ކިޔައެއް ނުދެވުނެވެ. އަދި އެހިސާބުން އޭނާ ބިސްކޯދު ކޭސް ބަހައްޓާފައި ވަގުތުން ދުއްވައިގަތީއެވެ. އެހެންނަމަވެސް، ސާޖަންޓް މުސްއަދު ދޫ ނުދީ އޭނާގެ ފަހަތުން ގޮސް، އެންމެ ފަހުން އަތުލައިގަތީއެވެ.

މިކަމާއި ގުޅޭގޮތުން ސޯޝަލް މީޑިއާގައި ދައުރުވަމުންދާ ވީޑިއޯއިން ފެންނަނީ އާއްމު މީހެއްގެ ފަހަތުން ވަރަށް ބާރަށް ދުވެފައި ސާޖަންޓް މުސްއަދު އަންނަ ތަނެވެ. ސާޖަންޓް މުސްއަދު އެމީހާއާއި އަރާ ހަމަކުރަނިކޮށް ގެއަކަށް އެމީހާ ވަދެއެވެ. ސިޑިން ވެސް ވަރަށް ބާރަށް ދުވެފައި އަރައެވެ.

އެކަމަކު ސާޖަންޓް މުސްއަދު ވެސް ހުއްޓުމެއް ނެތި ސިޑިން ދުވެފައި އަރައެވެ. ވަރުބަލިވި ނަމަވެސް ސާޖަންޓް މުސްއަދު ހުއްޓެނީ އެމީހާ އަތުލައި ގަތުމަށްފަހުއެވެ. ވައްކަން ކުރި ކަމަށް ތުހުމަތުވާ މިހާ ޓީޝާޓުގެ ގިރުވާނުގައި ހިފައި އަނެއްކާ ސިޑިން ތިރިއަށް ގެންދެއެވެ. އަދި އޭރު ދެ މީހުން ވެސް ތިބީ އިންތިހާއަށް ވަރުބަލިވެފައިކަން އެނގެއެވެ.

ވައްކަމުގެ ތުހުމަތުވާ މީހާ އަތުލައިގަންނަ ތަނުން ފުލުސް މީހާއާއި ވާހަކައެއް ދެކެވޭ ތަން ފެނެއެވެ. ރާއްޖެއެމްވީއަށް އެނގިފައިވާ ގޮތުގައި އެވަގުތު ސާޖަންޓް މުސްއަދު ވަނީ ގަދަ ނުހަދައި ރީތިކޮށް ދިއުމަށް އޭނާ ގާތުގައި ބުނެފައެވެ. ބުނުމާއެކު އެމީހާ ވަނީ ނުކައި ހުރުމުގެ ސަބަބުން ނުހަނު ބޮޑަށް ބަނޑުހައިވެފައިވާކަމަށް ބުނެފައެވެ.

އެހިސާބުން ސާޖަންޓް ވަނީ ބަންދުގައި ހުއްޓަސް ކާން ލިބޭނެކަމަށް ބުނެފައެވެ. ބުނުމާއެކު، މައްސަލައެއް ނެތްކަމަށް ބުނެ ނުރުހުންވެފައި ހުރެ އެމީހާ އޭނާއާއެކު ދެއެވެ.

މިހާރު އޭނާގެ ބަންދަށް ވަނީ 7 ދުވަހުގެ މުއްދަތެއް ޖަހާފައެވެ. އެ މައްސަލަ މިހާރު ފުލުހުން ގެންދަނީ ތަހުގީގު ކުރަމުންނެވެ.

ސާޖަންޓް މުސްއަދުގެ މަސައްކަތް ފާހަގަ ކުރައްވައި ކޮމިޝަނަރ އޮފް ޕޮލިސް މުޙައްމަދު ހަމީދު ވަނީ އޭނާއާއި ބައްދަލުކުރައްވާ ތައުރީފު ކުރައްވާފައެވެ. އަދި އޭނާއަށް ގިނަގުނަ ހިތްވަރު ދެއްވާފައިވެއެވެ.

އެ ވީޑިއޯ އާންމުވެގެން ދިޔުމާއެކު ގިނަ ބަޔަކު ގެންދަނީ ސާޖަންޓް މުސްއަދަށް ތައުރީފު ކުރަމުންނެވެ.